Зарим нутгаар шөнөдөө 40 хэм хүрч хүйтэрнэ

Нийт нутгаар хүйтний эрч эрс чангарах аж. Өнөөдрөөс зарим газраар, маргааш нутгийн зүүн хагаст, найманд зүүн зү­гийн нутгаар бага зэргийн цас орж, цасан шуурга шуурна. Салхи энэ үеэр говь талын нутгаар секундэд 12-14 метр хүрч ширүүсэх төлөвтэй байна. Хүйтний эрч эрс чангарч, Дархадын хотгор, Хараа, Ерөө, Туул, Хэрлэн, Онон, Улз, Халх голын сав газраар шөнөдөө 35-40, өдөртөө 23-28, Алтайн өвөр говь болон говийн нутгийн баруун хэсгээр шөнөдөө 19-24, өдөртөө 9-14, бусад нутгаар шөнөдөө 27-32 хэм, өдөртөө 15-20 хэм хүйтэн байх ажээ.

Гэхдээ сарын сүүлээр нутгийн баруун хагаст хүйтний эрч сулрах юм байна. Өнгөрсөн хоногт орсон цасны улмаас баруун айм­гуудад нэлээд зам, даваа хаагджээ. Тухайлбал, Баян-Өлгий аймгийн нутаг дэвсгэр дэх Буратын даваа хаагдаж, Улаанбаатараас явж байсан “sonata-6” маркийн машин цасанд суусныг, Говь-Алтай аймгийн Дөтийн даваанд “УАЗ-469” маркийн автома­шинтай хоёр хүн замын хажуу руу орж цасанд суусныг аймгийн Онцгой байдлын хэлтсийн алба хаагчид ухаж гаргасан байна.

Эх сурвалж: “Өглөөний Сонин”