Рокн роллыг анх удаа хиймэл дагуулаар цацжээ

Элвис Аарон Пресли 1935 оны энэ өдөр АНУ-ын Миссисипи мужийн Дорнод Тупелод төржээ. Тэрээр Америкийн дуучин, жүжигчин, хөгжимчин байв.

Түүнийг хүмүүс рокн роллын “Хаан” гэхчлэн нэрлэдэг. Пресли дуучин болох замналаа 1953 онд эхэлж, кантри, ритм, блюзийг рок хэв маягт оруулсан хэлбэртэй дуунуудаа олны хүртээл болгож эхэлсэн байдаг. Хар, цагаан арьстнуудын дуу хөгжмийн элементүүдийг хослуулж чадсан тэрээр тайзан дээр биеэ авч явах этгээд араншин, гайхалтай авьяасаараа ихэд алдаршсан юм.

1960-аад онд Пресли өөрийн 31 киноны ихэнхийг бүтээсэн бөгөөд тэдний ихэнх нь санхүүгийн хувьд ихээхэн амжилттай мюзиклууд байв. 1973 онд Пресли анх удаа хиймэл дагуулын тусламжтайгаар олон оронд шууд дамжуулсан концертоо тоглож түүнийг нь дор хаяж нэг тэрбум хүн шууд үзсэн тооцоо байдаг.

Тэрээр хөгжмийн түүхэнд хамгийн амжилттай, хамгийн их нөлөө үзүүлсэн хүмүүсийн нэг билээ. Харамсалтай нь Элвис зүрхний өвчин, мансууруулах бодисын дон болон бусад шалтгааны улмаас дөнгөж 42-хон насандаа нас нөгчжээ.

Г.Хишигт

/Нийгмийн Толь/