Иргэний мэдэлд бол хууль бус хотын мэдэлд бол хууль ёсных болох уу?
Сүүлийн үед нийслэлд хариуцлагын их давалгаа өрнөж, дээр доргүй бужигнаж байна. Ямар ч байсан алдаа эндүүг засч залруулах гэж байгаад хүмүүс нийтлэг олноороо талархалтай хандаж байгаа. Олон жилээр чиг шугам нь гажиж ирсэн бүгдийг гольдролд нь оруулахад амаргүй биз, шүүмжлэл ч их дагана, гомдол ч их хөврөх байх. Тэр тусам нь хутганы торгон ир дээр яваа мэт алдаа гажуудал гаргамааргүй байгаа юм.
Үнэндээ ойлгоход хэцүү тайлбарууд бас яваад байгаа учраас иргэд бухимдаж байгаа байх. Тухайлбал, зөвшөөрөлгүй баригдсан хууль бус барилгуудыг хотын мэдэлд авна гээд байгаа. Нөгөө нураана гээд айлгаад байгаа барилгууд байх л даа. Иргэн Батаагийн мэдэлд байхаараа уг барилга хууль ёсны бус харин хотын мэдэлд оччихоороо хууль ёсны болчихдог ямар хууль цааз байна аа. Энэ үнэндээ ойлгомжгүй байна. Хэн нэгэн иргэний мэдэлд байхаараа нураахаас аргагүй аюултай байр, харин төрийн мэдэлд оччихоороо тэр бүх эрсдэл нь алга болчихдог гэдэг нь шог тайлбар. Ёстой л хотны гадна гарвал чоно, дотор нь орвол нохой гэж эерүүлж тайлбарлаж байгаатай адил. Гэтэл чоно чоноороо, нохой нохойгоороо л байна шүү дээ.
Э.ЭНЭРЭЛ
URL:
