Монголын баг тамирчидын олимпод үзүүлж байсан амжилтуудаас

Удахгүй болох гэж байгаа Лондонгийн олимптой холбоотойгоор бид та бүхэнд олимпийн талаарх мэдээ материалуудыг сонирхуулж байгаа билээ. Үүний өмнө та бүхэндээ хүн төрөлхтөний сэдсэн олимпийн наадмын үүсэл гарлын тухай танилцуулсан. Харин энэ удаа Монгол улсын олимпийн түүхийн талаар танилцуулж байна.

Монголын баг тамирчид 1964 оноос эхлэн олимпийн наадамд оролцож эхэлсэн юм. Түүнээс хойш чөлөөт бөх, бокс, буудлага, жүдо бөхийн төрлүүдээр нийт 5 мөнгө, 10 хүрэл медаль хүртээд байна. Та бүхэнд тамирчдынхаа үзүүлж байсан амжилтуудаас танилцуулъя.

Жигжидийн Мөнхбат
“Мехико-68″ XIX олимпийн МӨНГӨН МЕДАЛЬ
1941 онд Төв аймгийн Эрдэнэсант суманд төрсөн.
“Мехико-1968” зуны XIX олимпийн наадмын чөлөөт бөхийн 87 кг-ын жингийн мөнгөн медальт
1967 оны бөхийн чөлөөт барилдааны хүрэл медальт
1973 оны Ази тивийн аварга
Үндэсний их баяр наадамд 6 удаа түрүүлсэн /1963, 1964, 1965, 1966, 1967, 1974/
Монгол улсын хөдөлмөрийн баатар, гавьяат тамирчин, үндэсний бөхийн дархан аварга

Хорлоогийн Баянмөнх
“Мюнхен-72″ XX олимпийн МӨНГӨН МЕДАЛЬ
1944 онд Увс аймгийн Хяргас суманд төрсөн.
“Мюнхен-1972” зуны XX олимпийн наадмын чөлөөт бөхийн100 кг-ын жингийн мөнгөн медальт
Бөхийн Чөлөөт /1975/, самбо барилдааны дэлхийн аварга,
1973 оны Ази тивийн аварга,
“Тегран-1974 “Азийн наадмын аварга
Чөлөөт бөхийн Дэлхийн аварга шалгаруулах тэмцээний 2 мөнгөн медальт
Үндэсний их баяр наадамд 10 удаа түрүүлсэн. /1968, 1971, 1972, 1973, 1975, 1977, 1979, 1980, 1981, 1987/
Монгол улсын хөдөлмөрийн баатар, Монгол улс, ЗХУ-ын спортын гавьяат тамирчин, сурган хүмүүжүүлэх ухааны доктор, үндэсний бөхийн дархан аварга

Чимэдбазарын Дамдиншарав
“Мехико-68″ XIX олимпийн ХҮРЭЛ МЕДАЛЬ
1945 онд Өвөрхангай аймгийн Гучин-Ус суманд төрсөн.
“Мехико-1968” зуны XIX олимпийн наадмын чөлөөт бөхийн 52 кг-ын жингийн хүрэл медальт.

Монгол улсын гавьяат тамирчин Төмөрийн Артаг
“Мехико-68″ XIX олимпийн ХҮРЭЛ МЕДАЛЬ
1943 онд Увс аймгийн Тэс суманд төрсөн.
“Мехико-1968” зуны XIX олимпийн наадмын чөлөөт бөхийн 78 кг-ын жингийн хүрэл медальт, Монгол улсын гавьяат тамирчин, үндэсний бөхийн улсын начин.
1993 онд таалал төгссөн



Данзадаржаагийн Сэрээтэр
“Мехико-68″ XIX олимпийн ХҮРЭЛ МЕДАЛЬ
1943 онд Төв аймгийн Лүн суманд төрсөн. 1973 онд УБИС-ийг дүүргэсэн. 1960 оноос Цагдаагийн газар, НАХЯ, ХААИС, УБИС зэрэг байгууллагуудад багш, дасгалжуулагчийн ажил хийж байсан. 1962-1973 онд бөхийн чөлөөт барилдааны улсын шигшээ багийн гишүүн.

Амжилт:
1968 оны Мехикогийн олимпийн наадмын чөлөөт бөхийн 70 кг-ын жинд хүрэл медаль авсан.
1970 онд Канадын Эдмонтон хотод болсон Дэлхийн аварга шалгаруулах тэмцээний хүрэл медальт
1971 оны дэлхийн аварга шалгаруулах тэмцээний 6 дугаар байрын шагналт
1966-1968 оны Дан Колов, Тбилисийн олон улсын тэмцээнүүдийн алт, мөнгө, хүрэл медальт
1963-1969 оны улсын аварга Монголын бүх ард түмний спартикиадын 2 удаагийн аварга, 1974 оны Иран улсын Тегран хотод болсон Азийн наадмын мөнгө медальт. Ах дүү армиудын олон улсын тэмцээний 4 удаагийн аварга, Шерманы олон улсын тэмцээний алт, Ираны олон улсын тэмцээний мөнгөн медаль хүртсэн. 1968 онд Монгол улсын гавьяат тамирчин цол хүртсэн. Үндэсний бөхийн улсын харцага цолтой.

Зэвэгийн Ойдов
“Монреаль-76″ XXI олимпийн МӨНГӨН МЕДАЛЬ
1949 оны зуны дунд сард Өвөрхангай аймгийн Хархорин суманд төрсөн.
1965 оноос чөлөөт бөхөөр хичээллэсэн.
1969- 1980 онд улсын шигшээ багт тамирчин,
1980-1992 онд улсын багшийн дээд сургуульд багш,
1993 онд Энэтхэг улсын чөлөөт бөхийн шигшээ багийн ахлах дасгалжуулагч,
1996-1996 онд улсын шигшээ багийн ерөнхий дасгалжуулагч,
1997-2002 онд “НИК” спорт клубын дасгалжуулагчаар ажиллаж байсан.
2002 оноос БТДС-д багшаар ажиллаж байна.

Ц.Бямбаа, Д.Хашбат, О.Цэрэндагва, С.Магсар нарын удирдлагад бэлтгэл хийж байсан.

1971 онд спортын мастер, 1974 онд спортын гавьяат тамирчин, 1994 онд Монгол улсын хөдөлмөрийн баатар цол хүртсэн. 1975 онд Сүхбаатарын одонгоор шагнагдсан.

1999 онд зохиогдсон “OLYMPIC GALA” ёслолоос Монгол улсын зууны манлай бөхөөр өргөмжлөгдсөн. Чөлөөт бөхийн дэлхийн хошой аварга, олимпийн мөнгөн медальт.

Амжилт:
1967 он Өсвөр үеийн улсын аварга, Бүх ард түмний III спартикиадын VIII байрт оров.
1969 он Улсын аварга шалгаруулах тэмцээний IV байр
1970 он Социалист орнуудын “Найрамдал” олон улсын тэмцээний аварга,
1971 он Бүх ард түмний IV спартикиадын аварга
1972 он Олон улсын “Интернациональ” тэмцээний аварга, Улсын аварга шалгаруулах тэмцээний хүрэл медаль
1973 он Ази тивийн аварга, “Интернациональ”, ах дүү армиудын “Найрамдал”, Унгарын олон улсын тэмцээнүүдийн аварга, Улсын аварга
1974 он Дэлхийн аварга, “Интернациональ”, “Дан Колов”-ын олон улсын тэмцээний аварга, Азийн наадмын мөнгө, Унгарын олон улсын тэмцээний хүрэл медаль,
1975 он Дэлхийн аварга, Румын, Германы олон улсын тэмцээний аварга, Польшийн олон улсын тэмцээний мөнгө,
1976 он Монералийн олимпийн мөнгөн медаль, “Интернациональ”, “Найрамдал” тэмцээний аварга, Тбилисийн олон улсын тэмцээний мөнгөн медаль
1977 он Дэлхийн аварга шалгаруулах тэмцээний хүрэл медаль, Дэлхийн оюутны “Универсиад” наадмын аварга, Улсын аварга, “Нөхөрлөл” олон улсын тэмцээний аварга
1978 он Азийн наадмын аварга, Улсын аварга, “Нөхөрлөл” олон улсын тэмцээний аварга, дэлхийн аварга шалгаруулах тэмцээний IV байрын шагналт
1979 он Бүх ард түмний VI спартикиадын аварга, “Нөхөрлөл” олон улсын тэмцээний аварга
1980 он “Интернациональ”, Румын, Германы олон улсын тэмцээний аварга, Тбилисийн олон улсын тэмцээний мөнгөн медальт

Жамцын Даваажав
“Москва-80″ XXII олимпийн МӨНГӨН МЕДАЛЬ

1952 онд Булган аймгийн Тэшиг суманд төрсөн.

“Москва-1980” зуны олимпийн XXII наадмын чөлөөт бөхийн 74 кг-ын жингийн мөнгөн медальт, Монгол улсын гавьяат тамирчин, үндэсний бөхийн улсын начин

2000 онд таалал төгссөн.

Цэндийн Дамдин
“Москва-80″ XXII олимпийн МӨНГӨН МЕДАЛЬ
1957 онд Хэнтий аймгийн суманд төрсөн. Уул уурхайн инженер, Биеийн тамирын багш дасгалжуулагч мэргэжилтэй.
2000-2004 онд МҮОХ-ны ерөнхий нарийн бичгийн даргаар ажиллаж байсан. 2004 оноос дэд ерөнхийлөгчийн албыг хашиж байна.
“Москва-1980” зуны олимпийн XXII наадмын жүдо бөхийн төрлийн 65 кг-ийн жинд мөнгөн медаль хүртсэн.
Монгол улсын гавьяат тамирчин, үндэсний бөхийн улсын начин. Самбо бөхийн дэлхийн залуучуудын аварга.

Дугарсүрэнгийн Оюунболд
“Москва-80″ XXII олимпийн ХҮРЭЛ МЕДАЛЬ
1957 онд Сэлэнгэ аймгийн Сүхбаатар хотод төрсөн.
“Москва-1980” зуны олимпийн XXII наадмын чөлөөт бөхийн төрлийн 57 кг-ийн жинд мөнгөн медаль хүртсэн.
Дэлхийн аварга шалгаруулах тэмцээний хүрэл медальтай.
2002 онд таалал төгссөн.

Равдангийн Даваадалай
“Москва-80″ XXII олимпийн ХҮРЭЛ МЕДАЛЬ
1950 онд Ховд аймгийн Дарви суманд төрсөн.
“Москва-1980” зуны олимпийн XXII наадмын жүдо бөхийн төрлийн 71 кг-ийн жинд хүрэл медаль хүртсэн.
Монгол улсын гавьяат тамирчин, үндэсний бөхийн улсын начин. Самбо бөхийн дэлхийн аварга.

Нэргүйн Энхбат
“Сөүл-88″ XXIV олимпийн ХҮРЭЛ МЕДАЛЬ
1962 оны 3 дугаар сарын 19-нд Улаанбаатар хотод төрсөн.
1979 онд нийслэлийн 10 жилийн 20 дугаар сургууль,1985 онд МУИС-ын эдийн засгийн ангийг тус тус төгссөн. Анх хөрш ангийн анд Н.Нарантуяагийн нөлөөгөөр гавьяат дасгалжуулагч Д.Бандийн удирдлагад боксын спортоор хичээллэж эхэлсэн. Улсын шигшээ багт гавьяат дасгалжуулагч В.Батбаяр, гавьяат тамирчин Х.Алтанхуяг нарын удирдлагад бэлтгэл сургуулиа хийж байсан.
1979-1989 онд үндэсний шигшээ багийн тамирчин,
1989-1993 онд спорт сургалтын төв, үндэсний шигшээ багийн дасгалжуулагч, 1999-2001 онд МҮОХ-ний ахлах мэргэжилтнээр ажиллаж байсан. Одоо гэр бүлийн хамт АНУ-д ажиллаж амьдарч байна. Эхнэр 2 хүүхэдтэй. Гэргий Ундраа их эмчийн мэргэжилтэй. Нийт 312 тулаанд оролцож 240 ялалт байгуулсан.

Амжилт:
1988 онд Сөүлийн олимпийн наадмын боксын тэмцээний 60 кг ийн жинд хүрэл медаль хүртэж уг олимпоос Монголын багийн авсан цорын ганц медалийн эзэн болсон. Олимпийн тэмцээнд эхний тойрогт хийлж дараа нь Унгарын тамирчин И.Туруг хожоод шөвгийн наймд Мароккогийн боксчин Х.Маржуанег 5:0 харьцаагаар илт давуу ялж хүрэл медалийн болзол хангаад мөнгөн медалийн төлөө Шведийн Г.Крамнед тэнцүү тоглолтоос 2:3 оноогоор хожигджээ. 1984 онд Куба улсад болсон “Найрамдал 84″ тэмцээнд аваргын төлөө Кубын нэрт боксчин олимпийн хошой аварга А. Эррерад 2:3 оноогоор хожигдож мөнгөн медаль авсан. 1989 онд БНХАУ- ын Бээжинд хотод болсон тэмцээнд 63.5 кг-ын жинд Ази тивийн аварга болсон. 1987 онд Кувейт улсын Эль Кувейт хотод болсон Ази тивийн аварга шалгаруулах тэмцээнээс мөнгөн медаль авсан.

1989 оны 2 дугаар сарын 6-нд Монгол улсын гавьяат тамирчин цол хүртсэн. 1989 онд болсон Москвагийн ДАШТ-нд жиндээ шөвгийн наймд үлдсэн.

Дэлхийн шилдэг боксчдын жагсаалтанд жингийнхээ 3-7 дугаар байрт нийтдээ 7 удаа бичигдсэн.
1986 онд Москва хотод болсон сайн санааны тоглолтын хүрэл медальтай.

Герман улсын Халле хотод болдог “Химийн цом” олон улсын тэмцээний 2 алт /1983,1986/, 1 мөнгө /1985/ Румын улсын Бухарест хотноо болдог “Алтан бүс” олон улсын тэмцээний 2 алт /1984, 1986/ 1 мөнгөн /1983/ медальтай.

ЗХУ, БНАСАУ, БНСУ-ын олон улсын тэмцээний аварга, Улаанбаатар хотноо болдог “Интернациональ”, “Улаанбаатарын цом” тэмцээнүүдийн аварга, Монгол улсын 6 удаагийн аварга /1982-1987/ Бүх ард түмний VII спартикиадын аварга, ЗХУ-ын бүх ард түмний спартикиадын хүрэл медальтай.

Намжилын Баярсайхан
“Барселона-92″ XXV олимпийн ХҮРЭЛ МЕДАЛЬ
1965 онд Завхан аймагт төрсөн.
1998 онд Цагдаагийн академи, 2004 онд Удирдлагын академи төгссөн. Эрх зүйч, төрийн удирдлагын менежер мэргэжилтэй. Одоо Гаалийн ерөнхий газрын ахлах байцаагчаар ажилладаг.

