Дэлхийн хэвлэлийн эрх чөлөөний өдрөөр улстөрчдөөс хэн нь “Цахим элч” болж хэн нь анти шагнал “Вирус”-ыг авах вэ?

Үндэсний сэтгүүлзүй үүссэний 100 жилийн ойн баяр хуучраагүй байна. Үүний араас давалгаалаад Дөрөв дэх засаглалынхны хамгийн их хүсэн хүлээдэг нэгэн тэмдэглэлт өдөр болох бөгөөд энэ нь сар гаруйн дараа буюу 5 дугаар сарын 3-нд болох Дэлхийн хэвлэлийн эрх чөлөөний өдөр юм. Монголын Сайтын Холбооноос энэ жилийн Дэлхийн хэвлэлийн эрх чөлөөний өдрийг “Цахим орон зай дахь үг хэлэх, үзэл бодлоо илэрхийлэх эрх чөлөө” нэрийн дор бүх уншигч, хэрэглэгчдийнхээ хамтаар тэмдэглэхээр ажлын хэсэг байгуулжээ. Энэ хүрээнд олон ажил зохион байгуулагдана. Тухайлбал, Монголд анх удаагаа цахим ертөнцийн дээд шагнал болох хүндэтгэлийн одон “Гурван дабль юу” /“www”/-г энэ салбарын хөгжилд үнэтэй хувь нэмэр оруулсан гадаад, дотоодын улс төр, нийгмийн зүтгэлтэн, бизнесийн байгууллага, салбарын шилдгүүдэд олгох юм. Мөн онлайнд хамгийн идэвхтэй зорчдог иргэд, хувь хүмүүсийг “Цахим элч”, сэтгүүлзүйн шилдэг бүтээл туурвигч, мэдээллийн технологийн шилдэг шийдлийг нэвтрүүлэгчдийг “Цахим эрх чөлөө” одонгуудаар шагнаж байхаар тогтлоо.

Энэ жилээс эхлэн цахим ертөнцийнхөн Дэлхийн хэвлэлийн эрх чөлөөний өдрөөр нэгэн сонирхолтой шагналыг уламжлал болгон олгож байхаар тогтсон нь Анти шагнал буюу “Вирус” одонгийн эзнийг зарлах явдал юм. Цахим ертөнцийн хөгжилд чөдөр тушаа болсон шийдвэр гаргагч, энэ салбарын түүхэнд хар толбо үлдэхээр алхам хийсэн эрх мэдэлтэн, албан тушаалтныг уншигч, хэрэглэгчдийн нээлттэй санал асуулгаар тодруулах ажээ. Анти шагнал “Вирус”-т нэр дэвшүүлэлт бүх нийтийн дунд нээлттэй явагдах бөгөөд хэрэглэгчид хэнийг, ямар үндэслэлээр нэр дэвшүүлж буйгаа чөлөөтэй илэрхийлнэ. Нэр дэвшүүлэлт 2013 оны 3 дугаар сарын 15-аас 20-ны өдрүүдэд болж, санал асуулга үргэлжлэн 5 дугаар сарын 1-нд дүнгээ гаргана.

Манай улсын хэвлэл мэдээллийн салбарт ийм “анти-номинаци”-ийн эзнийг тодруулж байсан түүх бий бөгөөд номинацийн эзнээр ЦЕГ-ын дарга асан, хурандаа Д.Мөрөн сэтгүүлчийг хорьсон үйлдлээрээ тодорч өөрийн улстөрийн имиджээ “Хэвлэлийн дайсан” хэмээх арилшгүй “цол”-оор хачирласан билээ. Энэ удаа харин Дэлхийн хэвлэлийн эрх чөлөөний өдрөөр улстөрчдөөс хэн нь “Цахим элч” болж хэн нь анти шагнал “Вирус”-ыг авах бол оо?

Б.Эрдэнэ