Ерөнхийлөгчийг огцруулах асуудлын эргэн тойрон дахь тойм

Бие даагч гишүүд болон УИХ-ын гишүүн Г.Уянга нар өнөөдөр сэтгүүлчдэд мэдээлэл хийлээ.  Тэд “Гал үндэстэн холбоо”-ны тэргүүн Ц.Мөнхбаярт уучлал үзүүлэх хүсэлтийг Ерөнхийлөгчид илгээхээр болжээ.

Энэ талаар Г.Уянга гишүүн  “Татварын хэргээр буруутгагдаж байсан Жастан Капла нарын гурван хүнд Ерөнхийлөгч уучлал үзүүлсэн. Харин Ц.Мөнхбаяр бол улсад учруулсан хохирол байхгүй. Тиймээс энэ хүнд уучлал үзүүлэх ёстой” хэмээн байр сууриа илэрхийллээ.

Түүнчлэн Ерөнхийлөгчийн уг шийдвэр нь монголын шүүх, цагдаа, татварын байгууллагыг үнэгүйдүүлж байна гэдгийг онцолсон.  Тодруулбал, хэрэг  бүрэн шийдэгдээгүй байхад гол буруутнуудыг өршөөсөн байж боломгүй явдал гэж үзэж байгаа аж.  Тиймээс Ерөнхийлөгчийг Үндсэн хуулийн цэцэд өгөхөө мэдэгдлээ.  Тэр ч бүү хэл огцруулах асуудлыг хөндөнө гэсэн юм.

Мөн ЗГХЭГ-ын дарга С.Баярцогтыг огцруулах асуудлыг дахин тавих гэнэ.  Тэрбээр ЗГХЭГ-ын дарга С.Баярцогтыг огцруулах асуудлыг УИХ-д оруулж байсан ч гишүүдийн олонх дэмжээгүй юм

unen.mn

-Г.Уянга гишүүнд Ерөнхийлөгчийг огцруулах “боломж” бий юу?

УИХ-ын гишүүн Г.Уянга сүүлийн үед Ерөнхийлөгч Ц.Элбэгдоржтой үзэлцэх болсон. “Та тайлангаа огт тавьдаггүй. Таниас тайлан нэхдэггүй нь Таны аз юм” гэх мэтчилэн олны нүдэн дээр Ерөнхийлөгчид хандан шулуухан хэлээд авах хүн түүнээс өөр байсангүй.

Гэтэл тэрээр өчигдөр бүр Ерөнхийлөгчийг огцруулах асуудлыг өргөн барина гэдгээ мэдэгдлээ. Ерөнхийлөгч Ц.Элбэгдорж татвараас зайлсхийсэн хэргээр ял эдэлж байсан АНУ-ын иргэн Жастин Капла, Бүгд найрамдах Филиппин улсын иргэн Кристобал Ж.Дэвид, мөн улсын иргэн  Хилармон В.Кажуком нарт Монгол Улсын Ерөнхийлөгч уучлал үзүүлсэн юм. Үүнийг Г.Уянга гишүүн Үндсэн хуулийг зөрчсөн үйлдэл хэмээн тодорхойлж, үүнийх нь төлөө түүнийг огцруулах шаардлагатай хэмээлээ.

Г.Уянга гишүүн энэ асуудлыг Үндсэн хуулийн цэцээр хэлэлцүүлж, хэрвээ Үндсэн хууль зөрчсөн нь тогтоогдвол УИХ-ын чуулганд өргөн барина гэсэн.

УИХ ЕРӨНХИЙЛӨГЧИЙГ ОГЦРУУЛАХ ЭРХТЭЙ ЮУ?

Мэдээж тийм эрх бий. Монгол Улсын Ерөнхийлөгчийн тухай хуулийн долдугаар зүйлд:

1.Ерөнхийлөгч Улсын Их Хуралд ажлаа хариуцаж жил тутам үйл ажиллагааныхаа талаар танилцуулж байна.

2.Ерөнхийлөгч тангаргаасаа няцаж Үндсэн хууль, бусад хууль, Ерөнхийлөгчийн бүрэн эрхийг зөрчсөн тухай асуудлыг Улсын Их Хурлын нийт гишүүний гуравны нэгээс доошгүй нь албан ёсоор тавибал Үндсэн хуулийн гучин тавдугаар зүйлийн 2 дахь хэсэгт заасны дагуу Улсын Их Хурал хэлэлцэж Ерөнхийлөгчийг огцруулах эсэхийг шийдвэрлэнэ хэмээн заасан байдаг.

