Ө.Энхтүвшингийн ”Эргэлзээ”
МУСТА Х.Хүрэлхүү нэгэн үе өөртөө баахан эргэлздэг байв. Харин УИХ-ын гишүүн, МАН-ын дарга Ө.Энхтүвшин саяхан УИХ-ын ээлжит бус чуулган дээр өөртөө ингэж эргэлзэв.
Би ер нь энэ улстөрийн амьдралдаа их эргэлзээд байдаг болчихож.
Би өөрийгөө ингээд бодохоор УИХ-д эрийн сайндаа ороод ирсэн ч юм шиг жагсаалтын буянаар ороод ирсэн ч юм шиг
Манай намынхан УИХ-д суугаад байгаа ч юм шиг, хөөгдөөд байгаа ч юм шиг
Чуулганы танхимд ороод ирэхээр МАН бүлэгтэй ч юм шиг, бүлэггүй ч юм шиг
Бүлгээ байгуулъя гээд хүсэлт гаргахаар З.Энхболд нь хүлээж авах ч юм шиг, үгүй ч юм шиг
Яг үнэндээ УИХ-ын дарга нь хууль ёсных ч юм шиг хууль бус ч юм шиг
Дэд дарга нар нь бүрэн ч юм шиг дутуу ч юм шиг
Иймэрхүү байдалтай УИХ-ыг даргалж байгаа З.Энхболдод хэдэн үг хэлчихээр намын гишүүд нь өмөөрч босч ирснээ загнаад ч байгаа юм шиг, зодох гээд ч байгаа юм шиг
Даргадаа нэг л их хайртай хүмүүс…
Бүр сүүлдээ би МАН-ын дарга мөн ч юм шиг, биш ч юм шиг санагдаад байдаг болчихож.
Бүлгийнхээ асуудлыг хэлэлцүүлэх санаатай сууж байтал чуулганы танхимаас сэтгүүлчид зугтаад байгаа ч юм шиг, үгүй ч юм шиг пижигнэлдээд гараад гүйчих юм.
Сураг сонсох нь ээ манай У.Хүрэлсүх хүнд заамдуулаад байгаа ч юм шиг, айлын хүүхдийг алгадаж шоглоод байгаа ч юм шиг
Даргыгаа өмөөрч дарвалзсан Г.Баярсайхан гишүүн манай хүнд алгадуулсан ч юм шиг, зодуулсан ч юм шиг шалан дээр толгойгоо тэврээд хэвтэж байна лээ.
За тэгээд шөнө унтаад, өглөө нь босоход урьд шөнө нь унтсан ч юм шиг, унтаагүй ч юм шиг
Босч ирээд өөрийгөө толинд харахаар ялагдсан намаа аврах гээд байгаа ч юм шиг, яллах гээд байгаа ч юм шиг
Цайныхаа ширээнд суугаад сонин гарчиглахаар нам бид хоёрыг магтсан ч юм шиг, гоочилсон ч юм шиг
Зурагтаа асаахаар нэг их том том ярьсан АН-ынхан гарч ирээд улстөр ч юм шиг, авгай хүүхний хэрүүл ч юм шиг хачин юм ярина.
Дахиад сувгаа солингуут шинэ Засгийн газрын гишүүд нь хууль зохиогоод ч байгаа юм шиг, хуйвалдаан зохиогоод ч байгаа юм шиг
Дахин суваг солингуут нэг их олон намын дарга нар гарч ирснээ орон нутгийн сонгууль явуулах ч юм шиг, явуулахгүй ч юм шиг юм ярина.
Одоо ингээд бодохоор миний жижиг Монголд ийм олон нам байх нь зөв ч юм шиг, буруу ч юм шиг
Өглөөний 09:00 цагтай зэрэгцээд ажилдаа явах гэхээр Э.Бат-Үүл миний машиныг унуулах ч юм шиг, гараашдаа хадгалах ч юм шиг хачин захирамж гаргачихсан байгаа байхгүй юу
Тэгээд одоо би автобусаар явах ч юм шиг, үгүй ч юм шиг
Арай гэж машинаа асаагаад хөдөлгөөнд орно, миний машин яваад ч байгаа юм шиг зогсоод ч байгаа юм шиг битүү түгжрээ.
Сүүлдээ аргаа бараад нэгдүгээр эгнээгээр явах ч юм шиг, үгүй ч юм шиг
Ингэж аргаа баран байж чуулганы танхимд орж ирээд С.Бямбацогт, Д.Батцогт хоёрыг харахаар хамаатан ч юм шиг, хоёр өөр намынх ч юм шиг
Намынхаа бүлгийг байгуулчих санаатай Н.Алтанхуяг, З.Энхболд хоёртой ганц юм задлаад ууна.
Яг сайхан уугаад халангуут манай бүлгийг байгуулах ч юм шиг ярьснаа, маргааш нь шартчихаад үгүй ч юм шиг томроод эхэлнэ.
Бүлэг байгуулах хугацаа нь өнгөрчихсөн гэх юм, тэр хугацаа нь хэтэрсэн ч юм шиг, хэтрээгүй ч юм шиг
Ер нь бүлэг байгуулахад тийм заалт байдаг ч юм шиг, үгүй ч юм шиг
За тэгээд энэ бүгдийг бодсоны эцэст миний тархи толгой өвдөөд ч байгаа юм шиг, зүгээр ч юм шиг
Ингэж бодохоор миний бие эрүүл ч юм шиг, балай ч юм шиг
Заримдаа би Ө.Энхтүвшин мөн ч юм шиг, биш ч юм шиг
Ингээд юм юмны тухай эргэцүүлж бодоод л байх юм, өдөр хоног өнгөрөөд л байна.
Өдөр хоног өнгөрөөд байхад би өөрөө өтлөөд ч байгаа юм шиг, залуужаад ч байгаа юм шиг
Улстөрийн амьдрал аа гэж, МАН-ын дарга би юу ч ойлгохгүй эргэлзээд л байна даа.
”Өглөөний сонин”
URL:
