МАХН-ынхны мунхаглал

МАХН-ын дарга Н.Энх­баярыг  дөрвөн жил нааран дээр зүүдэлж хэвтэх үү, нар­ны гэрэлд найраа хийж явах уу гэдгийг Улсын дээд шүүхээр хэлэлцэн ший­дэхийн өмнөхөн Монгол Улсын Засгийн газрыг бутар­гах шийд­вэрийг МАХН-ын Гүй­цэт­гэх товчоо мунхаглан гар­гажээ, янз нь. Мөхөс би муйхарлан бодоод  үүнээс илүү “гэнэн мун­­хаг­­лал”, олноороо ухаан санаанд нь ухна унаж ма­жийсан тэнэглэл байхгүй гэж  баттай итгэсэндээ энүүх­нийг тэрлэж сууна.

МАХН-ын Гүйцэтгэх товчоонд төрийн сайдаас эхлээд УИХ-ын байнгын хорооны дарга, эр­хэм гишүүд, дэд сайд гээд гадаад, дотоодод ном үзэж, ногоотой шөл биш­­гүйдээ зооглосон 25 эрхэм багтдаг сурагтай. Тэр хүмүүсийн оюуны мэлмий яахаараа 25-уулаа зэрэг хааг­даж,  намын даргыг нь эрх чөлөөтэй бол­гох эрх мэдэл УИХ, Засгийн газар, Ерөн­хий­лөг­чид байгаа гэдэгт итгэдэг хэрэг вэ.

УИХ, Засгийн газар, Ерөнхийлөгч Ц.Элбэгдорж нар Монгол Улсын хууль, шүүхээс дээгүүр жаалах эрх мэдэл­тэй байсан бол эдгээр 80 гаруй эрхэм өөр ямар ч ажил хийлгүй өдөр бүр хэн нэгэн ялтанд өршөөл үзүүлэх зарлигт гарын үсэг зурсан  шигээ суух байсан байл­гүй. Тэгээд яах вэ дээ. Монгол Улс амар сайхандаа жаргаж, өргөст торны цаана өрвийж суудаг хоригдолгүй болж, дэлхий дахинд “Ганц ч ялтангүй, гял цал болсон орон” гэж тунхаглагдах байсан нь тодорхой.

 
Хэрвээ УИХ, Засгийн газар, Ерөнхийлөгчид шүүхийг захирдаг эрх мэдэл бай­­сан бол ямар гээч аюул үүсч болохыг төсөөлөн бод­сон чинь ээ бүү үзэгд. Толгойны үс арзайж, нуруун дээ­гүүр морин шор­гоолж­нууд  яз­га­нан гүйлдэх шиг л боллоо. Хэнбугайгаас ч хараат бус, шүүх засаглал оршин бай­гаа, оршсоор ч байх нь төр, улсын минь аврал бус уу.

Аймаг орон нутгийнхаа төсвөөс хэдэн зуун саяар нь хулгайлаад залгичихсан засаг ноёд, төрийн  тэрбум  төгрөгийг өөрийнхөө нэр дээр банкинд хадгалчихаад  гэмгүй царайлаад малилзаж яваа дарга нар, улсын нууцыг урагш, хойш нь хил давуулаад худалдчихсан урвагчид, газар нутгаас маань худалдаад идчихсэн нүгэлт­нүүдэд тохирсон ял шийт­гэлийг нь эдлүүлсээр байгаа шүүх засаглал хам­гийн их эрх мэдэлтэй, хэнээс ч хараат бус байх ёстой.

Аль нэг улстөрийн хүчин гарч ирэхээрээ л газар даа­хааргүй  нүгэл үйлдсэн дарга, албан тушаалтнуудаа өмөөрч, хошуу унжуулан цор цор хийж, “Манай тэр даргыг даруйхан суллаж явуул. Хэдхэн тэрбумыг  хул­гайлаад идчихээ л биз. Юун сүртэй юм. Хорхойд хоргүй  даргыг минь одоохон цагаатгахгүй бол  бид УИХ-ыг тарааж, Засгийн газрыг чинь будаа болголоо” гээд гонгиноод эхэлбэл бид ер нь яах вэ.

