Азтай гишүүний аз нь шовойсоор

Парламентын босгоор азтай тохиолдлоор алхсан тэрбээр УИХ-ын Нийгмийн бодлого, боловсрол, соёл, шинжлэх ухааны байнгын хорооны даргаар сонгогдон суга дэвшсэн хүн бол УИХ-ын гишүүн З.Баянсэлэнгэ. Тэрбээр гудамжны тэмцэгч бөгөөд Чингэлтэй дүүргийн гэр хороололд амьдардагаа нуудаггүй.

Гэвч түүнийг намыхан нь өөд нь татахаар шийдсэн бололтой. Улсын 220 сая төгрөгөөр байртай болгохоор зүтгүүлж эхэлсэн сурагтай. Төсвийн байнгын хороо 2013 оны төсвийн төслийг Сангийн яаманд хүргүүлэхээр өчигдөр шийдвэрлэсэн. Шинэ Парламентын гишүүдийн орон сууцны хэрэгцээнд 220 сая төгрөг төлөвлөөд байгаа нь анхаарал татаж байгаа юм.

Учир нь гишүүдийн орон сууцны зориулалтаар өнгөрсөн жил 500 сая төгрөг тусгуулахаар УИХ-д оруулж байсан. Тэр үед энэ зардлыг хэлэлцүүлгийн үеэр шууд хассан. Харин энэ удаад УИХ-ын Тамгын газарт орон сууцтай холбоотой тулгамдсан асуудал орж ирж байгаа учраас 220 сая төгрөг тусгасан байна.

Энэ нь Улаанбаатарын цэмцгэр хороололд гурван өрөө байр худалдан авахад л хүрэлцэх мөнгө билээ. УИХ-ын шинэ гишүүдийн дотор орон сууцгүй нэг бус эрхэм байдаг аж. Тэднээс нэн түрүүнд З.Баянсэлэнгэд магадлалтай аж.