Оросын ерөнхийлөгч Владимир Путин болон АНУ-ын ерөнхийлөгч Дональд Трамп нар дөрөвдүгээр эсвэл тавдугаар сард уулзах боломжтой эсэхийг Кремль судалж байгаа талаар нэрээ нууцалсан албан тушаалтнууд "The Moscow Times" агентлагт мэдээлжээ. Гэхдээ энэхүү уулзалт нь албан ёсоор болох эсэх нь батлагдаагүй учир эдгээр албан тушаалтнууд нэрээ нууцлахыг хүссэн байна. Өнгөрсөн сард АНУ-Оросын өндөр түвшний хэлэлцээг зохион байгуулснаас гадна Ойрхи Дорнодод болж буй ихэнхи асуудалд төвийг сахиж буй Саудын Арабд хоёр орны удирдагч уулзах магадлалтай аж. Гэхдээ эх сурвалжийн мэдээлснээр, Кремль уг уулзалтыг аль болох хойшлуулахыг хичээж байна.

Учир нь Оросыг Украины газар нутгаас цэргээ аль болох хурдан татахыг ятгахын тулд Вашингтон одоо тавьж буй нөхцөлөөсөө илүү уян хатан болзол тавьж, Москвад ашигтай санал гаргах болно гэж үзэж байгаа бололтой.

Гэсэн хэдий ч гадаад болон дотоодын асуудлаа тэнцвэржүүлэхийн тулд хоёр орны төрийн тэргүүн нарын уулзалтыг Кремль яаран шийдвэрлэхгүй байна гэж зарим албан тушаалтан тайлбарлав. Нэрээ нууцалсан эх сурвалжийн хэлснээр, "Одоогийн байдлаар хэлэлцэж буй нэг хувилбар нь Улаан өндөгний баярын үеэр зохион байгуулах юм. Энэ нь дөрөвдүгээр сарын 20-ны үеэр гэсэг үг. Гэхдээ Дональд Трамп өнгөрсөн долоо хоногт Ойрхо Дорходод айлчлахаар төлөвлөж буйгаа зарласан. Тэрбээр сар хагасын дараа айлчилж магадгүй гэсэн тул Украины асуудлаарх уулзалт давхцаж магадгүй. Ямартай ч зуны амралт эхлэхээс өмнө хоёр орны тэргүүн нар уулзах болно" гэж "The Moscow Times"-д хэлжээ. БЭЛТГЭЛ АЖИЛ Орос болон АНУ-ын ерөнхийлөгчдийн дээд хэмжээний уулзалтын бэлтгэл ажил хэдэн сар үргэлжлэх шаардлага гардаг. Холбогдох дипломат, тагнуул, цэргийн төлөөлөгч болон иргэний хэргийн албан тушаалтнууд уулзаж, хоёр талын хэлэлцээрийн талаар хэлэлцэж, ямар асуудал дээр илүү анхаарах ёстойг тохиролцдог байна.  Жишээлбэл, 2021 оны зургадугаар сард тухайн үеийн ерөнхийлөгч Жо Байден болон Путин нарын дээд хэмжээний уулзалтыг таван сарын турш бэлтгэжээ. Тус уулзалт Женевт болсон бөгөөд бэлтгэл ажилд наад зах нь албан тушаалын баримт бичиг урьдчилан солилцох, гэрээний текстийг зохицуулах зэрэг зүйлсийг бэлтгэдэг байна. Дээд хэмжээний уулзалтыг маш нухацтай, хянамгай хандах шаардлагатай тул зохион байгуулагч болон оролцогч талууд маш өндөр түвшний хариуцлагатай ажилладаг аж.

Үүний адил Кремлийн зүгээс Трамп болон Путин нарын дээд хэмжээний уулзалтыг зохион байгуулахад таваас зургаан сар шаардагдана гэж тооцоолж байв.

