Халтиргаанд замын стандарт нөлөөлж байна

Нийслэлийн Захираг­чийн ажлын албаныхан энэ онд замын хал­тиргаа гулгаанаас хамгаалах давс, бодисын нөөц хангалттай байгаа талаар мэдээлж байсан. Энэ байдлаас болж иргэд бэртэж гэмтэх, зам тээврийн осол нэмэгдэж байгаа талаар Замын цагдаагийн газраас удаа дараа анхааруулах болов. Замын халтиргааг хэрхэн зохицуулж байгаа талаар нийслэлийн Хот тохижилтын газрын орлогч дарга Х.Норовоос тодрууллаа.

-Замын халтиргаа, гулгаанаас болж иргэд гэмтэх тохиолдол нэмэгд­сэн байна. Нийслэлийн зам талбайн цасыг цэвэрлэх ямар ажил хийж байна вэ?

-Нийслэлийн Хот тохи­жолтын газрынхан энэ жилээс Нарны зам, Энхтайваны өргөн чөлөө, Их тойруугийн автозамыг халтиргаа, гулгаанаас сэргийлэх бодис цацах ажлыг хариуцаж байна. Харин туслах зам болон харьяа дүүргийн зам талбайг тухайн дүүргйин ТҮК-иуд хариуцах болсон. Манай газрын хувьд үнд­сэн замууддаа өнгөрсөн арваннэгдүгээр сарын 6-наас эхлэн 50 орчим удаа 460 орчим тонн бодис, давс цацсан. Энэ нь өмнөх жилүүдийнхээс нэмэгдсэн хэмжээ юм. Өөрөөр хэлбэл, энэ жил хангалттай давс, бодисыг цацаж байгаа.

-Төв замыг цэвэрлэх давс, бодисын нөөц хан­галттай юу?

-Одоогоор төв замуу­дад давс цацаж байна. Манайд 170 тонн бодис оны өмнө Захирагчийн ажлын шугамаар ир­сэн. Үүнээс 50 хувийг нь хэрэглэчихсэн. Нэг удаа­гийн цацалтаар халтиргаа гулгаа ихэссэн, хялмаа хаях үед 10 гаруй тонныг цацдаг. Манайх өмнө нь Нарны замыг хариуцдаг байхад 50-60 тонн цацдаг байсан. Харин одоо бол давс, бодисын нөөц нэмэгдсэн. Энэ жил хангалттай цацаж байна. Өглөөний 05.00 цагаас зам дээр давсаа цацдаг. Халтиргаа гулгаанаас сэргийлэх 15 бригад ажиллаж байна.

-Халтиргаанаас болж гэмтэж бэртсэн иргэд танайх руу хэр хандаж байна. Хохирлоо бараг­дуулахад хаана хандах вэ?

-Нийслэлийн зам талбайд халтиргаа их байна, гар хөлөө хугаллаа гэх гомдол тасардаггүй. Тэд ихэвчлэн явган хүний зам болон дүүргийн ТҮК-иуд анхаарах ёстой газ­руудад гэмтсэн байдаг. Өнгөрсөн оны арван­нэгдүгээр сарын 12-нд нийслэлийн ИТХ-ын тогтоол гарсан. Байгууллага аж, ахуйн нэгжүүд өөрийн гаднах нийтийн эзэмшлийн 50 метр талбайг тохижуулах, мод тарих, халтиргаа гул­гаа­наас хамгаалах үүрэг­тэй. Явган хүн халтирч унахад харьяа дүүргийн ТҮК ха­риуцна. Гомдлыг нь ба­рагдуулах ёстой. Энэ үүргээ биелүүлээгүй тохиол­долд газар эзэмших зөвшөөрлийг цуцална. Иргэд ч идэвх санаачлагатай, анхаарал болгоомжтой нийтийн эзэм­шил газраар явах учиртай. Өөрөөр хэлбэл, иргэдийн оролцоо дэмж­лэг зайлшгүй шаардла­гатай байгаа юм.

-Харьяа дүүргийн зам талбайг ТҮК-иуд хариуц­даг гэлээ. Гэтэл энэ газ­раар иргэд гэмтэх то­хиолдол их байна. Танай байгууллагаас тухайн ТҮК-иудад шаардлага хүргүүлэх боломжтой юу?

-Дүүргийн ТҮК-иудад хог тээвэрлэлтэд гарч буй алдаа дутагдлын талаар манайхаас хандаж болдог. Учир нь манайхаас сан­хүүжилт олгодог. Харин халтиргаа, гулгааны талаар хандахад хэцүү. Тэд боломжоороо үйл ажил­лагаа явуулж байна, давс бодисоо цацаж байна гэдэг. Гэвч дотоод үйл ажиллагаа, хэрхэн хэч­нээн хэмжээний давс бо­дис цацаж байгаа талаар мэдэх боломжгүй. Хот то­хи­жилтын газраас шаард­­лага тавих меха­низм байхгүй.

-Замын халтиргаа гулгааны асуудал жил бүр хөндөгдөх юм. Энэ чиглэлээр гадаадын улс орноос үлгэр жишээ авч хэрэгжүүлэх талаар ямар саналтай байна?

-Гадаадын улсуудад энэ асуудал адилхан хөн­дөгддөг. Яахав, чийглэг уур амьсгалтай оронд замын хальтиргаа бага. Харин манай улс хүйтэн уур амьсгалтай учир хүндрэлтэй юм. Харин улсынхаа онцлогийг харгалзаж шийдвэрлэе гэвэл замын стандартад анхаарах ёстой. Ялангуяа явган хүний замын алаг хавтан дээр зуны улиралд ч халтирдаг шүү дээ.