Төмөрлөгийн үйлдвэрийн дансаар мөнгө угааж, “Ноёд” группын захирал 1.2 сая доллар луйварджээ
Улсын Ерөнхий прокурорын тайлан мэдээгээр хэрэг бүртгэлт, мөрдөн байцаалт явуулсан 9500 гаруй хэргийг түдгэлзүүлж, 4700 орчим хэргийг “гэмт хэргийн бүрэлдэхүүнгүй” гэсэн үндэслэлээр хэрэгсэхгүй болгон, мөрдөн байцаалтын харьяаллын хэргийн 50 гаруй хувийг хугацаа сунгаж шийдвэрлэсэн байдаг аж. Энэ бол тохиолдлын жишээ бус, иймэрхүү тоо баримт жил бүр тодорхой хэмжээгээр давтагддаг нь нууц биш гэдгийг 2010 оны дээрх тайлан мэдээнээс харж болох юм. Гэтэл мөрдөн байцаах байгууллагуудын үйл ажиллагаа хэвийн явагдаж байгаа юм шиг олон нийтэд ойлгогдсоор удаж байна. Цаасан дээр гарч буй тоон мэдээ зарим хэрэг илрэхгүй, магадгүй илрүүлэхгүй байгааг баталж байгаа юм. Ялангуяа нэр нөлөөтэй төрийн өндөр албан тушаалтан, бизнесмэнүүд, олны танил эрхмүүдийн холбогдсон хэрэг шийдэгддэггүй нь иймэрхүү тоон мэдээг зузаалсаар байдаг биз ээ. Ийм хэргүүд мөрдөн байцаагч, прокуроруудын хэнийх нь тусламжтайгаар шийдэгдэхгүй яваад байна вэ. Манай сонин “Эх сурвалжийн мөрөөр үнэнийг хайсан нь” булангийнхаа энэ удаагийн дугаараар Дарханы төмөрлөгийн үйлдвэрийн удирдлагууд болон олонд танигдсан бизнесмэнүүд хамтран гадаадын нэгэн компанийг яаж луйвардсан, энэ хэрэгт мөрдөн байцаагч, прокурорын байгууллагынхан ямар байдлаар хандаж, хэрхсэн гэдгийг нэхэн сурвалжилж уншигч танд цувралаар хүргэж байна.
Ингэснээрээ хуулийн байгууллагуудын шинэчлэл чухам юунаас эхлэх ёстой вэ гэдгийг бид энэ эрэн сурвалжлах нийтлэлээрээ давхар хөндөж буй юм.
“НОЁД“ ГРУППЫН ЗАХИРАЛ Г.БУЯНДОРЖИЙН ӨВӨР МОНГОЛ НАЙЗ
“Ноёд” группын захирал Г.Буяндоржтой өвөр монгол найз Э.Хурцаа нь ирж уулзжээ. Тэрбээр “БНХАУ-ын Тяньжин хотын “Тайшин” худалдааны экспорт, импортын компанийн захирал Хаинг Донг Шин Монголд иржээ. Бийлэгжүү хүн байх шиг байна. Монголд худалдаа наймаа хийгээч, тусалъя гэж хэллээ. Чамайг танил тал ихтэй гээд хэлчихсэн, уулзах уу” хэмээжээ. Тэгээд өнөөх хятад захиралтай Г.Буяндорж, Э.Хурцаа хоёр уулзахаар болсон байна. Ингэхдээ Г.Буяндорж өвөр монгол найзыгаа “Чи эхлээд уулз. Ямар салбарт хөрөнгө оруулах ажил байгаа юм. Эсвэл ямар нэгэн ашигт малтмалын салбарт хөрөнгө оруулах уу, үгүй юу гэдгийг нь танд. Тэгээд намайг жаахан рекламдахаа мартав аа” хэмээн захижээ. Энэ явдлаас хэд хоногийн дараа Э.Хурцаа ирж “Бүх зүйлийг тохирчихлоо. Төмрийн хүдрийн баяжмал авах хэрэгтэй байна гэнэ. Би манай найз Г.