ЖЭКИ АМЬД

“Жэки Чаны бие гэнэт муудаж, Лос-Анжелес хотын эмнэлэгт хүргэгдэн, тэндээ зүрхний шигдээсээр нас барсан гэх мэдээлэл www.myvisitingcard. com тэргүүтэй хэд хэдэн цахим хуудсанд гарсан нь шүтэн бишрэгчид төдийгүй хэвлэлийнхнийг сандаргаад амжсан. Тэгвэл энэ мэдээлэл ташаа болохыг жүжигчний менежерүүд өчигдөр албан ёсоор мэдээллээ.

Түүний Facebook-т “Жэки эсэн мэнд төдийгүй биеийн байдал нь тун сайн байгаа. Зүрхний шигдээсээр нас барсан гэх мэдээлэл ор үндэсгүй бөгөөд интернэтэд тарсан мэдээлэл худал болохыг албан ёсоор мэдэгдэж байна. Тэр одоогоор киноны зураг авахуулаад тун завгүй байгаа” гэжээ. Түүнчлэн Жэки Чан Японд ажиллаж байгаа тухай мэдээлэл бүхий бичлэгийг байрлуулж, Японы үзэгчидтэй уулзалт хийж байгааг харуулсан зургийг тавьжээ.

Монголчууд эсэн мэнд байгаа хүнийг нас барсан гэж зүүдэлбэл мөнхрөх нь хэмээн бэлгэшээдэг. Дэлхийн мянга мянган үзэгчийн хайртай жүжигчнийг нас барсан гэх цуу яриа гарсан тул “Жэки Чан мөнхөрлөө” гэх фэнүүд ч цөөнгүй байгаа бөгөөд тэд энэ сэтгэгдлээ түүний Facebook-т нь бичиж үлдээжээ.

БЛИЦ Овог, нэр: Кон-сан Чан (“Хонконгод төрөв” гэсэн утгатай)

Төрсөн он, сар, өдөр: 1954.04.07

Төрсөн газар: Хонконгийн Викториа Пик хот

Биеийн өндөр: 174 см

Facebook хаяг: http://www.facebook.com/ jackie

Дуртай кино: “Салхинд туугдагсад”, “Бороон дунд дуулнам”, “Матрикс”.