Ёстой л нөгөө “Буруу эрхэлсэн хүүхэд бухын хүзүүнээс хатуу” гэдэг  нь л болоод байна. Хахир өвлийн хүйтэн ид тачигнаж, зуд турхан нүүр­лээд ядаж байхад дулаан байранд нозоорч суудаг  МАХН-ын  Гүйцэтгэх тов­­чооны 25 дарга мөн ч цагаа олж мунхаглах юм даа. Зуны дэлгэр цагт ингэж мунхагласан бол “Аа нөгөөдүүл чинь наранд цо­хиулаад мэнэрчихэж” гэж бодоод нэг удаа тоох­гүй өнгө­рүүлэхсэн. Аль эсвэл оюун ухаан нь зад хөлд­чихсөн юм болов уу.

Н.Алтанхуягийн тол­гойл­сон  Засгийн газар тарснаар улс оронд тогтворгүй байдал үүсвэл МАХН хариуцлага хүлээхгүй гэж мэдэгдэж суух юм. Даргыгаа шоронгоос суга татан гаргаж, ачийг нь хариулах үнэнч зүтгэлийг нь үнэлдэг юм гэж бодоход хоёр сая долоон зуун мянган хүний эрх ашиг, бүхэл бүтэн төр, улсын өмнө хүлээх үүрэг хариуцлагаа ганц хүнийг аврах асуудлаар арилжаалж байгааг нь яагаад ч хүлээн зөвшөөрч болохгүй.

Байгуулагдаад 100 хо­ногийн баяраа тэмдэглэсэн шинэчлэлийн Засгийн газрын мөнгө  санхүүг базаж суугаа Ч.Улаан сайд уржигдархан л “Бид дэлхийн зах зээлээс 4.125 хүүтэй 1.5 тэрбум ам доллар босгож чадлаа. Чингис бондоороо төмөр замаа тавиад, Сайншандын аж үйлдвэрийн цогцолбороо эхлүүлчихнэ. Нүүрс, нефтиэ дотооддоо боловсруулж, зэс хайлуулах, төмөрлөгийн үйлдвэрүүдээ босгочихно” хэмээн сайхан үлгэр ярьж билээ.

Харин тийм сайхан мөрөөдөл ярьж суусан хүн өнөөдөр засгаа нураахаар хуйвал­даж суух ч гэж. 100-хан хоног зуузай холбох бай­сан юм бол засаг бай­гуулж тоглох хэрэг юусан билээ. Монголын улстөрийн “хахир өвгөн” УИХ-ын гишүүн Ц.Нямдорж  АН, “Шударга ёс” эвслийн хам­тар­сан Засгийн газар ажлаа дөн­гөж эхэлж байхад “Та нар харж л байгаарай.

Удах­гүй эд энэ засгийг нураа­гаад гарна даа. Хэнтэй ч нийлж, яаж ч урваж, шар­важ мэдэх үл бүтэх амьтад. Би Н.Алтанхуяг Ерөнхий сайдыг өрөвдөж байна” хэ­­мээн ёозгүй муу амлаж билээ. Тэр үед “бэлгэ дэм­бэрэл­гүй, муу амтай гэдэг нь” хэмээн их багагүй нүд үзүүрлэж байв даа. Харин одоо “пээ бурхан минь. Ц.Ням­дорж чинь далдыг хардаг далай лам юм байна” гээд мөргөх нь хол­гүй юм болох байлгүй. Хачин ч юм их л үзлээ.

Харин энэ удаагийн МАХН-ынх шиг мун­хаглалыг л хараагүй, үзээгүй л санаг­­дах юм. Мунхаглал аа гэж.
Эх Сурвалж: “Өглөөний Сонин”