Буяндорж гэж Монгол Улсад томоохонд тооцогдох группийн эзэн. Эхнэр нь Монгол Улсын гавьяат жүжигчин дуучин Т.Ариунаа гэж хэлсэн. Танил тал ихтэй хүн асуудалгүй ажлыг чинь бүтээж өгнө гээд хэлчихлээ” хэмээжээ. Ингээд Г.Буяндорж шинэ түнштэйгээ уулзахад асуудалгүй болов. Монголд байдаг хамгийн үнэтэй машиныг унаад бизнес уулзалтад явжээ. Түншүүд өнгөрсөн оны нэгдүгээр сараас хоёрдугаар сарын хооронд хэд, хэд уулзалдав. Нэр нөлөөтэйгөө харуулах гэж Г.Буяндорж Дарханы төмөрлөгийн үйлдвэрийн захиралтай хятад захирлын хажууд утсаар ярьж, Э.Хурцаа “Г.Буяндорж танил тал ихтэй. Би Монголд ирээд арван жил болж байна. Монгол эхнэртэй. Эндхийн хууль, дүрмийг сайн мэднэ. Гэхдээ Г.Буяндорж надаас илүү” хэмээн итгэл олж авах “ажиллагаагаа” хийсээр байжээ. Эцэст нь Г.Буяндорж “Дарханы төмөрлөгийн үйлдвэр” төрийн өмчит компаниас төмрийн хүдрийн баяжмал авах ажлыг хариуцах болж, харин түүний найз Э.Хурцаа нь “Тайшин” худалдааны экспорт, импортын компанийн Монгол дахь төлөөлөгчөөр ажиллах болжээ. Хятад захирал Хаинг Донг Шин гэрээнд шаардагдах мөнгийг зохицуулахаар нутаг буцсан байна. Төд удалгүй Э.Хурцаа хятад захирал руу утас цохиж “Г.Буяндорж гэрээ хийхээр боллоо, хурдан ир” гэжээ. Хятад захирал гуравдугаар сарын 16-ны өдөр ирж, Э.Хурцаа, Хаинг Донг Шин нар гэрээ байгуулахаар Дарханы төмөрлөгийн үйлдвэрийг зорьсон аж.
ДӨРВӨН САЯ АМ.ДОЛЛАРЫН ГЭРЭЭНИЙ УРЬДЧИЛГАА ХОЁР САЯ АМ.ДОЛЛАРЫГ ШИЛЖҮҮЛЭВ
“Дарханы төмөрлөгийн үйлдвэр” төрийн өмчит хувьцаат компанийн захирал П.Эрдэнэцогт болон нөгөө талаас БНХАУ-ын Тяньжин хотын “Тайшин” худалдааны экспорт, импортын компанийн захирал Хаинг Донг Шин нар худалдах, худалдан авах гэрээг өнгөрсөн оны гуравдугаар сарын 18-нд хийв. Гэрээний гол нөхцөл нь Дарханы төмөрлөгийн үйлдвэрээс тус компани 100 мянган тонн төмрийн хүдрийн баяжмал авах болсон байна. Нэг тонн тутмыг нь 40 ам.доллараар авах гэрээ хийжээ. Гэрээг дөрвөн сарын хугацаатай хийсэн байна. 100 мянган тонн төмрийн хүдрийн баяжмалыг нэг тонн тутмыг нь 40 ам.доллар гэхээр нийт дөрвөн сая ам.долларын гэрээ хийсэн байгаа юм. Гэрээ хийх үед Дарханы төмөрлөгийн үйлдвэрийн захирал П.Эрдэнэцогт гадаад явсан учир түүнийг орлон дэд захирал н.Бөттөгс гарын үсэг зурсан аж. Гэрээг биелүүлэхээр тус үйлдвэрийн Худалдаа хангамжийн албаны дарга Р.Уламбаяр, “Тайшин” худалдааны экспорт, импортын компанийн Монгол дахь төлөөлөгчөөр Э.Хурцаа нар мөн гарын үсэг зурсан аж.
