Зам нь шулуудчихав аа, хөөрхий

Өчигдрийн УИХ-ын нэгдсэн чуулганаар хоёр ч хүнийг “өөрийнх нь хүсэлтээр”  зөөлөн суудлаас нь ховхолсон бол 40 хүрч яваа аз нь шовойсон нэг эрд амтат бялууны өнцгөөс томхон үмхүүлээд авлаа. Энэ намаржин үргэлжилсэн бялуу хуваалт дуусаагүй бай­гааг харахад  төрийн эрхийг гартаа атгана гэдэг аргагүй л “арсалдан тэм­цэлдэх”-ээс өөр замгүй  есөн хүслийг биелүүлэгч шидэт хүч юм байна.

Хэдхэн хоногийн өмнө ордны хонгилоор нисч байсан “40 хүрсэн Б.Болдбаатар УИХ-ын Тамгын газрын дараагийн дарга болно” гэсэн бор шувуу ийнхүү амилж, жиргээд нисчихдэг юм байна. Инженер, хуульч мэргэ­жилтэй Б.Болдбаатар хэмээх хүдэр эр маргаашаас “40 хүрсэн эр хүн байна даа намын харьяаллаас татгалзана яадаг юм” гэх байх. Татгалзваас тат­галз­тугай. Би л хувьдаа татгалзахгүй. За тэр ч яах вэ.

Харин гурван хүний “хоол, унд”-ны талаар ярилцаж бай­хад манай УИХ-ын эрхэм гишүүдийн хариуцлагагүй, хайн­га хандаж байгаа нь даанч нэг  тусгүй. Ганц өдөр ч болтугай 60-уулаа цуг­лачихаж болдоггүй л юм байх даа. У.Хүрэлсүхийн асууд­лыг хэлэлцэхэд 48-хан гишүүн оролцож “У.Хүрэлсүхийн хүсэлтийг хүлээн авах нь зөв” хэмээн 28 нь лүндэн буулгаснаар  58.3 хувьтайгаар  гэргийгээ эмчлүүлэх түүний зам шуударч байгаа юм.

Харин УИХ-ын Тамгын газрын дарга Ц.Шарав­доржийн “өөрийн хүсэлт”-ийг 53 гишүүний 44  нь дэмжсэнээр “явах замд нь саад” хийсэнгүй эвтэйхэн шийд­чихдэг  юм байна.

Ер нь тэгээд УИХ-ын эрхэм гишүүд маань 800  гаруй болсон болоогүй хууль зо­хион баталсаар байгаад баа­­хан залхуу хойрго болц­­гоо­жээ хөөрхийс. Гурван хүний хойшдын зам мөрийг заах “туйлын хариуц­­ла­гатай” ажлаа хийж суух­даа гишүүд маань мөн ч их эвшээцгээлээ зайлуул. Хууль зохион  батлах гэдэг мөн ч яггүй, нойр хоол хагас­ладаг  ажил юм байна. Хөөрхий тэдний эвшээхийг харах бүртээ яс янгинаж суув шүү.

Ёох. За яадаг ч байсан ажил ер нь жигдэрч л байна санж. Ямар ч бол­тугай гурван хүний зам  нь шулууд­чихлаа. Лав л УИХ-ын эрхэм гишүүд маань явах замд нь саад болсонгүй. Сайн үйлс дэлгэрээд л байх юм даа.

Эх сурвалж: “Өглөөний Сонин”