Хөх тарианы талх биш хөх өнгийн талх юм биш үү

Хөх тарианы талх хүний биед олон талын ашиг тустай. Илчлэг багатай, гэдэсний гүрвэлзэх хөдөлгөөнийг сайжруулж, биед хуримтлагдсан элдэв хорт бодисыг зайлуулахаас гадна биеийн жинг бууруулдаг гээд тоочоод байвал олон ач тус энэ талханд бий.

Ийм учраас манайхан хүнсэндээ хөх тарианы талхыг голчлон хэрэглэх болсон. Сүүлийн үед энэ төрлийн талхны хэрэглээ ихэсч, гурилан бүтээгдэхүүний зах зээлд хөх тарианы гурилаар хийсэн бүтээгдэхүүн хүч түрэн орж ирж байна. Зарим айл хар талхыг улаанбуудайн талхнаас илүү ихээр хэрэглэдэг болсон байна лээ.

Гэтэл “Магтсан хүүхэн хуримандаа унгана” гэгчийн үлгэрээр өнөөх сайн гээд магтаж, сайшаагаад байсан талх нь жинхэнэ хөх тарианы талх биш хөх өнгийн будагч бодистой талх байж таарлаа. МХЕГ-аас талх, нарийн боов үйлдвэрлэгч компаниудад хийсэн шалгалтаар хөх тарианы талх хийж байгаа газруудын олонхиос ийм зөрчил илэрсэн байна.

Үйлдвэрлэгчид талхныхаа шошгон дээр 100 хувь хөх тарианы талх гэж бичсэн байдаг. Гэтэл манайд дан ганц хөх тариан гурилаар, стандартын дагуу талх хийдэг үйлдвэр байдаггүй аж. Тэд талх хийхдээ хөх тарианы талхыг буудайн гурилтай хольж дээр нь хүнсний элдэв нэмэлтүүд ашигладаг гэнэ.

Хөх тарианы талх үйлдвэрлэх нь буудайн гурилаар талх хийж байгаатай адил амар ажил биш бөгөөд нарийн технологи шаарддаг юм байна. Талхны хөрөнгө бэлтгэх, зуурмаг хийх гээд олон үе шат дамжиж, хоёроос гурван өдөр болдог аж. Тиймээс одоогоор манайд хөх тарианы талхыг технологийнх нь дагуу хийж байгаа үйлдвэр бараг алга.

Гурил исэх явцыг түргэсгэхийн тулд тусгай исгэгч хэрэглэж, талхны өнгө үзэмжийг сайжруулж, стандартад нийцүүлэхийн тулд хүнсний нэмэлтүүд хийдэг. Мөн хөх тарианы талх амархан мууддаг учраас талхны хадгалалтын хугацааг уртасгахын тулд энэ бодисыг хэрэглэдэг аж.

Улаан буудайн гурил нь цардуул ихтэй учраас зуурахад амархан байдаг. Харин хөх тарианы гурил цардуул агуулдаггүй болохоор талх хийхэд хүндрэлтэй байдаг юм байна. Иймээс л үйлдвэрлэгчид талх үйлдвэрлэхдээ элдэв нэмэлт бүтээгдэхүүн хэрэглэдэг гэнэ.

Тэд цагаан өнгийн гурилыг хар өнгийн будагч бодисоор өнгө оруулаад хөх тарианы талх гэж борлуулж байсан. Хамгийн ноцтой нь хоёр, гурван үйлдвэр талхныхаа хадгалалтын хугацааг нэмэгдүүлэхийн тулд “Карамель колор” гэдэг бодис хийсэн байж. Энэ бодисыг өөр хүнсний бүтээгдэхүүнд хэрэглэдэг бөгөөд талханд хэрэглэх хориотой байдаг аж. Учир нь талх хийх явцад задрал үүсч хүний биед хор нөлөө учруулж болзошгүй байдаг байна.

Энэ мэтээр үйлдвэрлэгчид ашиг харсан аминчхан үзлээсээ болж иргэдийг хуурч, цаашлаад хохироож байна. Биед тустай гэж хэрэглэдэг бүтээгдэхүүн нь тус биш ус болж байна. Мэдээж хэрэг МХЕГ-аас эдгээр зөрчил гаргасан талхны үйлдвэрүүдэд зохих арга хэмжээг авсан байна. Гэсэн ч талхны үйлдвэрүүд одоог хүртэл энэ асуудлаа цэгцлээгүй байгаа юм.

Үйлдвэрлэгчид ядаж хөх тарианы талхны найрлагад орсон бүтээгдэхүүний хэмжээг зөв бичих ёстой. Гэтэл 100 хувь хөх тарианы талхаар хийсэн бүтээгдэхүүн гээд л нүдээ аниад зүтгүүлээд байна. Ядаж 50 хувь гэдэг ч юм уу, үнэнээр нь бичвэл хэрэглэгчид өөрсдийн сонголтоо хийх нь мэдээж. Манай улс хөх тариа тариалдаггүй учраас бүх үйлдвэрүүд 100 хувь хөх тарианы гурилаар талх хийж чадахгүй болов уу.

Мэдээж хэрэг талхны үнэр амтыг сайжруулдаг зориулалтын зөвшөөрөгдсөн хүнсний нэмэлтүүд бий. Энэ нэмэлтүүд нь хүний биед ямар нэг сөрөг нөлөөгүй болохоор гадны олон оронд хэрэглэдэг. Манай үйлдвэрүүд ч хэрэглэж байгаа. Гэтэл химийн аргаар гаргаж авсан будагч бодисууд нь хүний биед олон сөрөг нөлөөтэй байдаг.

Манай зарим үйлдвэр химийн аргаар боловсруулсан будагч бодис хэрэглэдэг байна. Уг нь хүнсний нэмэлт бодисын стандарт гэж байгаа. Энэ стандартад хүнсний нэмэлт бүтээгдэхүүнийг юунд хэрэглэж болох, юунд хэрэглэж болохгүйг заасан байдаг. Харин манайд энэ стандартыг барьж байгаа үйлдвэр байхгүй гэхэд болно. Тиймээс иргэд хүнсэнд хэрэглэх талхаа өөрсдөө зөв сонгож таарах нь ээ.

Хөх тарианы талх нь улаан буудайн гурилаас хүнд байдаг бөгөөд үнэр нь өвөрмөц байдаг юм байна. Мөн талхны дотор тал нь бусад талхыг бодвол чийг өндөртэй байдаг. Иргэд энэ төрлийн талхыг сонгохдоо орц найрлага, хаяг шошгыг нь сайтар харах хэрэгтэй аж.

Н.Санжаасүрэн