Замын хөдөлгөөний дүрэмд өөрчлөлт оруулах шаардлагатай
Нийслэлийн ИТХ-ын тэргүүлэгчид ээлжит хуралдаанаа хийж, цаг үеийн хэд хэдэн асуудлыг хэлэлцлээ. Хамгийн анхаарал татсан асуудлын нэг нь өнгөрсөн хоёр сарын хугацаанд хэрэгжсэн замын ачааллыг бууруулах цогц арга хэмжээг үргэлжлүүлэх эсэх тухай байв.
Энэ талаар ажлын хэсгийн ахлагч нийслэлийн барилга хот төлөвлөлт хариуцсан орлогч Н.Гантөмөр танилцуулав. Тэрбээр “Замын ачааллыг бууруулах, түгжрэлийг багасгах зорилгоор хэрэгжүүлсэн үйл ажиллагаа хэр үр дүнтэй байсныг бид ярих цаг болжээ. Өнгөрсөн хугацаанд хэрэгжсэн ажлууд үр дүнгээ өгч, замын ачаалал урьдынхаас 20 хувиар буурсан үзүүлэлт гарлаа.
Мөн энэ ажлыг цаашид үргэлжлүүлэх талаар иргэдийн дунд явуулсан санал асуулгын 87 хувь нь дэмжиж байгаа гэдгээ ч илэрхийлсэн. Гэхдээ замын ачааллыг бууруулах зарим ажлыг энэ хугацаанд бүрэн хийж амжаагүй. Тухайлбал, авто машин ачигч тээврийн хэрэгслийг оруулж ирэхэд зориулсан төсөв шийдэгдээгүй, авто машины төлбөртэй зогсоол байгуулагдаж эхлээгүй зэрэг асуудал байсаар байна.
Эдгээр төлбөртэй зогсоолыг шийдвэрлэхээр нийслэлийн 22 байршилд төсөл сонгон шалгаруулсан. Үүнд зургаан иргэн, 17 аж ахуйн нэгж байгууллага оролцож, материалаа бүрдүүлэх шатанд явж байна” гэх мэдээллийг тэргүүлэгчдэд хүргэсэн юм.
Тэргүүлэгчид замын ачааллын эсрэг авч буй энэхүү ажлыг цаашид үргэлжлүүлэх нь зөв хэдий ч зарим анхаарах зүйл байгааг ажлын хэсэгт сануулсан. Тодруулбал, замын хөдөлгөөний дүрэмд өөрчлөлт оруулах тухай судалж үзэх, нийтийн тээврийн үйлчилгээг илүү анхаарах, жолоодлого нь буруу талдаа авто машиныг хязгаарлах бодлого барих, дүрэм зөрчсөн жолоочид ногдуулах хариуцлагыг өндөржүүлэх зэргийг анхаарч, ажил хэрэг болгохыг холбогдох албаныханд анхаарууллаа.
Эх сурвалж: “Өглөөний Сонин”
URL:
