Ерөнхийлөгчийн ахад ял оноов

Өмнөд Солонгосын Ерөнхийлөгч Ли Мён Бакийн ах Ли Сан Дук өчигдөр шүүхээс хоёр жилийн хорих ял болон 750 сая вон /654 мянга орчим ам.доллар/-ы торгууль төлөх шийтгэл сонсчээ. Шүүх түүнийг их хэмжээний авлигын хэрэгт буруутай болохыг тогтоожээ. “Ёнхап” агентлагийн мэдээлснээр өдгөө 77 настай Ли Сан Дук 2007-2011 онд парламентын гишүүнээр ажиллаж байхдаа “Solomon Savings Bank”, “Mirae Savings Bank” хэмээх санхүүгийн асуудалд орсон хоёр банкнаас нийтдээ 750 орчим сая вон авч, хариуд нь Засгийн газрын дарамт, аудитын шалгалтаас чөлөөлсөн байна.