Дөрвөн тэрбум хүн Зуны ХХХ олимпийн нээлтийн ажиллагааг хүлээн авлаа

Тэртээ 1908 ба 1948 онуудад хоёр ч удаа олимп зохион байгуулж байсан Лондон хотноо Зуны XXX олимп ёслол төгөлдөр нээлтээ хийлээ.

Манай цагаар 28-ны 04.00 цагт эхэлсэн нээлтийн ажиллагаанд Британийн аж үйлдвэрийн хувьсгал болоод тус улсын түүх, урлагийн одууд, үлгэрийн баатрууд гээд Англиар овоглогдсон бүхнээ бахархан өгүүлжээ. Зуны олимпийн нээлтийн ёслолын ажиллагааг “Ядуусын хорооллын саятан” киногоороо Оскар хүртсэн Их Британийн нэрт найруулагч Дэнни Бойл “Гайхамшигт арал” нэртэйгээр найруулсан юм.

Зуны XXX олимпод оролцож буй 205 орныг билэгдсэн гэрэлт цэцэгс нэгдэн нийлж, энэ мөчид дэлхий даяараа энхтайвнаар нэгдэн нийллээ.

Долоон залуу тамирчинд моторт завь жолоодон ирсэн Дэвид Бэкхем Олимпийн бамбарыг дамжуулсан. Улмаар Сара Стевинсон олимпийн наадмын туршид шудрагаар өрсөлдөх тамирчдын тангараг өргөлөө. Ингээд ариун гал бадамлан асч нээлтийн ажиллагааны урлагийн тоглолт эхэлсэн юм.

Урлагийн тоглолтоор дээр өгүүлсэнчлэн тус улсын түүхэн чухал үйл явдлуудыг үлгэрийн баатруудаар зангидан хүргэж, Англи улсын бүхий л сайн сайхныг дэлхий дахин гайхан биширлээ.

Харри Поттер номын баатрууд, үлгэрт гардаг сахилгагүй хүүхдүүдийг хүмүүжүүлэгч хатагтай Мэри Попинс, Петер Пэн, Ахмад Дэгээ, алдарт тагнуулч 007 Жэймс Бонд, Англичуудыг хөгжөөгч Мистер Бинн, Хөлбөмбөгийн од Дэвид Бэкхем гээд тус улсын алдартнууд цөм нээлтийн ажиллагаанд оролцжээ.

Гурван цаг үргэлжилсэн нээлтийн ажиллагааг домогт Битлз хамтлагийн дуучин Пол Маккартни “Хэй Жүүд” дуугаараа хаасан юм.

Дэлхий дахинд байгалиа хайрлан хамгаалах сэтгэгдлийг төрүүлнэ хэмээсэн “Гайхамшигт арал” нэртэй олимпийн нээлтийн ажиллагаанд 27 сая паунд зарцуулж, 15 мянган хүнийг оролцуулжээ. Зөвхөн Үндэсний эрүүл мэндийн үйлчилгээнийхээ талаар өгүүлсэн хэсэгт л гэхэд 600 бүжигчин, 320 ор байлцуулсан байна.
Дэлхий даяар нээлтийн үйл ажиллагааг дөрвөн тэрбум хүн хүлээн авч үзжээ. Харин олимпийн нээлтийн ажиллагааг өөрийн биеэр 80 мянган үзэж сонирхсон юм.

Жич: Та бүхэн холбоотой мэдээнээс олимпийн нээлтийн ажиллагааны фото зургийг хүлээн авна уу.

М.Жаргал

gogo.mn