Тэднийг гэрээ хийгээд гараад ирэхэд нь Дарханы төмөрлөгийн үйлдвэрийн хашаанд Г.Буяндорж ирчихсэн машиндаа сууж байж. Уулзалтаас гарч ирсэн хятад захирал гэрээгээ нягтлан тус үйлдвэрийн Эдийн засаг, худалдаа хариуцсан орлогч захирал, ерөнхий ня-бо нар гарын үсэг зураагүй байгааг анзаарч ямар учиртайг нь Г.Буяндоржоос лавлахад “Том дарга нар нь зурсан байхад наадуул чинь огт хамаагүй” гэсэн гэнэ. Ингээд төмрийн хүдрийн баяжмал ачих талбайгаа үйлдвэрийн хашаан дотор заалгаад явцгаав. Хаинг Донг Шин гэрээний урьдчилгаа болох хоёр сая ам.долларыг тавдугаар сарын 13-18-ны хооронд тус үйлдвэрийн Худалдаа хөгжлийн банкин дахь данс руу нь шилжүүлээд нутаг буцжээ. Мөнгө шилжүүлснээс хойш хоёр сар болов. Дарханы төмөрлөгийн үйлдвэрийнхэн төмрийн хүдрийн баяжмалаа нийлүүлсэнгүй.
МӨНГӨ ЛУЙВАРДАХЫН ТУЛД БАЙГУУЛСАН ”СКАЙ ТАУЭР ЭНХ БУЯН“ КОМПАНИ
БНХАУ-ын “Тайшин” худалдааны экспорт, импортын компанийн захирал Хаинг Донг Шинийг нутаг явсан хойгуур Э.Хурцаа компанийнх нь албан бланкийг ашиглан захирал “Э.Хурцаа” хэмээн тамга дарж, Дарханы төмөрлөгийн үйлдвэртэй харилцаад эхэлдэг байна. Хоёр, гурван удаа ийм албан бичиг өгчээ. Энэ бичгийн хариуд нь дэд захирал н.Баттөгс “Баяжмал авахыг эхлүүлэх” гэсэн цохолт хийж өгөв. Гэсэн ч төмрийн хүдрийн баяжмал зохих эзэндээ очоогүй байна. Энэ явдлын дараахан буюу өнгөрсөн оны зургадугаар сард Дарханы төмөрлөгийн үйлдвэрийн дансанд орсон хоёр сая ам.долларын 1.2 сая ам.доллар нь зургадугаар сарын 28-нд “Скай Тауэр Энх Буян” гэдэг нэртэй компанийн дансанд оржээ. Энэ компанийн эзэн нь 20 гаруй насны Сэлэнгэ аймгийн харьяат н.Ууганбаяр хэмээх залуу байдаг аж. Зайсанд энэ компани байрладаг бөгөөд “Ноёд” группийн охин компани юм байна. 1.2 сая доллар шилжүүлэхээс сар гаруйхны өмнө байгуулагдсан компани аж. н.Ууганбаяр нь Г.Буяндоржийн хамаатан юм байна. Ямар үндэслэлээр энэ мөнгө хаа хамаагүй компанийн дансанд орчихдог юм бэ. Худалдах, худалдан авах гэрээг Дарханы төмөрлөгийн үйлдвэртэй БНХАУ-ын “Тайшин” худалдааны экспорт, импортын компани хийсэн. Тэр дагуу тус компанийнхан урьдчилгаа мөнгө болох хоёр сая ам.долларыг шилжүүлсэн. Хэрэв урьдчилгаа мөнгийг шилжүүлэх байсан бол “Скай Тауэр Энх Буян” компани руу шилжүүлэх ёсгүй гэсэн асуудал дэгджээ. Тэгээд ямар бичиг баримтыг үндэслэн Дарханы төмөрлөгийн үйлдвэр 1.2 сая ам.долларыг дээрх компанид өгөв гэхээр тус үйлдвэрийнхэн тэр баримт бичгээ гаргаж өгөлгүй нууцалжээ. Энэ хооронд анх гэрээ хийхэд гарын үсгээ зураагүй байсан хоосон зайнд тус үйлдвэрийн Эдийн засаг, худалдаа хариуцсан орлогч захирал М.Сайннямбуу, ерөнхий ня-бо Д.Даваадорж нарын гарын үсэг ид шидийн юм шиг зурагдсан байв.
Үргэлжлэл бий.
Г.ЯЛГУУН
medee.mn
URL:
