Чуулганы өмнө байнгын хороотой

Өнөөдөр 11.00 цагаас УИХ-ын анхдугаар чуулганыг зарлаад буй. Гэхдээ түүний өмнө 10.00 цагаас Төрийн байгуулалтын байнгын хороо хуралдаж, даргаа тодруулах учиртай. Тус байнгын хороог долдугаар сарын 25-нд АН, МАХН-МҮАН-ын “Шударга ёс” эвслийн 18 гишүүнээс бүрдүүлсэн. Яагаад ч юм ИЗНН, бие даагч гишүүдээс түүнд оруулаагүй.

Байнгын хорооны бүрэлдэхүүнд Н.Алтанхуяг, А.Бакей, Ж.Батзандан, Д.Бат-Эрдэнэ, М.Батчимэг, Д.Батцогт, Н.Батцэрэг, С.Баярцогт, Р.Бурмаа, Р.Гончигдорж, Б.Наранхүү, С.Одонтуяа, Ч.Сайханбилэг, М.Сономпил, Ш.Түвдэндорж, Х.Тэмүүжин, Л.Цог, Д.Эрдэнэбат нарын гишүүд багтаад байгаа юм.

Тус байнгын хороо даргаа тодруулбал чуулганы хуралдаанд оруулж батлах юм. Мөн өдөр бүр бэлтгэлээ ханган хүлээж буй Ц.Цолмон, О.Баасанхүү нар тангаргаа өргөнө. Бас хоёр ч байнгын хороог нэмж байгуулах учиртай.