Амжилт:
1992 оны Барселоны Олимпийн наадмын боксын 60 кг-ын жинд Хүрэл медаль хүртсэн.
1987 онд Кувейт, 1989 онд БНХАУ-д зохиогдсон Азий тивийн аварга шалгаруулах тэмцээнээс алтан медаль авсан. Дэлхийн аварга шалгаруулах тэмцээний шөвгийн наймд 2 удаа үлдсэн. /1989, Москва, 1991, Сидней/ Монгол улсын 2 удаагийн аварга,
Улаанбаатар хотноо зохиогддог олон улсын Интернациналь тэмцээний 5 удаагийн аварга
1989, 1990 онд Чехийн Мустина Лабе олон улсын тэмцээний мөнгө, БНАСАУ-д зохиогддог олон улсын тэмцээнээс 2 алт, 1 мөнгө, ОХУ-ын олон улсын тэмцээнээс 2 мөнгө, Филиппин улсад зохиогдсон олимпийн наадамд эрх олгох тэмцээнээс мөнгөн медаль тус тус хүртсэн.

Дэлхийн шилдэг боксчдын жагсаалтанд 3 удаа бичигдсэн. /1989, 1991, 1992/
1992 онд Монгол улсын гавьяат тамирчин цол хүртсэн. Азийн боксын холбооны шүүгчийн зэрэгтэй.

Доржсүрэнгийн Мөнхбаяр
“Барселона-92″ XXV олимпийн ХҮРЭЛ МЕДАЛЬ
1969 онд Улаанбаатар хотод төрсөн.
“Барселона-1992” Зуны олимпийн XXV наадмын буудлагын спорт гар бууны дасгалд хүрэл медаль хүртсэн.
1997 онд Испани улсын Барселона хотод зохиогдсон буудлагын дэлхийн аварга шалгаруулах тэмцээнд хувийн дүнгээр АЛТ, багаараа хүрэл медаль авсан.

Доржпаламын Нармандах
“Атланта-96″ XXVI олимпийн ХҮРЭЛ МЕДАЛЬ
1975 онд Дархан хотод төрсөн.
“Атланта -1996” Зуны олимпийн XXVI наадмын жүдо бөхийн 60 кг-ын жинд хүрэл медаль авсан.
Ази тивийн аварга Монгол улсын гавьяат тамирчин. 1999 оны дэлхийн аварга шалгаруулах тэмцээний 5 дугаар байрын шагналт.

Хашбаатарын Цагаанбаатар
“Афин-2004″ XXVIII олимпийн ХҮРЭЛ МЕДАЛЬ
1984 оны 3 дугаар сарын 19 -нд Увс аймгийн Баруунтуруун суманд төрсөн. “Аварга” Биеийн тамирын дээд сургуулийг төгссөн.
169 см өндөр, 66 кг 1995 оноос анх жүдо барилдаанаар хичээллэж эхэлсэн. Олимпийн наадмын дараагаас 66 кг жинд барилддаг болсон.
Монгол улсын гавьяат дасгалжуулагч Ч.Насантогтохын удирдлагад хичээллэдэг. Сагсан бөмбөг сонирхдог. Буддын шашин шүтдэг.

Амжилт:
2004 оны Афины олимпийн наадмын 60 кг-ийн жинд хүрэл медаль хүртсэн.
2003 онд 60 кг, 2005 онд 66 кг-ийн жинд Ази тивийн аварга болсон. 2002 оны Оюутны универсиадын хүрэл медальт
2005 оны самбо барилдааны дэлхийн аварга, 2004 оны Монгол улсын манлай тамирчин.
2006 онд Азийн XV наадмын аварга, Оюутны дэлхийн аварга, Зүүн Азийн аварга “Korea Open” тэмцээний аварга цолыг тус тус хүртсэн. 2007 оны улсын аварга.



