СУРГУУЛИЙНХАА ГАЗРЫГ БУЛААЛГАСАН БАГШ НАР НӨХӨН ТӨЛБӨРӨӨ АВЧ ЧАДСАН БОЛОВ УУ

-48 ДУГААР СУРГУУЛЬ ГАЗАР НУТГАА ЭРГЭН ДУРСЛАА-

Сургуулийн насны хүү­хэд багачуул өвчлөмт­гий, сульдаатай болоод байгааг хөдөлгөөн ду­тагдсанаас үүдэлтэй гэдэг юм билээ. Үүнээс үүдээд нийтийн биеийн тамир гэсэн ойлголт хүчтэйгээр тавигдсан. Гэсэн хэдий ч хүүхдүүд чийг ханхалсан подвальд PC тоглоод нүд­ний хараа муутай, нуруу бөөрний өвчтэй, сэтгэ­цийн өөрчлөлттэй  хүмүүс болцгоож байна.

Энэ хүүх­дүү­дийг под­ва­лиас гаргахын тулд биеийн тамирын талбай хэрэгтэй. Дээхнэ үеийн хүүхдүүд гадаа тоглож хувцас хунараа урдаг байсан хэдий ч бие хаа нь эрүүл саруул, чулуу шиг залуус болцгоосон  юм. Сүүлийн үед сургуу­лиуд биеийн тамир тал­бай, ногооны газар гээд эзэм­шил газаргүй бол­лоо. Энэ талаар иргэд санаа зов­ниж манай со­нинд ханд­сан юм. Ту­хайл­бал, Баян­зүрх дүүр­гийн 48 дугаар сургууль биеийн тамирын талбай­гүй болжээ.

Арван хэдэн давхар барилгуудаар “бүслэгд­сэн” 48 дугаар сургуулийг арай гэж оллоо. Үнэхээр газаргүй болжээ. Зүүн урд газрыг нь УИХ-ын гишүүн асан Д.Туяагийн хүү О.Сод­билэг аваад “PA­LAZ­ZO” гэдэг арав га­руй давхар барилга барь­жээ. Зүүн талд “Жигүүр гранд” групп орон сууц барь­сан байна. Түүний цаахна талд нэгэн дээд сургууль таван давхар хи­чээлийн байр барьсан харагдана.

Хамгийн гол нь эдгээр барилгууд 48 дугаар сур­гуулийн газраас авч ба­ригд­сан юм. Тийм учраас сургуу­лийн өмнөх тал­бай­даа сураг­чид  нь жаг­саад л дүүрчихдэг байна. Биеийн тамирын тал­бай гэсэн чинь УИХ-ын ги­шүүн Ц.Шинэбаярын гэ­рээс ч томгүй хэмжээтэй газар ха­шаалчихжээ. Энэ газрыг нь бас болоо­гүй мөсөн каток болгочихсон байна. Сургуу­лийн захирал Б.Эрдэнэчимэг “Намайг за­хир­лаар ирэхэд энэ жаахан талбай машины зогсоол бай­сан. Би үүнийг нь болиулаад Солонгос улсын хандиваар сагс, хөл бөмбө­гийн талбай болгох гэж бай­гаа” гэв. Тэр талбай нь 80 сая төгрөгөөр босох гэнэ.

Сургуулийн захирал Б.Эр­дэнэчимэгийн өмнөх нө­хөр нилээд бужигнуулж бай­сан бололтой. Тэрээр энэхүү жижигхэн газрыг машины зогсоол болгоод мөнгийг нь өөрөө авдаг байсан байна. Өдгөө Баттөр захирал өөр нэгэн дүүргийн сургуулийг иймэрхүү маягаар илбэн то­хи­жуулж яваа сураг дуулдав. Тухайн үед нэг сагсны шийд, хөлбөм­бөгийн талбай барь­чихсан бол “Жигүүр гранд” групп, О.Содбилэг нар дайраа ч билүү. Хүмүүсийн хэлж байгаа­гаар эзэнгүй гэмээр том газар байсан нь бусдын анхааралд өртсөн гэнэ.

