Б.Жавзмаа хагас шигшээд шалгарлаа

Манай улсаас Лондон-2012 паралимпын XIV наадамд жүдо бөхийн 60 кг-д А.Мөнхбат, 90 кг-д Д.Ганбат, байт харваанд Б.Жавзмаа, Б.Оюун-Эрдэнэ, пара буудлагад Ц.Лхамсүрэн, хөнгөн атлетикийн дөрвөн төрөлд Ч.Мөнх-Эрдэнэ нар өрсөлдөж байгаа билээ.

Жүдо бөхийн төрөлд манай хоёр бөх барилдсанаас -60кг-д А.Мөнхбат IX байр, -90 кг-д Д.Ганбат VII, эмэгтэйчүүдийн Р2 ангиллын 10 метрийн хийн гар бууны дасгалд Ц.Лхамсүрэн XIV-т шалгарсан амжилттай байгаа бол ОУХМ Б.Жавзмаа хагас шигшээд шалгарлаа.

Тэрбээр тэмцээний эхний өдрийн урьдчилсан харваанд 524 оноогоор VIII байрт шалгарч, улмаар шөвгийн наймд шалгарах эрхийн төлөө Тайландын тамирчинтай өрсөлдөж 6:4-өөр ялж шигшээ наймд Хятадын тамирчинтай оноолт таарсан юм.

Түүний өрсөлдөгч Гао Фан Шиат урьдчилсан харваанд 581 онож I байраар шалгарч улмаар Францын тамирчныг 6:0-оор илүүрхсэн юм. Улмаар ОУХМ Б.Жавзмаа Хятадын тамирчинг гурван үеийн турш илүүрхэж 6:0 буулган авлаа. Ингэснээр манай тамирчин медалийн төлөө өнөөдөр харвах юм.

niigmiigtoli.mn