“Гэртээ хүрэх зам” Б.Амархүүгийн талаарх таагүй бодлуудыг салхинд хийсгэлээ

“Гэртээ хүрэх зам”-ын үзэгчид суудлаа эзэлжээ. Гэвч тоглолт товлосон хуга­цаанаасаа цаг хэртэй хо­цорч,  үзэгчдийг багагүй бу­­­хим­дуулав. Үзэгчид ар­га барагдсандаа ч юм уу, бухимдсандаа ч тэр үү, “Амархүү энд байна уу” хэмээн хашхиралдаж, шү­гэлдэж, алга ташин, тоглол­тоо эхлэхийг “эелдэгхнээр” шаар­даж байв.

19.45 минутад тайзны гэрэл асч, ОХУ-ын гавьяат жү­жигчин, Буриад улсын ардын   жүжигчин Б.Амар­хүүг   орос  бүжигч­дийн хамт­­даа тайзнаа “морилсон” юм. Хэдхэн хормын өмнө “Орост олон жил ажиллаж, амьдарсан хүн цагаа барина байх  гэж  бодсон  маань  та­лаар боллоо” хэмээн бухим­даж  суусан  үзэгчид эхний дуу дуусахад “Ура” хашхиран, алга нижгэнүүлж, сэтгэл нь догдолсондоо суудал дээрээ өндөлзөж байгаа харагдсан.

Б.Амархүү охинтойгоо хамтрав

Дуучин залууг “Надад итгээч” дуу­гаа эгшиг­лүү­лэх үеэр Б.Амар­хүүд цэцгийн баглаа бэлэг­лэсэн бяцхан охиныг хэн ч онц­гойлон анхаарсангүй. Ха­рин Б.Амархүү дуулж дуус­магцаа “Сая надад цэцэг өгсөн охиныг та бүхэн таньж байна уу. Миний охин шүү дээ. Анука, миний охин. Гараад ир ээ” гэх нь тэр.

Үзэгчид гайхширал, тээ­нэгэлзэлд автан, танхимд хэсэг зуур чимээгүй байдал танхимд ноёрхов. Үзэгчдийн суудлаас тайзыг чиглэн гүйх бяцхан охин дээр бүх хүний харц тогтжээ. Анукаг тайзан дээр гарч ирсний дараа Б.Амархүү түүнийг тэврэн үнсээд “Та бүхэн санаж байгаа бол Анука бид хоёр “Татар ажил­лагаа” кинонд хамтран тоглосон доо” гэхэд үзэгч бүсгүйчүүд сая л уужуу амьсгаа авах шиг болсон.

Б.Амархүү “Моя Мария” дууг эгшиглүүлж, тэрхүү дууны аянд Анука тун ч чадварлаг бүжсэн нь үзэгчдэд тун ч их таалагдсан юм.

Хүмүүс түүний ээжийг найз охинтой нь андуурдаг

Тоглолтын бараг л 70 хувь нь орос дуунаас бүрдсэн бөгөөд “Бүх Оросын шилдэг дуучин шалгаруулах телевизийн шоу”-нд ялалт авч ирсэн “Не надо слов слышишь”, зүрхнээ баяр, гуниг дуудсан аятай “Мама” дуунууд үзэгчдийн сэтгэлийг хамгийн ихээр хөвөлзүүлсэн.

Б.Амархүү “Мама”-г дуулсныхаа дараа танхимын дундуур нүдээ хэсэг бэлчээсний эцэст “Миний ээж энэ танхимд сууж бай­гаа. Даанч би ээжийгээ хай­гаад олдоггүй ээ” хэмээн үзэгч­дийг хөгжөөв. Удалгүй арын суудлаас нэгэн бүс­гүй босч ирэхэд дуучин за­луугийн нүднээ оч гэрэлтэх шиг л болж, баглаа цэцэг барин өөдөөс нь гүйлээ. Яг л ээж рүүгээ тэмүүлэх жаахан хүүхэд шиг.

Дуучин залуу “Энэ миний ээж шүү дээ” хэмээгээд, нэ­гэн хөгжилтэй дурсамжаа үзэг­чидтэй хуваалцсан юм.

Б.Амархүү ОХУ-ын Бу­риад улсын ардын жү­жиг­чин болсныхоо дараахан эх орондоо ирээд, ээжийнхээ хамт Улсын их дэлгүүр орж л дээ. Гэтэл нас тогтсон орос хүн түүнтэй уулзаж, гар бариад “Чиний найз бүсгүй үнэхээр, үнэхээр хөөрхөн юм” хэмээсэн байна.

Хамгийн чадварлаг бүжигчин нь Б.Амархүү

Б.Амархүү энэ үдшийн туршид зарим хүний нүдэнд “хайр зарлагч”, нөгөө хэсэгт нь “хамгийн шилдэг шоучин” болж харагдав бололтой.

Учир нь, тэрбээр байс­хийгээд л “Шилмэл заг­вар” ХХК, “Женко”-гийн Х.Баттулга, ах дүү, хамаа­тан садан, монгол түмэндээ “хайртай”-гаа илэрхийлж байв. Хэзээнээсээ “Хайр­тай шүү” гэж налиг­нах дургүй монголчууд энэ бүхэнд тийм ч таатай ханд­сангүй. “Энэ бол зүгээр л шоу. Оросын шоу бизнест долоон жилийн турш “зүт­гэсэн” гэсэндээ овоо юм сур­чээ” хэмээн ёжтой өгүүлэх нь тодхон сонсогдож байв.

