Мөн ч удаан хүлээсэн дээ

Удтал хүлээсний эцэст нийслэлчүүд шинэ гүүрэн гарцаа хүлээж авлаа. Бид төмөр замаар хотын хойд, урд хагаст хуваагдан, өглөөнөөс үдэш хүртэл 3-4 гүүрэн гарцаар чихэлдэн хагас зууныг элээжээ. Харин одоо өдөрт 30 мянган машин чөлөөтэй зөрөлдөх боломжтой шинэ гүүртэй болсон нийслэлчүүд “Мөн ч удаан хүлээсэн дээ” гэх ч, баяртайгаа хүлээн авлаа.

Тус гүүрийг хү­лээл­гэн өгөх хугацаанаас нь гурван долоо хоногийн өмнө өгч байгаа нь энэ аж. “Нар”-ны гүүрний нээлтийн ажил­лагаанд Монгол Улсын Ерөн­хий сайд Н.Алтанхуяг, нийс­лэлийн Засаг дарга Э.Бат-Үүл, Зам, тээврийн сайд А.Гансүх, Япон улсаас ма­най улсад суугаа Элчин сайд Такинори Шимизү болон албаны хүмүүс, ир­гэдийн төлөөлөл оролц­лоо. Нээлтийн үеэр Ерөнхий сайд Н.Алтанхуяг “Хүмүүс энэ гүүрэнд “Нар”-ны гэх нэр өгсөн байна лээ. Үнэхээр оно­сон нэр гэж бодож байна. Монголчууд бид “Тэмээн дээрээс наран ойрхон” гэж дуулдаг, ярьдаг. Тэгвэл их Наран улсын байгуулсан энэ гүүрнээс ч нар ойрхон харагдахаар болжээ. “Нар”­ны гүүр ашиглалтад орс­ноор нийслэлд олон талын ач тустай. Өөрөөр хэлбэл, хөг­жил, дэвшлийн гүүр байх болно гэдэгт итгэж байна” хэмээсэн юм.

“Нар”-ны гүүр анх ба­ригдаж эхэлсэн цагаас олны анхаарлыг татсан шигээ өөрийн гэсэн давуу тал олон­­той аж. Замын амин сүнс гэгддэг ус зайлуулах байгууламж, явган хүний зам, гэрэлтүүлэг, зам тус­гаарлагч шугам зэрэг нь нийс­­лэлийн бусад авто за­маас илүү харагдаж байв.

Гүүрний ажлыг Японы инженерүүдийн зу­раг төс­лийн дагуу хийсэн бөгөөд шаардлагатай техник хэ­рэгслүүдийг ч тус улсаас авч ирж ашигласан байна. Түүнч­лэн манай улсын цаг уурын нөхцөлийг тооцоолж, замын уулзварт олон өнгийн чулуун дэвс­гэрийг хийж өгчээ. Энэ нь гүүр өөд өгсөх, уруудахад шарвах, хальтрах, гулгаахаас урьдчилан сэр­гийлэх аж.

Япончууд нарны замд анх 10 жилийн баталгаа өгч байсан. Баталгаат хугацаанд зам эвдэрч, хагарсан зүйл гараагүй гэхэд болно. Харин “Нар”-ны гүүрэнд 20 жилийн баталгааг ам бардам өгч байв. Итгэл дүүрэн  энэ амлалт гүүр хэр баталгаатай, бат бөх болсныг илтгэж байлаа.

Эх сурвалж: “Өглөөний Сонин”