Манай улсад дэлхийд өрсөлдөхүйц өндөр цамхаг сүндэрлэнэ

Аливаа улс оронд өндөр байшин барилгууд өнгө үзэмж талаасаа ч тэр өнгө төрх, сүр хүчийг нэмдэг билээ. Тун удахгүй Монголын түүхэнд алтан үсгээр бичигдэх өндөр цамхаг сүндэрлэх гэж байна. Энэхүү ажлыг “Эм энд Жи” констракшн Виталла групптай хамтран гүйцэтгэх аж. Уг цамхаг 300 метр өндөр байх аж. Харин цамхагийг “Шонхор” хэмээн нэрийдэхээр болжээ. Зүй нь монголчууд бид саяхан шонхор шувууг үндэсний бахархлаа болгон зарласан билээ.

Харин цамхагийг барих төслийг аялал жуулчлал, амралт цэнгээн болон үзвэр үйлчилгээний салбарт тэргүүлэгч олон улсын үл хөдлөх хөрөнгийн бизнес эрхлэгч, менежер болон зөвлөхүүдээс бүрдсэн Виталла групп зөвлөх болон хянах үүрэг гүйцэтгэж, “Эм энд Жи” констракшн хийж гүйцэтгэхээр болсон байна. “Шонхор цамхаг, Усан парк, Спортын цогцолбор” хэмээн нэрлэсэн уг төслийг олон төрлийн спорт цогцолбор, үзвэр үйлчилгээ, эрүүл мэндийн үйлчилгээ, задгай болон битүү байгууламж бүхий усан парк, гэр бүлээрээ амралт чөлөөт цагаа өнгөрүүлэх томоохон төв байхаар зураг төслийг нь гаргажээ. Төслийн бүх бүрэлдэхүүн хэсэг болон үзвэр үйлчилгээг жилийн дөрвөн улиралд цаг уурын ямар ч нөхцөлд үзүүлж байхаар төлөвлөсөн байна. Виталла групп нь олон улсын мэргэжилтнүүдээс бүрддэг аж. Тэд ийнхүү цамхаг барих бэлтгэл ажилдаа ханцуй шамлан ороод байна.

Түүнчлэн “Эм энд Жи” констракшн ХХК нь 120.000-150.000 метр квадрат задгай орон зайг ашиглан тухайн төслийг хэрэгжүүлж болохуйц хэд хэдэн талбайд үнэлэлт, дүгнэлт өгөөд байгаа гэнэ. Төслийн хувьд, 100 хувь манай улсын эзэмшил байх бөгөөд нийслэлийн хүн амын 1.000-1.200 цоо шинэ ажлын байрыг бий болгох гэнэ. Цамхаг болон эргэн тойрны тохижуулалтын төсөв 200-250 сая ам.доллар байх төлөвтэй байгаа гэнэ. Манай улсын хувьд цоо шинэ аж үйлдвэрийн эхлэл тавигдаж байгаа төдийгүй энэхүү төсөл нь Улаанбаатар хотын хувьд татварын шинэ орон зайг бий болгож, байнгын болон цагийн ажлын байруудыг бий болгоно гэдгийг тус констракшны төлөөллүүд ярьж байлаа. Виталла группын техник эдийн засгийн судалгаанууд болон бусад судалгааны хөтөлбөрүүд 2013 оны тавдугаар сар гэхэд дуусах аж. Харин төслийн барилга байгууламжийг 2-3 жилийн хугацаанд барьж гүйцээхээр төлөвлөсөн байна. Ийнхүү дэлхийд Монголын нэрийн хуудас болох тус цогцолборыг 2016 оны зун нээнэ гэсэн тооцоог гаргажээ.

Уг цамхагт болон эргэн тойронд байрлах цогц төвүүдийг “Эм энд Жи” констракшны зүгээс доорх байдлаар танилцуулсан юм.

УСАН ПАРКИЙН ЦОГЦОЛБОР

Усан аялал, завьны уралдаан, усан спорт сургалтын төв болон төрөл бүрийн насны ангилал, адал явдал бүхий усанд сэлэлтийн заал, гулсуурууд энд тэндгүй байрлаж, цагийг зугаатай өнгөрүүлэх бүхий л боломжийг хангана. Усан, хөөсөн партиг зохион байгуулж, улирлаас үл хамааран арьсаа борлуулах, наранд шарах үйлчилгээнүүдийг үзүүлнэ. Зуны улиралд дээвэр нь нээгдэх байдлаар ил, задгай усан парк болно.

МӨСӨН ПАРКИЙН ЦОГЦОЛБОР

Мөш том мөсөн гулгуурын талбайд хүүхэд залуус өвөл зуны аль ч улиралд дураараа гулгах боломжтой ба мөсөн хөшөө хийх үзүүлбэр, төрөл бүрийн тэмцээн, мөсөн кафе зэрэг байрлана. Бэльэтаж буюу хагас дугуй хэлбэртэй дээд давхарт түргэн хоолны газар, уран гулгалтын хувцас хэрэглэлийн дэлгүүр, кофе, шейк хаус зэрэг байрлана.

АВТО ЗОГСООЛ

Ил болон газар доорх авто зогсоол нь харуул хамгаалалттай, зогсоолоос шууд паркийн талбай руу орж болохоор төлөвлөгдсөн байгаа.

СПОРТ ЗААЛ

Спортын төрөл бүрийн арга хэмжээ, уралдаан тэмцээн зохион байгуулах заал, сургалтын танхимыг тохижуулсан бүрэн спорт цогцолбор байна. Мөн тамирчид болон дасгалжуулагчид нарт зориулсан амралтын өрөө, душ зэрэг бүрэн шийдэгдсэн байгаа.

