Ц.Дашдорж гишүүн ээ, энэ амьдрал мөн үү

Цэцэрлэгээсээ хоцорсон юм уу тасалсан хүүхдийн тухайн өдрийн хоолыг хасдаг гэнэ шүү. Сургуулийн сурагч хичээлээ 36 цаг тасалсан бол сахилгын шийтгэл авна. Болохгүй бол түүнийг  сургуулиас хөө­нө. Оюутан залуус хи­чээ­лийн цагаас хоцрох эс­вэл таслах болбол тухайн тасалсан хичээлийн дүн гарна гэж үгүй. Ажилтан ажлын ца­гаасаа хоцорвол торгуулна. Энэ хоцролт даамжирвал сэ­рүүлэгтэй цаг бэлгэнд авах юм уу эс­вэл ажлаасаа халагдана. Энэ бол албан ажлын наад захын шалгуур юм. Гэхдээ нийгмийн хөгжлийн явцад энэ байдал өөрчлөгдөх янзтай. Энэ нь УИХ-ын ги­шүүдийн цагийн зохион байгуулалтаас харагдаж бай­гаа юм. Намрын чуулганы төгс­гөлд УИХ-ын гишүүдийн ху­ралдаанд оролцсон ирцийн тэмдэглэлийг олон нийтэд саяхан ил болгов. Өнгөрсөн намрын чуулган дөрвөн сарын хуга­цаанд 156 цаг хуралдсан бай­на. Гэтэл Говь-Алтай аймгаас сонгогдсон УИХ-ын гишүүн Ц.Дашдорж ердөө 30 цаг л чуулгандаа суужээ. Үлд­сэн 126 цагийг орон нутгийн томилолт, өвчтэй, чөлөөтэй, хоцорсон гэх үндэслэлээр та­салсан байна. Жирийн ажил­тан ажлаа тасалсан бол яаж сүржигнэх бол тэр дар­га нар.

Гэтэл гишүүн боло­хоор нь хэн ч хариуцлага тооцдоггүй ийм л тогтолцоо Монгол Улсад үйлчилж бай­на. Эрхэм гишүүний удирддаг “Монгол тамхи СО” ХХК-ийн ажилтнууд ажлын цагаасаа минут хоцорвол 200 төгрөгөөр торгуулдаг гэсэн. Ингээд минут тутамд 200 гэж тооцвол нэлээд хэдэн төгрөг болно доо. Ц.Дашдорж ги­шүүний чуулганд суугаагүй цагийг өөрийнх нь компанийн хоцролтын торгуультай жи­шиж үзвэл гишүүн маань дөрвөн сарын хугацаанд 1.512 мянган төгрөгийн торгууль хүлээсэн байж таарах нь ээ. Мөн “Монгол тамхи СО” ХХК-д ажлаасаа байнга хоцордог унтаа ажилтны цалинг 20 хувиар хасдаг юм байна лээ. Тэгвэл УИХ-ын гишүүн Ц.Дашдорж бараг ажлаасаа халагдчихсан байхаар байгаа биз. Гэтэл тэр суусаар л. Ер нь “Монгол тамхи СО” ХХК-ийн ажилтнууд өнөөдрөөс эхлэн ажлаа таслаад байвал яасан юм бэ. Торгоно, эсвэл хална гэвэл “Та өөрөө эхлээд торгуулиа төлж дуусгаад халагдахгүй юу” гээд гэдийчихэж болно шүү дээ. Говь-Алтай аймгийн иргэд ч “Бидний сонгосон хүн чуулгандаа суухгүй  байхад би ажилаа хийж яадаг юм бэ” гэсэн ч болно шүү дээ. Гишүүн ямар байна, сонгогч та тийм л бай. Ардчилсан нийгэмд хүн бүр ижил тэгш эрхтэй. Тиймээс Ц.Дашдорж гишүүн ээ, энэ амьдрал мөн үү.

Б.ЭНХМӨНХ