УИХ-д моод болоод буй нэр томъёоны тайлбар толь

1. Авилга – Эрхэм гишүүн бүрийн амны уншлага бөгөөд амтыг нь мартахын аргагүй “бялуу”-ны нэр. 2. Арвин – Их хурлын бөмбөрчин. Элбэгдоржийн засгийн газрыг огцороход ард түмэн түүнийг сайн бөмбөрчин гэж мэдэрсэн.

3. Ард түмний эрх ашиг – Гишүүн бүрийн хэлдэг үг боловч ихэнх нь утгыг буруу ойлгодог хүнд үг. Сонгуулийн өмнөх өдрүүдэд итгэлийн цэцгийг усалдаг амны уран борооны эрдэнийн дуслын нэг гэж болно.

4. Баабар – Их хурлын зарим гишүүдийг илт айлгадаг сахиусыг ингэж нэрлэнэ.

5. Бат-Үүл – Ардчилсан намын авралын амьд бурхны нэгний нэр. Тариаланчид түүний нэрийг 108 удаа дуудахад бороо ордог гэж сүсэглэдэг.

6. Байнгын хорооны хурал – Хуулийг гурилдах анхны дамжлагын нэр.

7. Батзандандах – Сүхбаатарын талбай дээр торх нүдэж эрх баригчдын зүрхэнд шар ус хуруулахыг хэлнэ.

8. Дэлхийн жишиг – Манай улстөрчдийн гадаадаас авчирдаг улс төрийн элдэв малгайны ерөнхий нэр. Ерөнхийдөө манай улс төрд томдсон малгай гэж болно.

9. Дэг – Хурлын дотоод журам гэсэн үг мөн боловч гишүүдийн уланд хэвтдэг хэрэггүй цаас.

10. Дэмжигчид – Аль нэг улстөрчөөс бялууны хишиг горьдсон жирийн олонлогийн хууль ёсны нэр.

11. Дэгсдүүлэх – Улс төрчдийн аман ярианы үндсэн хэлбэр.

12. Дэлхийн банк – Ядуу орнуудын хэлэн дээр нь чихэр, шилэн дээр нь хутга тавих замаар нөлөөллийн хүрээгээ тэлж байгаа их гүрнүүдийн мөнгө угаах цэг.

13. Гүндалайлах – Богино хэмжээний шог үзүүлбэр үзүүлж улстөрчдийн стрессийг тайлахыг хэлнэ.

14. Гөвшилцөх – Намууд зөвшилцөөд, дараа нь завшилцаад, эцэст нь заамдалцан үзэлцэхийг ингэж хэлнэ.

15. Мөрийн хөтөлбөр – Олон түмнийг ховсдон хөтлөх хөгжөөнт үйл ажиллагааны дараалал.

16. Мянганы сорилтын сан – Монголчуудын мөнгөний сэрлийг байнга өдөөгч бөгөөд зүс барааг нь Монгол хүн хараагүй байгаа лусын эрдэнэсийн сангийн нэр.

17. Мянганы зам – МАХН-ын бичиж эхлээд дутуу орхисон чулуужсан лоозонгийн тасархай.

18. Ногоон хэрэм – Говийн элсэн цөлд доллар тарьж ургуулах гэсэн гэнэн мөрөөдлийн нэр.

19. Ногоон нам – Ах намд тархиа соруулаад хоногоо хүлээж байгаа улс төрийн хүчин.

20. Намын бүлэг – Нэг намаас сонгогдсон УИХ-ын гишүүдийн хор найруулах хуйвалдааны тасаг.

21. Намын жигүүр – Суудлын өвчнөөр өвчлөгсдийн нам дотроо үүсгэсэн хагарлын нэр.

22. Зөвшилцөх – Намууд төрийн “бялуу”-г хувааж зооглох аргын нэр бөгөөд патентыг нь Изриалиас авчирсан гэдэг.

23. Завшилцах – Зөвшилцлийн нэг үе шат бөгөөд намууд “бялуу”-гаа тэнцүүхэн хувааж хүртээд сэтгэл хангалуун байх тун богинохон хормыг хэлнэ.

24. Засаглалын хомслол – Хэт намчирхсан төр засагт үүсдэг удирдлагын “өмөн үү” өвчний нэр.

Н.Даваадаш

2006.05.5 Тоншуул