Тэгэхээр УИХ-ын гишүүдийн гуравны нэгээс доошгүй буюу 25-аас доошгүй хүний дэмжлэгийг Г.Уянга гишүүн авах шаардлагатай болох нь. Өчигдрийн түүний зарласан хэвлэлийн бага хуралд суусан гишүүдийг харвал бие даагч дөрөв лав түүнийг дэмжих нь. Нэмэгдээд өөр хэн хэн түүний талд орох бол?

gogo.mn

-Ерөнхийлөгчийг огцруулах эрх УИХ-д бий

Төрийн ордонд өнөөдөр УИХ-ын гишүүн Г.Уянга, С.Ганбаатар, Х.Болорчулуун, Ц.Даваасүрэн нар сэтгүүлчдэд мэдээлэл хийлээ. Энэ үеэр УИХ-ын гишүүн Г.Уянга “Гал үндэстэн холбоо”-ны тэргүүн Ц.Мөнхбаярт уучлал үзүүлэхийг Ерөнхийлөгчид хандан хүсэлт илгээнэ гэдгээ мэдэгдсэн юм.Тэрбээр хэлэхдээ “Бид Капла болон Ноён уултай асуудлаар идэвхитэй ажиллаж байсан. Ялангуяа Ноён уулыг хамгаалах асуудал олон нийтийн хөдөлгөөн болж өрнөсөнд их баяртай байна. Одоо энэ эрчээрээ цаашид явья. Монгол Улсын хэмжээнд 2000 орчим лиценз тараагдсан байхад бид ядаж нэг уулыг нь хамгаалаад аваад үлдэх эрх, хүч чадал байгаа гэж бодож байна. Ерөнхийлөгчид нэг асуудлаар хандах гэж байна. Гадны иргэд болох АНУ, Филлиппин улсын иргэдийг Ерөнхийлөгч өршөөлөө. Тэгвэл одоо Ц.Мөнхбаярыг суллаач ээ гэж хүсэх юм. Тэр хүн улсад ямар нэгэн бодит хохирол учруулаагүй. Харин ч олон нийт түүнийг суллаасай гэж бодож байгаа болов уу. Капла нарын хэрэг Монгол улсын шүүхийн дагуу эцэслэн шийдэгдээгүй байсан. Гэтэл Ерөнхийлөгч зарим нэгэн хуулийг зөрчиж уучлал үзүүлсэн байна. Монгол Улсын хуулийг зөрчин гадны ерөнхийлөгчийн хүсэлтээр иргэнийг нь өршөөж болж байгаа юм бол ард иргэдийнхээ хүсэлтийг үндэслэн Мөнхбаяр гэдэг хүнд уулчлал үзүүлэх байх гэж найдаж байна.

Үүнээс гадна Үндсэн хуулийн цэцэд хэд хэдэн асуудлаар хандах гэж байна. Үндсэн хуулийг зөрчин гадны иргэдийг өршөөсөн асуудал болон бусад үндэслэлээр, УИХ-аас Үндсэн хуулийн цэцэд хандан Ерөнхийлөгчийг огцруулах асуудлыг тавиач ээ гэсэн утгатай тогтоолын төслийг өргөн барихаар бэлтгэж байна. Хэрэв Ерөнхийлөгч Үндсэн хуулийг зөрчсөн нь тогтоогдвол Монгол Улсын Ерөнхийлөгчийг огцруулах хуулийн заалттай. Учир нь Монгол улс парламентын засаглалтай орон. Ерөнхийлөгчийн удаа дараа хууль зөрчсөн үйлдүүдийг таслан зогсоох эрх УИХ-д байгаа тул Монгол Улсын Ерөнхийлөгчийг огцруулах асуудлыг үүгээр эхлүүлж байгаа юм.

Мөн ашигт малтмалын тухай хууль Үндсэн хууль зөрчиж байгаа тул холбогдох заалтуудыг үндэслэн Үндсэн хуулийн цэцэд хандах болно” гэлээ.

shuud.mn