Даргыгаа аварч, дээдсийг айлгах төлөвлөгөө

МАХН-ынхан сүүлийн өдрүүдэд эвслийн Засгийн газ­раас гарах тухай шуугиан дэг­дээгээд тун завгүй байна. Уг нь тэд “Төрийн ажлаас намын бодлогоо тэргүүнд тавь­сан МАН ичиг, ичиг” хэ­мээ­сээр парламентын даргаа сонгож байсан нь сая­хан.
Гэтэл өдгөө өөрсдөө намын даргаа аврах төлөв­­лө­гөөгөө хэрэг­жүү­лэхийн тулд хамтарсан Засгийн газ­рын суурийг ган­хуулж, Ерөн­хийлөгчийг шан­­­таа­жилж эхэллээ. Үүний­гээ батлах гэсэн шиг өчиг­дөр МАХН-ын дэд дарга “Бид засгаас гар­сан тохиолдолд дараа нь улс­төрийн тогтворгүй бай­дал үүсвэл “Шударга ёс” эв­сэл хариуцлага хүлээхгүй.

Эрхэм Ерөнхийлөгч та, монгол түмний эв нэгдэл, тус­гаар тогтнолыг илэр­хий­лэгч учраас гарах үр дагаврыг хариуцаарай” гэх утгатай мэдэгдлийг хийсэн. Үүнийхээ дараа тэрбээр өчигдөр эвслийн нэгээ­хэн хэсэг болсон МҮАН-ын төлөө­лөл буюу УИХ дахь бүлгийн дарга Н.Батцэрэгтэй зөвшил­цөхөөр болов. Харин өнөөдөр Ерөнхий сайд Н.Алтан­хуягийг Киркизээс ирэ­хээр нь уулзаж, ярилцана гэсэн.
Үнэндээ тэдний хоног хуга­цаагаар алгуурлан буй энэ­хүү уулзалтууд намын дарга Н.Энхбаярынхаа асууд­лаар барьцаа үүсгэхийн тулд Засгийн газарт орсон гэдгийг илэрхийлсээр байгаа юм.
Учир нь МАХН-ынхан Засгаас гарах тухай яриатай зэрэгцэн “Шударга ёс” бүлгийн хувь заяа ч хэрхэх нь сонирхол татаад байгаа. Гэхдээ Ж.Батзандан нарын ги­шүүдийн хэлж, ярьж буй шиг МАХН Засгаас гарсан ч намын жагсаалтаар парламентын гишүүн болсон нөхдийг эргүүлэн татах тухай хуулийн заалт байх­гүй. Тиймээс “Шударга ёс” эвслийнхэн дотооддоо хагаралдаж, засгаас гарвал УИХ-ын гишүүн хэвээр байх хэдий ч парламент дахь бүлэг нь задарч, хүчин мөхөс­­төнө.
Тэгээд ч хоёр нам хан­цуйдаа наймаалцан байж, “Шударга ёс” эвслийг  байгуу­лахдаа найман жилийн гэрээ хийсэн. Ердөө л шударга ёсыг тогтоохын төлөө гэх утга, зорилготой гэдэг. Өөрөөр хэлбэл, тэрхүү гэрээнд Засгийн газарт хамт­рах хийгээд, замын дундаас буцвал хэн нэг нь хариуц­лага хүлээх тухай заагаагүй. Гэхдээ тэд зөв­шил­цөж чадвал эвслийн Засгийн газраас МАХН гарсан ч “Шударга ёс” бүлгээ задлахгүй үлдэх бас нэг боломж бий.
Тэгсэн ч нэмэргүй. Нэгэнт Засгийн газраа байгуулахдаа АН, ИЗНН, “Шударга ёс” эвсэл гэсэн гурван субъект оролцож, гэрээ байгуулсан. Тэгэхээр МАХН ичсэндээ энэ хэвээрээ буруу ишилсэн сүх шиг гүрийвэл Засгийн газар 100 хоногийн төрсөн өдрөө дурссаар тарахаас аргагүйд хүрнэ.
Үүнийг мэдэж байгаадаа МАХН их зан гаргаж, даргыг нь шүүх хурлын өмнөх залиа хэрэглэж байгаа ажээ. Харин МҮАН-ынхны хувьд лаа, лууван хоёрын алийг  идэх вэ гэдэгт гацсан биз. “Галууг дуурайж, хэрээ хөлөө хөл­дөөх”-ийн үлгэр бололтой биш гээд үлдье гэх нь ээ ги­шүүдийнх нь тоо хүрэхгүй. Дагаад намир­чихъя гэхээр зас­гаас гарч, эрх мэдэлгүй бо­лохын зэрэгцээ бүлэггүй болж хүчин мөхөстөнө. Тиймээс хүнийр­­хүү зангаар хөнд­­­лөн­­­гийн ажиг­лагчийн байр суу­ринаас хандаж байгаа хэ­рэг.
Ямартай ч МАХН-ынхны өнөө­дөр Ерөнхий сайдтай хийх уулзалтаас аливаа шийд­­вэр гарахгүй гэдэгт улс­төр сонирхогчид мөрий­цө­хөд ч бэлэн байна. Яагаад гэ­вэл, эндээс ямар нэгэн ший­­дэл гарахгүй. Харин ч мар­гаашийн шийд­вэрээс шалт­­гаа­лан да­раагийн алхмаа хийх гэнэ.
Тэгэхээр эрхэм экст оногдуулсан ялыг Дээд шүүхээс хэвээр баталчихвал МАХН ичихдээ “Улстөрийн хэлмэгдүүлэлт боллоо” гэдэг шалтгаар Засгаас гарна гэж зүтгэнэ. Даргыг нь яллаж явуулчихаад, “даамлуудтай” нь хамтрах ичгэвтэр учраас АН-ынхан ч тэднийг гуйхгүй л болов уу. Далд утгаараа даргаа аврахын тулд  дээдсийг айлгах МАХН-ын төлөвлөгөө хэрэгжихэд даанч төвөгтэй болох бололтой.

Эх сурвалж: “Өглөөний Сонин”