Найдангийн Түвшинбаяр
“Бээжин- 2008″ XXIX олимпийн АЛТАН МЕДАЛЬ
1984 оны зургаадугаар сарын 1-нд Булган аймгийн Сайхан суманд төрсөн. “Аварга” биеийн тамирын дээд сургуулийг багш дасгалжуулагчийн мэргэжлээр төгссөн.
Биеийн өндөр. 178 см. Бөхийн спортоор 2002 оноос буюу 18 наснаасаа эхлэн хичээллэсэн.  Жин 104 кг.
Сагсан бөмбөг тоглох дуртай. 2003 оноос жудо бөхөөр хичээллэж эхэлсэн

Амжилт:
Монгол Улсын Хөдөлмөрийн Баатар, Гавьяат Тамирчин
2006 оны Зүүн Азийн АШТ –ий хүрэл медаль
2007 оны Азийн АШТ –ий мөнгөн медаль
2008 оны Азийн АШТ –ий хүрэл медаль
2008 оны Олимпийн Наадмын алтан медаль
2011 оны Азийн АШТ –ий хүрэл медаль
Дэлхийн цом, Мастеруудын цуврал, Grand Prix, Grand Slam тэмцээнүүдээс 4 алт, 2 мөнгө, 3 хүрэл медаль хүртсэн.

Энхбатын Бадар-Ууган
“Бээжин- 2008″ XXIX олимпийн АЛТАН МЕДАЛЬ

1985 оны зургаадугаар сарын 3-нд Улаанбаатар хотод төрсөн. Нийслэлийн 97 дугаар дунд сургуулийг төгссөн. Үндэсний шигшээ багийн тамирчин. Боксын спортоор 1998 оноос эхлэн хичээллэсэн. Боксын 54 кг-ын жинд тоглодог.

2006 оны Оюутны дэлхийн аварга
2007 онд АНУ-ын Чикаго хотод болсон Дэлхийн аварга шалгаруулах тэмцээнээс мөнгөн медаль авсан.
2007 оны Ази тивийн аварга
2007 оны улсын аварга
2008 онд Олимпод анх удаагаа оролцож Монголын түүхэнд анх удаа боксын төрлөөр Олимпийн алтан медаль авсан
Доха-2006 Азийн наадмын хүрэл медальт
Герман улсад болдог Химийн цом тэмцээний аварга
Туркийн Ахмад Комертийн нэрэмжит тэмцээний аварга
Чехийн Усти-над-Лабем хотод болдог олон улсын тэмцээний мөнгөн медальт.
2007, 2008 оны Монголын шилдэг тамирчин
2008 оны дэлхийн шилдэг эрэгтэй боксчноор шалгарсан.

Отрядын ГҮНДЭГМАА
“Бээжин- 2008″ XXIX олимпийн МӨНГӨН МЕДАЛЬ

1978 оны тавдугаар сарын 23-нд Улаанбаатар хотод төрсөн. Дасгалжуулагч мэргэжилтэй

Биеийн өндөр 168 см. Жин 63 кг. 1993 оноос буудлагын спортоор хичээллэж эхэлсэн. “Алдар” спорт хорооны тамирчин.

Амжилт:
Монгол Улсын Хөдөлмөрийн Баатар, Гавьяат Тамирчин
2008 оны Олимпийн Наадмын мөнгөн медаль
ДАШТ –ий хүрэл
Дэлхийн Цомын 6 алтан медаль
Азийн АШТ –ий 2 алтан медаль хүртсэн.

Пүрэвдоржийн СЭРДАМБА
“Бээжин- 2008″ XXIX олимпийн МӨНГӨН МЕДАЛЬ

1985 оны дөрөвдүгээр сарын 18-нд Улаанбаатар хотод төрсөн. 2000 оноос боксоор хичээллэж эхэлсэн
Биеийн өндөр 162 см. Жин 49 кг.

Амжилт:
Монгол Улсын Хөдөлмөрийн Баатар, Гавьяат Тамирчин
2007 оны Азийн АШТ-ий алтан медальт
2008 оны Бээжингийн Олимпийн мөнгөн медальт
2009 оны Миланд болсон ДАШТ –ий алтан медальт
2011 оны Бакуд болсон ДАШТ –ий хүрэл медаль хүртсэн.