Гэсэн хэдий ч дайны талбар дахь гэнэтийн өөрчлөлт, геополитикийн нөхцөл байдлаас хамааран Кремль бэлтгэл ажлаа түргэсгэх шаардлагатай болжээ. Нэрээ нууцалсан эх сурвалжийн тайлбарлаж буйгаар, "Хэрэв уг уулзалтыг хэтэрхий удаан хойшлуулах юм бол Вашингтон хэлэлцээ хийх эрмэлзэл нь алдарч эхэлнэ. Москватай хэлэлцээ хийх сургаар АНУ-д дотоодын эсэргүүцэл гарч эхэлсэн бөгөөд Европын холбоотнууд ч мөн адил дарамт шахалт үзүүлж байна. Түүнчлэн, Трампд Хятадтай харилцах харилцаагаа зохицуулах бүр том сорилт тулгарсан" гэжээ. Хэдийгээр Украины хүч дайны фронтод суларч байгаа гэж Москва үзэн, АНУ-тай хэлэлцэх нь нэн яаралтай асуудал биш гэж тооцоолж байсан ч дэлхийн улс төрийн нөхцөл байдал ганхаж байна. Кремлийн зарим хууль тогтоогч, эрх баригчид АНУ-тай хамтарч ажиллахад бэлэн гэдгээ харуулах хэрэгтэй гэж шаардаж байгаа бол түр азнах нь илүү дээр гэх хүмүүс ч бий.

Мөн Путин, Трамп нарын уулзалтаас өмнө Оросын арми Курск мужийг эргүүлэн авч, Украины эзэлсэн бүс нутгийн хил хүртэл хяналтаа тогтоох зэргээр дайны талбарт олсон амжилтаа бататгах хэрэгтэй гэж хэсэг бүлэг албан тушаалтнууд үзэж буй.

Саяхан тэтгэвэртээ гарсан нэгэн албан тушаалтан "The Moscow Times"-д хэлэхдээ, "Ямар ч нөхцөл дор байсан америкчууд бидний найз биш. Тэд бидний хүчийг сулруулж, дарамт шахалт үзүүлэх гэж хичээх л болно. Тиймээс бид хэдий чинээ газар нутгийг булаан авна, тухайн хэмжээгээрээ байр сууриа хүчирхэгжүүлж чадна. Киев ч мөн адил илүү найрсаг болж эхэлнэ" гэсэн байна. Гэхдээ уг асуудлаар хоёр орны төрийн тэргүүн нар уулзах эсэх нь Путины эцсийн шийдвэрээс хамаарах юм. ӨНДӨР ЭРСДЭЛ АНУ-ын хэлэлцээ хийх эрмэлзлийг тогтвортой хадгалахын тулд Кремлийн зүгээс Трампийн засаг захиргааны байр суурийг анхааралтай ажиглаж байна. Ажиглагчдын үзэж буйгаар, Украины дайнаас гадна Москва, Вашингтоны хооронд дипломат дайн өрнөж байгаа бөгөөд үүнийг эцэслэх эрх Трамп, Путин нарт бий. Тодруулбал, Оросын зүгээс хориг арга хэмжээг хөнгөвчлөх, Арктик болон Сибирийн төслүүдэд АНУ хөрөнгө оруулалт хийх, чухал технологи ашиглах, зэвсгийн хяналт, стратегийн тогтвортой байдал зэрэг хоёр талын олон асуудлыг хэлэлцэхийг хүсч буй.

Мөн Цагаан ордны зууван танхимд болсон Зеленский, Трампийн маргааны дараа Москва аль болох ойрын хугацаанд уулзалтыг зохион байгуулах шаардлагатай гэж үзжээ.

Путины хэвлэлийн төлөөлөгч Дмитрий Песков хэлэхдээ, "Энэхүү уулзалтыг маш хурдан зохион байгуулах шаардлагатай байгаа нь гарцаагүй" гэсэн бөгөөд Трамп ерөнхийлөгч Путинтэй уулзах хүсэлтэй байгаа гэдгээ удаа дараа албан бусаар мэдэгдсэн гэж онцолсон юм. Гэсэн хэдий ч хурдан хугацаанд, товчхон хэлэлцээ хийхийг эрхэмлэдэг Трампаас ялгаатай нь Орос илүү өргөн стратегийн яриа хэлэлцээ хийхийг шаарддаг. Тус улсын эрх баригчид мөн 2018 оны Хельсинкийн дээд хэмжээний уулзалтыг давтахаас зайлсхийх гэж хичээж буй. Учир нь тухайн үед талууд найрсаг харилцаатай байсан ч тодорхой шийдэл, тохиролцоонд хүрч чадаагүй байна.