Арнольд Шварценеггер: Аав минь намайг байнга зоддог байсан

Бодибилдингийн тамирчин, Холливудын нэрт жүжигчин, улстөрч Арнольд Шварценеггерийн “Ici Paris” хэвлэлд өгсөн ярилцлагыг орчуулан хүргэж байна. Дашрамд дурдахад тэрбээр саяхан НҮБ-ын сурвалжлагчдын нийгэмлэгээс олгодог “Дэлхийн иргэн” шагналыг хүртсэн юм. Энэ шагналыг хүрээлэн буй орчныг хамгаалах, дэлхийн дулааралтай тэмцэх ажилд үнэтэй хувь нэмэр оруулсан хэмээн түүнд олгожээ.

-Та “Бүхнийг дурсахуй. Миний амьдралын итгэ­мээргүй үнэн түүх” хэмээх дурсамж номондоо ам­жилтынхаа нууцыг бүрэн дэл­гэж чадсан гэж бодож байна уу?
-Тэгэлгүй яах вэ. Энэ ном хүмүүст яаж амжилтад хүрэхийг сургах байх аа гэж би бодож байна. Хэрвээ хүн мөрөөдөлтэй, түүндээ итгэдэг бол боломжгүйг ч хийж чаддаг юм.
Харин хүсэл мөрөөдөл нь хэр том бэ гэдэг л гол асуудал. Жи­жигхэн төлөвлөгөө гар­гаад, зорилгодоо илүү хялбар замаар хүрч болно л доо. Эндээс та аз жаргалаа олж авах нь л чухал.
Би мөрөөдлөө бие­лүүлэхийн төлөө хоногийн 24 цаг ажилладаг байсан. Эцэг эх маань намайг ийм байхад галзуурчихаж гэж боддог байлаа.
-Энэ номыг бичихэд юу нөлөөлөв?
-Ном бичихийн тулд цаг хуга­­цаа хэрэгтэй байсан. Бас хүмүүст хэлчихмээр түүх надад байхгүй гэж олон жилийн турш боддог бай­лаа.
Харин Калифорнийн амбан захирагчаар долоон жил ажилласныхаа дараа цаг нь иржээ гэж бодсон. Хам­гийн азтай нь би зохиолч­той хамт ажилладаг байсан бөгөөд тэр надад дурсамжаа бичихэд тусалж, эцэг, эх­тэйгээ харьцах нарийн ширийн харилцааг ч гаргаж өгсөн.
Миний бага нас тийм ч аз жаргалтай өнгөрөөгүй ээ. Хүнд нөхцөлд өссөн. Аав маань намайг үргэлж зоддог бай­лаа. Аав архи уусан үедээ хүүхдүүддээ хатуу ханддаг байсан ч маргааш гэхэд огт өөр хүн болчихдог байв.
Гэр бүлийг минь сүйтгэсэн тэр их хэрүүл шуугианыг үгээр илэрхийлэхийг хи­чээдэг байлаа. Миний хувьд энэ нь маш хэцүү зовлон бай­сан юм.
Энэ номоороо амьд­ралын­хаа сайхан үеүдийг тө­дийгүй алдаа дутагдлаа ч гаргахыг зорьсон. Ном бичих үнэхээр хэцүү хэрнээ сонирхолтой юм билээ.
-Одоо та эхнэр Мария Шрай­вертайгаа ямархуу харилцаатай байна даа?
-Энэ асуултад яг жин­хэ­нээсээ хариулж чадахгүй нь. Хэдийгээр бид салсан ч ойр дотны хүмүүс болж үлдэж чадсан. Бид хүүхдүүдээ эв найртай өсгөж, хоорондоо ямар ч “дайн” зарлахаа больсон.
Бид хоёрын харилцаа хүүхдүүдэд минь бага нөлөөлөөсөй гэж бодон, боломжтой бүхнийг хийхийг хичээж байна. Тэд маань хичээл зүтгэлтэй, аливааг өөрөө хийх гэсэн  оролдлого-той болсон. Тухайлбал, сайн үйлс бүтээдэг болжээ. Бид тэднээрээ бахархаж байна.
-Та амжилтын нууцыг сайн мэддэг юм чинь хям­ралаас гарах гарцыг ч мэдэж байгаа байх. Өдгөө энэ асуудал хүн бүрийг зовоож байгаа?
-Би амбан захирагчаар ажиллаж байхдаа мужаа хямралаас гаргаж чадаагүй шүү дээ. Тиймээс энэ асуултад би маш муу зөвлөгч болно биз.