Сургуулийн захирал Б.Эрдэнэчимэг “Одоо бол газрын ямар ч маргаан байх­гүй. Багш нар барилга барьж байхад дуугарч байх нь яасан юм бэ” гэлээ. Сургалтын ме­не­жер Ч.Оюунчимэг “Манай сургууль, 22 дугаар цэцэрлэг хоёр дундаа биеийн тами­рын сайхан талбайтай бай­лаа. Харамсалтай нь барилга ба­риад дууслаа даа” гэлээ. Энэ сургуулийн дээвэр дээрх цас хайлаад доош гоожиж байгаа тул коридортоо сав суулга тавин тосож байгаа аж.

Уг нь бол нэг хувин замын хар байхад л шийдэгдэх асуу­дал. Гэвч багш нар засварын мөнгө гээд сууж байгаа бо­лол­той. Мөсөн каток өвөлжин ажиллуулаад орсон орлого байдаг бол дээврээ бөглөчи­хөж  болмоор л санагдсан даа. Дээрх барилгын компа­нийн ганц нэг хүнтэй уулзлаа. Тэдгээр хүмүүс “Сургууль газраа мэдэж л байсан юм бол барилга барьж байх үед дуугарах нь яасан юм бэ. Одоо мянга дуугараад нэмэр­гүй″ гэлээ.

Үнэхээр тэр барилгыг ну­раалтай биш. “Өнгөрсөн бо­роо­ны хойноос цув нөмрөв″ гэгч л болж байгаа бололтой. Ерөнхийдөө 48 дугаар сур­гуулийн газрыг өмнөх захи­рал Баттөр л сүйд хийжээ. Барилга барьж байх үед багш нар яагаад дуугүй байв гэдэг асуулт гарч ирлээ. Баттөр захирал “Багш нарын нийг­мийн асуудлыг сайжруулах, шийдэх үүднээс газраа өгсөн” гэсэн тайлбар өгч байжээ.

Гэтэл багш нар хоосон хоцорсон юмсанж. Тэгээд өмнөх захирал Баттөрийгөө сургуулийн газар зараад баахан мөнгөжөөд бултчих­сан гэж бодоод байгаа бо­лол­той. Чингэс хааны эзэнт гүрэн гэдэг газрын зураг  шиг  талбай нь жижгэрсэн 48 ду­гаар сургууль маш сайхан  цэцэрлэгтэй байжээ. Тэр сай­хан цэцэрлэгийг нь О.Сод­билэг юу ч үгүй булга татсан гэнэ. Багш нар “Манай газар дээр барилга барьсан компа­ниуд нөхөн төлбөр өгч бол­доггүй юм уу. Тэгвэл тэр мөн­гөөр сургуулийнхаа дээврийг засмаар байна” гэлээ.

Дээрх компаниуд боло­хоор “Чин үнэнийг хэлэхэд сургуулийн удирдлага, хотын захиргаатай ярьсны үндсэн дээр л газар авна шүү дээ. Түүнээс биш “Жигүүр гранд” групп хүүхдийн газраас бу­лаа­гаагүй″ гэсэн юм. “Би чамд хайртай″ кино дээр “Яг үнэн­дээ Баяраа өөрөө ширээн дээрээс уначихсан” гэдэг шиг 48 дугаар сургуулийн удирд­ла­га л газраа өгөх зөвшөөрөл өгсөн юм билээ. Тэгсэн хэрнээ “Энэ хотын захиргаа сургуу­лийн газар авчихлаа. Бид яаж ч чадсангүй″ гэж зар тараана.

