Огноо: 2013/1/14 23:29:59

“Ман Сити”-гийн 37 жилийн дараах ялалт

Премьер лигийн 22-р тойрогт учраа таарсан “Арсенал” болон “Манчестер Сити”-гийн тоглолт гранд дэрбигээс дутахааргүй тун сонирхолтой явагдлаа. Тоглолт тун санаандгүй үйл явдлуудаар эхэлсэн. А.Венгерийн итгэлийг хүлээн талбайд гарсан хамгаалагч Л.Кошьелни тоглолтын дөнгөж 10 дахь минутад улаан хуудас аван талбайг чөлөөлөв. Тэрээр довтлогч Э.Жеког 16 метрийн талбай дотор унагасан хэмээн үзэж шүүгч М.Дин эргэлзэх зүйлгүй улаан хуудас өргөв. Харамсалтай нь Э.Жеко торгуулын цохилтоо алдаж тооны харьцаа 0:0 хэвээр үлдсэн.

Тиймээс хүн дутуу үлдсэн “Их буучид” О.Чемберленийг суулган П.Мертесакерыг оруулж ирэн төлөвлөөгүй нэгэн солилцоог хийсэн. Харин хүний давуу байдалтай болж ирсэн “Манчестер Сити” 21 дэх минутад Ж.Милнер болон 32 дахь минутад оруулсан Э.Жекогийн гоолоор тоглолтыг хошуучилж эхэлсэн.

Тоглолт тун их алдаатай явагдаж нийт 29 алдаа гаран 6 шар, 2 улаан хуудас эзэндээ очсон. Харин нэг улаан хуудсыг нь бельги хамгаалагч В.Компани 75 дахь минутад хүртлээ. Түүний хувьд Ж.Уилшир руу хоёр хөлөөрөө жийж орсноор улаан карт авах шалтгаан байв. Үүний дараачаар К.Тевез хаалгачын эсрэг ганцаар гарсан ч тоог холдуулж чадаагүй. Улмаар Т.Уолкоттын Ж.Хартын хажуугаар цохисон бөмбөг орж явсан ч эцсийн мөчид Ж.Лэскотт багаа аварсан.

Ийнхүү ширүүн өрсөлдөөний эцэст “Манчестер Сити” гурван оноог зулгааж 48 оноотой хүснэгтийн 2-р байранд бичигдэж байна. Харин “Арсенал” 34 оноотой 6-р байрат хэвээр үлдсэн бөгөөд тэднийг дараа дараагийн тойрогт “Челси”, “Уэст Хэм”, “Ливеррпуль” гэсэн хүндхэн учраанууд хүлээж байна. Жеко энэ улирлын Преьер лигийн 10 дахь гоолоо оруулж, “Манчестер Сити” 37 жилийн дараа “Эмират” цэнгэлдэхэд ялалт байгуулж байна.

Статистик үр дүн:

Бөмбөг эзэмшилт: Арсенал 46%, Ман.Сити 54%
Хаалга чиглэсэн цохилт: Арсенал 9(4), Ман.Сити 17(10)
Булангын цохилт: Арсенал 2, Ман.Сити 7
Алдаа: Арсенал 11, Ман.Сити 18
Отон: Арсенал 3, Ман.Сити 2

Эх сурвалж: www.sportbox.mn