“Болор мэлмий” барилгын шалгалтад бүдрэв

Барилга, хөдөлмөрийн аюулгүй байдлын тухай хууль зөрчигдөж, хүний амь нас, эрүүл мэнд хохирсон хэд хэдэн хэрэг өнгөрөгч сард  гарсан. Үүнтэй холбоотойгоор УИХ-ын дарга захирамж гаргаж, УИХ-аас Барилгын тухай, хөдөлмөрийн аюулгүй байдал, эрүүл ахуйн тухай хуулинд болон бусад хууль тогтоомжийн биелэлтийг шалгах ажлын хэсгийг  9 дүгээр сарын 18-нд байгуулсан билээ. УИХ-ын хэвлэл, мэдээллийн албаны мэдээлснээр энэхүү ажлын хэсгийнхэн ажлаа эхлүүлээд сар гаруй хугацаа болж байгаа хийгээд санал, дүгнэлтээ ирэх баасан /2012.10.05/ гаригт УИХ-ын дарга, гишүүдэд танилцуулах юм байна.

Өнөөдөр /2012.10.03/ уг ажлын хэсгийн гишүүн О. Баасанхүү Сөүлийн гудамж буюу Сүхбаатар дүүргийн 1-р хороо, нийслэлийн Нэгдүгээр сургуулийн замын урд талаас эхлэн хуучнаар хүүхдийн 100 дугаар дэлгүүр хүртлэх газарт баригдаж буй 6-7 барилгад шалгалт хийлээ. Шалгалтын бүрэлдэхүүнд Мэргэжлийн хяналтын ерөнхий газар, нийслэлийн мэргэжлийн хяналтын газар, нийслэлийн газрын алба, барилга хот байгуулалтын газрын мэргэжилтнүүд оролцлоо. Дээрх барилгууд нь Ерөнхий боловсролын сургуулийн ойролцоо болон зөвшөөрөлгүй, эсхүл авсан зөвшөөрлөөсөө өөр зориулалтаар баригдаж байгаа юм.  Тиймээс хүүхдийн аюулгүй байдлыг хэрхэн хангасан талаар илүүтэйгээр анхаарлаа хандуулж байна. Тодруулбал,

Нэгдүгээр сургуулийн замын урд байрлах “Чонон бөртэ” төвийн урд  Монгол-Энэтхэгийн хамтарсан сургуулийн өргөтгөл барина хэмээн Нийслэлийн газрын албанаас “Уран суварга” хэмээх компани зөвшөөрөл авчээ. Гэтэл нийслэлийн мэргэжлийн хяналтын газарт уг газрын эзэмшигч нь иргэн н.Бат-Эрдэнэ хэмээн бүртгэгдэж, барилга сургалтын зориулалтаар бус 10 давхар үйлчилгээ, оффисын зориулалтынх болж, өдгөө 7 давхрыг хэдийнэ барьж амжжээ.  Үүгээр зогсохгүй уг барилгын хажуухан талд “Болор мэлмий” нүдний эмнэлгийн байрыг нурааж, буурин дээр нь 17 давхар хоёр орон сууц барихаар газраа ухаж эхэлсэн байна. Энэ байдлыг эсэргүүцэн ойр хавийн зургаан байрны 300 гаруй оршин суугчид холбогдох газруудад өргөдөл гаргасан ч ямар нэгэн арга хэмжээ авагдаагүй аж. Хэдийгээр энэ газрын эзэмшигч болох “Болор мэлмий” компани өөрийн газартаа барилга барих эрхээ авсан ч ойр хавийн хүүхдийн тоглоомын талбай, ногоон байгууламжийг устгаж, талбайн хэмжээг заасан хэмжээнээс хэтрүүлсэн зөрчил гаргажээ.

Монгол-Энэтхэгийн хамтарсан сургуулийн хажууд бөөрөө нийлүүлэн “Хурган мөнх” ХХК-ийн оффисийн зориулалттай 15 давхар барилга сүндэрлэж байгаа аж. Газрын зөвшөөрлөө авсан гэх уг барилга  хөдөлмөрийн аюулгүйн ажиллагааны тал дээр  дутагдалтай байгааг нөхцөл байдалтай газар дээр нь танилцсан албаныхан онцлов.

Энэ мэтчилэн хотын төвийн зургаахан барилгыг шалгахад л хэн,  хаанаас, хэзээ зөвшөөрөл өгсөн, яаж олгодог, хэний эзэмшилд байдаг, ямар зориулалтаар баригдаж байгаа болон хөдөлмөр аюулгүй ажиллагааны талаар гээд тодорхойгүй, зөрчилтэй зүйлс нилээдгүй байлаа. Тиймээс УИХ-ын гишүүн О.Баасанхүү дээрх зүйлсийг тодруулж, зөвшөөрөл олгодог холбогдох албаны хүмүүсийг шалгах хүсэлт гаргахаар Авлигатай тэмцэх газрыг зорьсон юм. Тус газрын  Тамгын хэлтсийн дарга Ж.Наранбаатартай уулзаж, ажлын хэсэг байгуулж, шалгалт явуулж, хуулийн хугацаанд хариу мэдэгдэхийг хүслээ.

Дашрамд тэмдэглэхэд, УИХ-аас Ажлын хэсэг байгуулагдснаас хойш нийт 600 гаруй барилгад шалгалт хийсэн бөгөөд үүнээс 100 орчим барилгын ажлыг зогсоож, 31 барилгыг шүүхэд өгөөд байна хэмээн Мэргэжлийн хяналтын ерөнхий газрын дэд бүтцийн хяналтын газрын дарга Д.Жаргал мэдэгдлээ.