“Урлан бүтээх төв″ хойд талдаа их сайхан цэцэрлэгт хүрээлэнтэй байлаа. Тэр сай­хан газрыг УИХ-ын гишүүн Б.Чойжилсүрэнгийн “Хүрд” компани үгүй хийгээд орон сууцны хотхон  барьсан. Хэн ч уурлаагүй, хэн ч тэмцээгүй. Тэр үед тус төвийн захирал, Б.Цэрэндорж “Хотын захир­гаа газрыг маань булаагаад авчихлаа. Мань мэтийн мэ­дэл чадал хүрэх биш” гээд л сууж байсан.

Мөн гуравдугаар сургууль эргэн тойрон дахь газраа “мөл­жүүлж” дуусаад өөрөө нэг юм үлдсэн харагдав. 56 дугаар сургууль л гэхэд “Орч­лон”  констракшнд сургуулийн бай­даг газрыг харсаар бай­гаад алдлаа. Хариуд нь “Орч­лон” констракшн сургуулийн ойр тойрныг тохижуулж өгч бай­гаа гэнэ. Газраа булаал­га­сан захирал нь “Орчлон” конст­ракш­ны ач буянд талар­хаж байгаагаа илэрхий­лээд  сууж байх жишээтэй.

Сургуулийнхаа биеийн тамирын талбайг булаалга­сан гэх жишээ хэдэн мянга бий. “Урлан бүтээх төв″-ийн дээрэмдүүлсэн гэх газар л хотын А зэрэглэлд багтана. Ийм хэмжээний газрыг дууд­лага худалдаанд оруулбал дор хаяж гурван тэрбум төг­рө­гөөр зарагдана гэх юм билээ. Сургуулийн биеийн тамирын газар дунджаар 200 сая төгрөг хүрдэг гэх яриа байдаг юм.

Сургуулийн газрыг яаж зардаг вэ гэх асуулт гарч ирнэ. Сургуулийн захиргаа хавар намар гэнэт хашаагаа багасгана. Тэгээд гаргасан талбайгаа хашаалж авто зог­соол болгоно. Энэ үед ха­шаанд гэр, контейнер тавьж эхэлдэг байна. Тэр газрыг нэг хэсэг мартуулж, бусдын нү­дэнд дасгадаг. Урин дулаан цагаар маналз­тал барилга барьж намар хүүхдүүд хи­чээл­дээ ирэхэд биеийн тами­рын талбай орон сууц бол­чих­сон байдаг байна.

Сургуулийн мэдлийн га­зарт орон сууц бариад бай­гаа талаар БСШУ-ы сайд Ё.Отгонбаяртай уулзлаа. Тэ­рээр “Сургуулийн ойр орчим газар барилга барихгүй байх, газар олгохгүй гэсэн гэрээг  хотын захиргаатай хийсэн. Одоо байгаа зөрчил бол олон жилийн өмнөх асуудал. Хууль хяналтын байгууллагаар л шийдүүлэхээс өөр арга байх­гүй. БСШУЯ очоод барилга зогсоодог, нураадаг эрх мэ­дэл байхгүй. Өнгөрсөн зун л оюутны хотхонд барилга эхэлж байхад нь зогсоосон. Харин нэгэнт барьчихсан барилгатай ярихад хэцүү” гэлээ.

Хотын газрын алба “Сур­гуу­лийн захирал, СӨХ-д өөрийн эзэмшлийн газраа кадастрын зурагнаас тана­чихдаг. Тэгж байгаад барил­гын компанид өгчихсөн бай­даг юм” гэлээ. Иргэд боло­хоор асуудлын гол нь барил­гын компаниудад байдаг мэ­тээр тайлбарладаг. Гэвч үнэн чанартаа сургуулийн удирд­лага багш нарын нийгмийн асуудлыг шийдэх нэрийн дор эргэн тойрны газраа зараад орон сууц авдаг юм шиг са­нагд­лаа. Нөгөөтэйгүүр  зарим нэг сургууль дээр ногоон цэ­цэрлэг, тоглоом хүртэл барьж байгаад газар нутгаа  хам­гаал­сан туршлага байдаг юм билээ шүү.

Т.ЦОГТ-ЭРДЭНЭ

http://www.shuurhai.mn/?p=23073