Гэвч  Б.Амархүү   дуу­лахын зэрэгцээ орос, монгол бүжигчидтэй хөл нийлүүлэн бүжиж, түүнд “хайр зар­лагч” бүсгүйчүүдийн зүрхийг улам ч догдлуулаад амж­­сан. Танхимд цугларсан олон “Б.Амархүү үнэхээр сайн бүжиглэдэг юм байна” хэмээн дуу нэгтэйгээр хү­лээн зөвшөөрч, залуу охид хө­дөлгөөн бүрийг нь нүд сал­галгүй ажиглаж байсан юм.

Дахиад л шоу юу

Дуучин Б.Амархүүгийн тоглолтын тайзыг “Шилмэл загвар”-ын загвар өмсөгчид, “Гурван охин”, “Киви”-гийн бүсгүйчүүд, ОХУ-ын “Зэрлэг сувд” хамтлагийн бүжигчид, Азийн ятгын хатан хаан Ч.Мөнх-Эрдэнэ гээд олон сонирхолтой, гайхамшигтай зочид чимсэн.

Гэвч улаан даашинзтай, өндөр гоолиг бүсгүй Б.Амар­хүүгийн хамт цоо шинэ дууг энэхүү тоглолтын тайзнаа анх удаа амилуулсан нь юу юунаас илүү үзэгчдийн анхаарлыг татсан юм. Дуу дууссаны дараа дуучин залуу өнөөх бүсгүйг тайзнаа буцаан урьж “Миний хайртай бүсгүй” хэмээн та­нилцуулав. Тэрбээр “Бид хоёр монголчууддаа зориулаад ийм дуу хийсэн, тийм ээ. Хайр аа” хэмээн наалинхайтаж, найз бүсгүйгээ тэврэн үнссэн.

Харамсалтай нь, энэ бүхэн олон хүнд таалагдсангүй бололтой. Учир нь, 2008 онд Б.Амархүү Ольга хэмээх орос бүсгүйг эх орондоо дагуулан ирж, хэвлэлийн хурал зарлан, “Миний найз бүсгүй” хэмээн танилцуулж байсныг санагдуулав.

Тэгээд ч найз бүсгүй, гэргийгээ тайзан дээр гаргаж ирэн танилцуулдаг моод монголчуудад тийм ч танил бус. Угаас даруухан манай урлагийнхны хэн нь ч хэвлэлийн хурал зарлаж, найз бүсгүйгээ тайзан дээр гаргаж, фэнүүдтэйгээ танилцуулж  байгаагүй. Энэ ч утгаараа “Дахиад л шоу­даад эхлэх шив. Хоёр жи­лийн дараа гэхэд дахиад л өөр бүсгүй хөтлөөд, “Миний хайртай хүн” гээд зогсож байх биз” хэмээн шивэр авир гэлцэж байсан юм.

Хэдэн жилийн дараа загвар өмсөгч О.Ариунзул Ольга хэмээх бүжигчин бүс­гүйн адил мартагдах уу, эсвэл Б.Амархүүгийн гэргий болж, галыг нь ма­нах уу гэдгийг гагцхүү цаг хугацаа харуулах болов уу.

Б.Амархүү “Гэртээ хүрэх зам”-аа дөтөллөө

Дуучин залуу монголоор ярих гэж ёстой л монгол хэлний утгыг алдагдуулж байсан юм. Сайхан дурсамж, сэт­гэлийн хөдөлгөөнөө үзэгчид­тэйгээ хуваалцах гэсэн сэтгэл нь сайхан ч эгээ л монгол хэл анхлан сурч байгаа гадаад хүн шиг ярих нь нас тогтсон хүмүүсийн эгдүүцлийг хүргэж байгаа нь илт байв. Гэвч “Гэртээ хүрэх зам дэндүү хол

Гэм хийсэн мэт аньсага минь нойтон…” хэмээн дуулж эхлэх агшинд хүн бүр бодолд автаж, танхим нам гүмд автсан юм. Үзэгчид дууны үг бүрийг анхаа­рал­тай сонсож, төрсөн нутгаа сэт­гэлдээ зураглан байх мэт.

Дуу дуусах агшинд яагаад ч юм, Б.Амархүүгийн  талаарх таагүй бодол бүхэн салхинд  хийсчих шиг л болсон шүү. Тэрбээр тог­лолтын үеэр танхимын дундуур гүйн, болж өгвөл хүн бүртэй гар барьж, бяцхан хүүхдүүдийг тэвэрч үнсэн,  үзэгчидтэйгээ “амьд” харилцаа үүсгэж бай­­лаа. Энэ нь ч олон жил хүний нутагт амьдарч, ард түмэн, монгол ахуйгаасаа хөндийрсөн түүний гэртээ, монголчуудынхаа сэтгэлд хүрэх замыг багагүй дө­төлсөн биз ээ.

Тиймээс ч  “Тоглолт   цагтаа эхэлсэнгүй” гэж бу­­химдаж, “Хайран мон­гол хэл минь” хэмээн ха­лаг­лаж, “Сайхан монгол охиноор шоудлаа” гэж эг­дүүцэж суусан үзэгчид кон­цертын танхимаас гарахдаа бүгд Б.Амархүүд “хайр зарлачихсан” байлаа. Тэд “Чадварлаг залуу, Монголын бахархал” хэмээн ам бу­лаалдан ярилцаж, зарим нь

“Ижийдээ хүрэх зам дэндүү хол

Энгэрийн ганцхан товч мэт нутаг минь өнчин” хэмээн аялсаар гэр гэрийн зүг одоцгоосон юм.

Эх сурвалж: “Өглөөний Сонин”