Ичих нүүргүй худалч Кёкүшюзан

УИХ-ын гишүүн Д.Кёкүшюзан Батбаяр Монголын ард түмэнд захидал илгээж, өөрий­гөө ичих нүүргүй худалч гэдгээ орон даяар зарлаж, улстөрийн онигооны хуудсыг нэгээр нэмлээ.

Өнгөрсөн долоо хоногийн баасан гарагийн өдөр тутмын сонинууд болон хэд хэдэн телевизээр өөрийгөө ичих ч үгүй сурталчилж, сонгуулийн болхи “пи ар” хийсэн нь олон хүний нүдийг орой дээр нь гаргах дөхлөө. Үүнийгээ маш олон телевиз, хэвлэл мэдээллийн хэрэгслээр баруун солгойгүй цацсан нь товчхондоо өөрийгөө ямархуу хэмжээний худалч вэ гэдгээ таниулсан ядмагхан улстөр болчихов. Хатуухан хэлэхэд Д.Кёкүшюзан Батбаяр 15 хүний хүсэлтээр Ховдод нэр дэвших бололтой.

Дээрх ил захидал гэгчид “Та 2008 оны УИХ-ын сон­гуульд Улаанбаатар хотын Сонгинохайрхан дүүр­гээс нэр дэвшин ялалт байгуулж, төр түшилцсэн билээ. Өдгөө дахин нэг УИХ-ын сонгууль хаяанд ирсэн энэ цаг үед бид танд хандаж байгаа нь учиртай билээ. Та Сонгинохайрхан дүүрэгт их зүйл хийж бүтээжээ” гээд уг ил захидал эхэлжээ. Өөрөөр хэлбэл, алс баруун хязгаарт суугаа Ховд аймгийн сонгогчид Сонгинохайрхан дүүрэгт эрхэм гишүүний хийсэн ажлыг олж мэдсэн мэтээр сэтгэсэн нь харганы үзүүрээс унгас түүж, эсгий хийхийн үлгэр шиг хөөрхийлөлттэй санагдчихлаа.

Цаашлаад тэрбээр муухан зальтай гэдгээ баталчихлаа. Үүнийгээ ил захидал гэгчдээ хөөрхөн гэгч нь шигтгээд орхичихжээ. Энэ талаар “…Таныг алс холын Япон улсад Монголынхоо нэрийг дуурсгаж явахад монгол ахан дүүс нь дээлийн чинь захыг мушгиж, нутгийн уулс чинь өндөлзөж байсныг энд дурдахад таатай байна” гэжээ.

УИХ нь хууль баталдаг төрийн эрх барих дээд бай­гуул­­лага болохоос бөхийн дэвжээ биш юм. Үүнийг дөрвөн жил УИХ-д суухдаа мэдэрч чадаагүй эрхэм гишүүнийг бодохоор өрөв­дөл­тэйгээр барахгүй чам­лалттай  санагдсанаа нуух юун.

Тус захидалд “…Өнгөр­сөн дөрвөн жилийн турш санаачилсан хууль, ажил­ласан ажлын хэсгүүдийн чинь тайлангаас үзэхэд та нутаг­таа ирж, ихийг хийж бүтээх гэдэг нь илэрхий байна” хэмээн залсан байх юм. Уучлаарай, УИХ-ын гишүүн Д.Кёкүшюзан Батбаярын нэрээр санаачилсан хуулийн төсөл байдгийг өнгөрсөн дөрвөн жилийн хугацаанд олж хараагүй, сонсоогүй юм байна. Зүүдээ ярих гээд хул­гайгаа ярив гэгчээр ганц ч хуулийн төсөл санаач­лаагүйгээ бантах­даа ийнхүү олон нийтэд зарлачихлаа. Арга ядсан л зүйл. Тэгээд ч мэдээ­лэл технологийн эрин үед амьдарч байгаагаа март­чихаад тууж суугаа нь Монголын ард түмнийг доромжилсон явдал боллоо. Өрөвдмөөр ч юм шиг.

Үүнээс гадна тэр Монголын ард түмнийг тэнэг гэж бод­сон бололтой. Тиймдээ л намын дарга Н.Алтанхуягт дээрх захидлынхаа нэг хувийг илгээж санасандаа хүр­чихлээ. АН-ын дарга Н.Алтанхуяг ёстой л наана  нь гарч инээж, цаана нь гарч уйлсаар Ховд айм­гаас нэр дэвших квотыг дээрх захидалд нь итгээд өгчих­лөө.

УИХ-ын гишүүн Д.Кёкүшюзан Батбаяр ч хүнээс юм салгахдаа чадвар­лаг нэгэн гэдгээ харуулсан ч АН-ынхаа нэр хүндийг улан­даа гишгэчихэв. Бас болоо­гүй, АН-ын даргад хүссэн хэнбугай ч ард түмний нэрийг барьж захидал илгээхэд нэр дэвших квоттой болж байгаа нь тус намын боловсон хүчний нөөц ядмагхан болохыг харуулаад өглөө. Ерөн­хийдөө өөрөө өөртөө бичсэн захид­лаар УИХ-ын гишүүн Д.Кёкүшюзан Батбаяр АН-ын рейтэнгийг навч уна­гаснаас өөрөөр гавьсан­гүй. Уг  нь туршлагатай пи арчид олонтой АН-ынхан иймхэн зүйлээр нэр хүндээ унагаж яах вэ дээ гэж бодогдохоор. Өрөвдөлтэй ч юм.

УИХ-ын гишүүн Д.Кёкүшюзан Батбаяр бас л болхидуу бодолтой, зуйрган гэдгээ ч өмнө харуулаад амжсан. Ямартаа л төрсөн хүүдээ нэр өгөхийн тулд АН-ын дарга Ц.Элбэгдорж тухайн үеийн МАХН-ны дарга С.Баяр нарын нэрийг нэгтгэж байгаад Элбэгбаяр гэдэг нэр өгөөд, өөртөө онигоо хүртэл зохиолгосон нь багадаагүй бололтой.

Ийм л нөхөр өнгөрсөн дөр­вөн жил УИХ-д нэг санд­лын тоо бөглөөд сууж байлаа. Харамсалтай ч юм шиг. Үүнийхээ оронд олиг­той­хон мэдлэгтэй  хүнийг томил­­чихсон бол сайн хууль гарах­­гүй юм гэхэд ядаж л ард түмэнд худал ярьж, хүүх­дийн тоглоом шиг зүйл ярихгүй байсан биз. Мон­голчуудын ходоодоороо сонгууль өгдгийн нэг жишээ л УИХ-ын гишүүн Д.Кёкү­шюзан Батбаяр бол­сон юм.

Эх сурвалж: “Өглөөний сонин”