СПОРТЫН ЗАДГАЙ ТАЛБАЙ

Хөлбөмбөг, сагсанбөмбөг, тал­байн теннис, гүйлт, мини гольф зэрэг спортын задгай талбайг төлөвлөсөн байгаа.

КОНЦЕРТ ЗААЛ

Янз бүрийн театрчилсан тоглолт, сонгодог болон орчин үеийн дуурь, бүжиг, жүжиг, симфони оркестр гэх зэрэг тоглолтууд тавигдах дээд зэрэглэлийн үзвэрийн танхимтай байна. Эдгээр нь бэлтгэлийн болон жүжигчдийн амралтын өрөө, ресторан зэргээс бүрдэж байгаа.

АЛСЫГ ХАРДАГ ЦАМХАГ

Шонхор цамхаг нь нийт 60 давхар тул Улаанбаатар болон түүний эргэн тойронд байрлах байгалийг бүхэлд нь тольдох гайхалтай алсыг харах тавцан байрлах ба, задгай болон дотор гэсэн хэсгүүдээс бүтнэ. Мөн од мичдийг тольдон харах дуран байрлах ба одон орон сонирхогчдын хувьд хамгийн таатай орчин байна.

САУН, МАССАЖ, ҮСЧИН ГОО САЙХАН

Алжаал тайлах томоохон төв байрлах ба дээд зэрэглэлийн спа, төрөл бүрийн массаж, цэцэгсийн ванна, саун зэрэг төвийг үсчин гоо сайхны газрын хамт иж бүрнээр нь төлөвлөсөн.

БОУЛИНГ

Төрөл бүрийн зэрэглэлтэй боулинг клуб ажиллаж, тэмцээн уралдаан зохион байгуулах, байгууллага хамт олноороо цагийг хөгжилтэй өнгөрөөх боулингийн төвийг төлөвлөсөн байгаа.

ГАЛЕРЕЙ

Төрөл бүрийн зураг, фото зураг, баримал зэрэг урлалын үзэсгэлэнгүүд гарч сонирхогчдын нүдээ хужирлах, худалдан авалт хийх хамгийн шилдэг төв болно.

МУЗЕЙ

Үндэсний уламжлалт, үнэт зүйлсийг хадгалсан музей нь насны ангилал, улирал харгалзахгүйгээр ажиллана.

КИНО ТЕАТР

Энэ нь хамгийн сүүлийн үеийн киног Монголын залууст хүргэх төв байх болно. Дөнгөж нээлтээ хийж буй киноны нээлтийг Монголдоо үзэх алтан боломж. Үзвэрийн зургаагаас найман танхим, хоёроос гурван өвөрмөц үзвэрийн заалтай байх юм.

ХУРЛЫН ЗААЛ

Олон улсын томоохон уулзалт, хурал зөвлөгөөн, дээд хэмжээний цуулган болох танхимууд төлөвлөгдсөн байгаа. Зэрэглэл хүний тоо, хурлын онцлогт тохируулан тохижуулж өгөх болно.

БҮЖИГ, ФИТНЕСС

Төрөл бүрийн бүжгийн дугуйлан, клуб, фитнесс нь олон нийтэд хүртээлтэй хэмжээгээр төлөвлөгдсөн ба насны хязгаар байхгүй.

ОФФИС

Улаанбаатар хотын төв хэсэгт бүх тийшээ харсан цэлгэр цонхтой орчин үеийн оффис төв энэхүү цамхагт байрлана.

ТҮРГЭН ХООЛНЫ ГАЗАР, РЕСТОРАН

Түргэн хоолны газар, ресторан пабууд нь хүн олноор цугларах бүх хэсгүүдэд хангалттай хэмжээгээр төлөвлөгдсөн. Мак Дональдс зэрэг олон улсын сүлжээ түргэн хоолны газрыг мөн байрлуулна.

НЯРАЙ БОЛОН ЖИРЭМСЭН ЭХЭД ЗОРИУЛСАН АСАРГААНЫ ТӨВ

Жирэмсэн эхчүүдэд зориулсан иж бүрэн сувилгаа, асаргааны төв. Энд жирэмсэн эхчүүдэд зориулсан дасгал хийх, зөв хооллолтын хэсэг, төрсний дараах сувилал, няайн асаргааны хэсгүүдээс бүрдэнэ. Ая тухтай, тайван орчин бүрдүүлж, язралтын эсрэг эмчилгээний хэсгүүдтэй байна.

ХУДАЛДААНЫ БҮС, ИХ ДЭЛГҮҮР

Брендийн бараа бүтээг­дэ­хүүний дэлгүүр, үйлчилгээний газ­рууд нь Шонхор төвд байрлах ба бүх насныханд зориулсан спорт, аялалын хувцас хэрэгсэл байна.

ГЭР БҮЛИЙН АМРАЛТЫН ХЭСЭГ

Тухайн газар ээж, аав, хүүхдүүдэд зориулсан хэсгүүд байрлах ба хүүхдийн асрагчид хүүхдээ даатгаад эцэг эхчүүдэд амарч зугаалах боломжийг олгоно.

ТОГЛООМЫН ЕРТӨНЦ

Хүүхдүүдэд зориулсан тог­лоомын ертөнц нь бүх насныханд зориулсан бүх төрлийн тоглоомоор тоноглогдсон байх ба насны ангилалтай хэд хэдэн заалнаас бүрдэнэ. Ийнхүү дэлхийн түвшинд Монгол Улсын үсрэнгүй хөгжлийг илэрхийлэх уг цамхаг дээр дурьдсанчлан бүхий л талын ая тухтай байдлаар хангасан цогц байгууламж бий болгож, монгол хүн дэлхийн хөгжилтэй хөл нийлүүлэн алхах болно гэдгийг төслийн багийнхан амлаж байлаа.

Т.СЭДЭД

NUD MN