Цэцэрлэгийн бүртгэл гурав хоног үргэлжилнэ

Цэцэрлэгт хүүхдээ бүртгүүлэх гэж өнжин хонон дугаарладаг үзэгдэл сүүлийн хэдэн жил улиг болоод буй.

Учир нь цэцэрлэгийн бүртгэл гуравхан хоног үргэлжлэхийн зэрэгцээ ар, өврийн хаалганы хүүхдүүдээ бүртгээд үндсэндээ бүртгэл өндөрлөж, заримдаа хуучин явж байсан хүүхэд хүртэл хасагдах тохиолдол гардаг. Тиймээс бүртгэлийн хугацааг эцэг, эхчүүдэд дуулгаж байна.

Энэ хичээлийн жилийн бүртгэл энэ сарын 22-25-ны хооронд гурван өдрийн турш үргэлжлэх юм байна. Дашрамд дуулгахад, нийслэлд улсын 300 гаруй, төрийн бус 40 орчим цэцэрлэг үйл ажиллагаа явуулж байгаа ч энэ тоо хангалтгүй байгаа юм. Энэ жил 89 мянган цэцэрлэгийн насны хүүхэд байгаа бөгөөд амжиж бүртгүүлэхгүй бол хоосон үлдэх магадлал өндөр байгаа гэдгийг сануулъя.

Ц.Болор