“Press Photo-2012” эхэллээ

Монголын гэрэл зурагчдын дунд зохион байгуулдаг “Press Photo-2012” шилдэг гэрэл зураг шалгаруулах уралдаан энэ сарын 1-ээс эхэллээ. Уралдаанд оролцох бүтээлүүдийг энэ сарын 10-ны өдрийн 18.00 цаг хүртэл хүлээн авах аж. Уг уралдааныг “Монголын Үндэсний гэрэл зургийн танхим”, “Mongolаin Photo News”  сэтгүүлээс эрхлэн хоёрдахь жилдээ мэргэжлийн болон гэрэл зураг сонирхогчдын дунд зохион байгуулж буй.Үүнд өнгөрөгч 2012 онд Монгол Улсад болж өрнөсөн үйл явдлыг гэрэл зургийн хэлээр чадварлаг, өгүүлэмжтэй, харуулж чадсан, эвлүүлэлггүй зургуудаас шалгаруулах бөгөөд оролцогчид таваас доошгүй гэрэл зургийг эх хувийг нь CD/DVD хэлбэрээр ирүүлэх юм байна. Мөн өөрийн нэр хаяг, бүтээлд тохирсон цөөн өгүүлбэртэй тайлбар, хураамжийн 10 мянган төгрөгийн хамт “Монголын үндэсний гэрэл зургийн танхим”-д ирүүлэх юм байна. “Press Photo-2012”гэрэл зургийн уралдааны үзэсгэлэнг Төрийн Хүндэтгэлийн ордонд нээж, шилдгээ шалгаруулна. Үзэсгэлэнд тавигдсан бүтээлийг нэг сарын турш олон нийтэд чөлөөтэй дэлгэн үзүүлэх гэнэ.

Шилдэг гэрэл зургийн эзнийг MCS группийн CANON  төв ийн мэргэжлийн аппарат болох “Canon 5D Mark II”-оор урамшуулах аж.

Уралдаанд ирүүлэх бүтээл нь:

-Байгаль, хүрээлэн буй орчин

-Улстөр, үйл явдал

-Соёл урлаг

-Спорт

-Нийгэм гэсэн таван төрлийн аль нь ч байж болох бөгөөд дээрх төрөл тус бүрт тэргүүн байр, Гранпри шагналын эзнийг шалгаруулж ивээн тэтгэгчийн шагнал олгох юм байна.

Б.МАРАЛ