Иргэдээс ирсэн өргөдлийн 90 хувь нь хувийн чанартай байдаг
УИХ-ын Өргөдөл, гомдлын байнгын хороо анхны хуралдаанаа хийлээ. Хуралдаанаар байнгын хорооны дүрмийн төсөлтэй танилцаж, хийж гүйцэтгэх ажлын тайлан, намрын чуулганы хугацаанд хийж гүйцэтгэх ажлынхаа төлөвлөгөөг авч хэлэлцэв. Өргөдөл, гомдлын байнгын хороонд өнөөгийн байдлаар иргэдээс ирсэн өргөдөл, гомдлын 90 хувь нь хувийн хүсэлтүүд байгаа гэнэ.
Тус байнгын хороо байгуулагдсан даруйд иргэдээс 280 санал ирсэн бол өнөөгийн байдлаар 400-гаад болж нэмэгджээ. Иргэдээс ирсэн өргөдлийг хэлэлцэн шийдвэрлэх зарчмаар явбал тоо нь нэмэгдэх хандлагатай байгаа аж. Хамгийн гол нь иргэдээс гэр хүссэн өргөдлийг “гэр олго” гэж шууд цохохгүй учир тэр хүсэлтийн тоо буурч магадгүй байгаа юм байна.
Байнгын хорооны гишүүд иргэдийн хүссэн гэрийг үнэгүй олгоод эхлэхээр агаарын бохирдол, хөдөө орон нутгаас шилжих хөдөлгөөн ихэсч, ажилгүйдэл бий болох зэрэг нийгмийн асуудал гарч ирч болзошгүй хэмээн үзэж байгаа аж. Тиймээс иргэдээс ирсэн хувийн хүсэлтийг хэрхэн яаж шийдвэрлэвэл зохистой талаар хөндлөнгийн байгууллагаар судалгаа хийлгээд түүнээс гарсан дүгнэлтийг үндэслэн хэлэлцүүлэг зохион байгуулахаар төлөвлөжээ.
Мөн газрын маргааны асуудал их хөндөгдөж байгаа учир “Газрын тухай хуулийн хянан шалгах” сэдэвт хэлэлцүүлгийг хийх нь зүйтэй гэж үзсэн байна. УИХ-ын гишүүдийн зүгээс шинээр бий болсон байнгын хорооны үйл ажиллагааг хэлэлцэж байгаа учир олон чухал саналыг хэлж байлаа.
Тухайлбал, УИХ-ын гишүүн Н.Батцэрэг “Иргэдээс ирсэн өргөдөл, гомдлын байнгын хороонд ирж буй өргөдлийн тоо буурахгүй байвал сайн. Иргэдээс ирсэн өргөдлийг газар дээр нь шийдвэрлэх нь зүйтэй юм” гэсэн бол Хууль зүйн сайд Х.Тэмүүжин хэлэлцүүлгийн сэдвийн хувьд газрын маргааны асуудал илүү сонирхолтой хэмээгээд “Америк улсад өргөдлийн байнгын хороог бусад мэргэжлийн байнгын хорооноос ялгахдаа зөвхөн иргэдээс ирж буй өргөдлийн давтамжид үндэслэж маргааныг шийддэг. Улмаар гарсан дүгнэлтээ мэргэжлийн байнгын хорооддоо шилжүүлж өгөх үүрэгтэй байдаг юм.
Харин Өргөдөл, гомдлын байнгын хороо мэргэжлийн байнгын хорооны эрх мэдлийг булааж хэрэгжүүлж болохгүй. Үндсэн хуульд төр хэн нэгэнд хувийн өмч өгөх эрхгүй байдаг ч орон байр хүсэх нь өмчтэй болъё гэсэн иргэдийн хүсэлт яах аргагүй мөн билээ. Тиймээс тэдгээр иргэнийг эрсдэлээс хамгаалахын тулд өргөдлийг нь хүлээн авах ёстой. Энэ чиглэлд сайн анхаарах хэрэгтэй байна” гэв.
ӨГЛӨӨНИЙ СОНИН
URL:
