Д.Баттулга дарга аа байшингаа баримаар байна, зөвшөөрөл олгоно уу

Нийслэлийн иргэдийн төлөөлөгчдийн хурлын тэргүүлэгчдийн дарга Д.Баттулга хэд хоногийн өмнө шинээр барилгын ажил эхлүүлэхгүй байх шийдвэр гаргав. Учир нь түүний нэр дээр орон сууцны хороололд хууль бусаар газар олгогдсон, мөн барилга барихаар хашаа хатгаж газар шорооны ажил эхлүүлэх гэж байгаа талаар санал гомдол ирсэнтэй холбоотой гэнэ. Дээрх гомдлыг үндэслэн “Ойрын үед Нийслэлийн Засаг дарга бөгөөд Улаанбаатар хотын захирагч, Сууц өмчлөгчдийн холбооны дээд зөвлөлийн ерөнхийлөгчийн хооронд 2008 онд байгуулсан санамж бичгийн хэрэгжилт болон газар олголтын асуудлаар нийслэлийн ИТХ-аар хэлэлцэхээр төлөвлөж байгаа тул энэ хугацаанд улсын болон нийслэлийн төсвийн хөрөнгөөр хийх барилгын ажлаас бусад барилгын ажил шинээр эхлүүлэхгүй байхыг мэдэгдье” гэсэн хатуу шийдвэрт хүрчээ.

Замын түгжээ, бөглөрөл, өндөр барилга, шавааралдсан нийслэл хотын барилгажилтын асуудлыг цэгцлэх нь гэсэн таатай мэдээлэл санагдлаа. Хууль бус газар олголт, эрх мэдэлтнүүдийн газрын наймааг хазаарлаж байна гэсэн өег сэтгэлээр харав. Гэвч тийм биш бололтой. Уг нь нийслэл хотод барилгын ажлыг цэгцтэй явуулах нь зүйтэй ч зарим иргэдэд дээрх шийдвэр хүндээр туссанаа дуулгаж байна. Энэ шийдвэр жирийн иргэдийн бизнес хийх, хувийн орон сууцаа барих эрхийг нь хаачихжээ. Тодруулбал энэ талаар нэгэн танил маань хуучиллаа. Үйлчилгээний зориулалтаар хотын төвөөс зайдуухан барилга барихаар зэхэж байсан ч ажил нь энэ шийдвэртэй холбоотойгоор зогссон талаар учирлав. Мань эр хувийн эзэмшлийнхээ газар дээр багахан үйлчилгээний төв барихаар төлөвлөж, барилгын ажил эхлүүлэх зөвшөөрөл авахаар Нийслэлийн мэргэжлийн хяналтын газарт хүсэлтээ хүргүүлсэнийн хариуд НИТХ-ын тэргүүлэгчдийн дарга Д.Баттулгын шийдвэрийг уншиж танилцуулсан байна. Ингээд л түүний ажил бүтэлгүүтчихжээ.

Хамгийн гол нь түүний барилга барих, үйлчилгээний төвийн ажлаа эхлүүлэх нь гол биш банкнаас их хэмжээний зээл авсан нь түүнийг бухимдуулахад хүргээд байгаа ажээ. Сар өдөр ирэх тусам банкны хүү өсөж, түүнийг хохироож байгаад тэрээр ундууцаж байгаа юм. Ийм л учраас олон иргэд, жижиг бизнес эрхлэгчийн эсрэг, тэдэнд хохиролтой шийдвэр гарчихлаа гэж хэлэхээс өөр аргагүй байна. Түүнчлэн барилга барих зөвшөөрлийг нийтээр нь хаасан нь бизнес эрхлэгч төдийгүй, энгийн иргэдийг ч хөлдөө чирэв.

Албан тоотод дурьдаснаар Орон сууцны хороололд газар хууль бусаар олгогдсон, мөн барилга барихаар хашаа хатгаж газар шорооны ажил эхлүүлэх гэж байгаа талаар санал гомдол ихээр ирснийг үндэслэн дээрх шийдвэрт хүрсэн гэнэ. Барилгын ажил эхлүүлэхгүй байх шийдвэр гаргах болсон нь зөвхөн иргэдийн санал гомдолыг үндэслэн шийдвэр гаргасан гэж ойлгогдож байгаа юм. Д.Баттулга дарга ч албан тоотдоо тэгж дурьдсан байна.

Гэтэл хэсэг бүлэг иргэдийн санал гомдолыг үндэслээд хэдэн мянган жирийн иргэд, бизнеснийхний амьдрал, эрх ашгийг хаагдуулж болно гэж үү. Зөрчилтэй, хууль бусаар газар авсан, эрх мэдэлтэй нэгэн барилга барихаар зэхэж байгаа л байх. Тэдэнд бол харин төрийн байгууллагын зүгээс хяналтаа тавих нь зүйн хэрэг. Харин нийтээр нь хоморголон хувийн байшингаа барих, бизнесээ эрхлэх эрхийг нь хаагдуулж боломгүй байлтай.

Зөрчилтэй хууль бус газар авсаныг нь ялгаж, салгаж барилга барих эрхийг нь хаах, хариуцлага тооцох ёстой байтал, нийтээр нь зөвшөөрөл олгохгүй гэсэн шийдвэр нь арай л хэтийдчихлээ дээ.
Угтаа бол НИТХ-ын шийдвэртэй, шийдвэргүй дээрх гомдол саналыг шийдээд явж байгаа юм. Газартай холбоотой маргаан, санал шүүмжлэлийг Захиргааны хэргийн шүүх шийддэг учиртай. Тийм байтал өмнүүр нь ороод Д.Баттулга дарга албан тоот үйлдсэн нь байгаа оносонгүй, хэтийдсэн шийдвэр боллоо гэж дүгнэхээс өөр аргагүй байна. Баримт дурьдахад Захиргааны хэргийн шүүхэд шийдэгдсэн газрын маргаантай холбоотой шүүхийн шийдвэрийн 70 хувь нь иргэдийн талд гарсан байх юм. Үүнээс үзэхэд Захиргааны хэргийн шүүхэд НИТХ-ын туслалцаа хэрэггүй ч юм шиг.

Хэн нэгний санал, шүүмжлэл ирүүлсний дагуу ямар ч үндэслэлгүйгээр олон нийтийн эрх ашгийг хөндсөн ийм шийдвэр гаргаад байвал юу болох бэ. Д.Баттулга дарга уг нь ажлаа аваад 10 ч хүрэхгүй хоногийн дараа ийм шийдвэрийг гаргасан. Тэгэхээр энэ хугацаанд ийм том шийдвэрт хүрэх санал гомдол ирсэн юм болов уу, аль эсвэл Нийслэлийн иргэдэд таалагдах гэсэн хөнгөн хуумгай шийдвэр гаргачих вуу. Ямартай ч судлагаа, үндэслэл муутайгаас ийм шийдвэрт хүрсэн нь иргэд, бизнес эрхлэгчдийн эрхэд ноцтойгоор халдчихав.
Нөгөөтэйгүүр НИТХ-ын сонгуульд С.Бат-Үүл баатар, Д.Баттулга нараар удирдуулсан багийнхан нийслэлийн иргэдийг хувийн орон сууц, хаус, барилгажуулахаар амлалт өгч гарч ирсэн нь хааччихваа. Хэдхэн хоногийн дотор тэдний бодол өөрчлөгчихсөн гэж үү. Нийслэлийн иргэд амлалт өгсний дагуу хашаандаа байшингаа барихаар зэхэж байсан ч дээрх “хөөстэй” шийдвэрээс болоод мөн л гацчихлаа.

Жижиг дунд бизнес эрхлэгч, иргэд барилгын ажлаа эхлэхгүй бол барилга барих “сезоны үе” ч хэзээ мөдгүй дуусна. Эрс тэс уур амьсгалтай, манай оронд зун, намрын эхэн саруудад л барилгын ажил идэвхтэй өрнөдөг. Гэвч тэр оргил цагаар нь барилга барих зөвшөөрөл олгохгүй болсон нь олон хүнд таатай санагдахгүй байгааг Д.Баттулга дарга та ойлгож буй бизээ. Цаашид судалгаа шинжилгээ, үндэслэлтэйгээр шийдвэрээ гаргаж байхыг захих байна.

Т.АМУР
Оллоо.мн