Ц.БАТБАЯР: Надаар оролдох гэсэн хүн цуу тараасан юм билээ

УИХ-ын гишүүн Ц.Батбаярыг өчигдөр өглөө гадагшаа явах гэж байхад нь “Чингис хаан” олон улсын нисэх буудлаас хууль хяналтынхан саатуулсан талаар зарим сайт, телевизээр мэдээлэв. Холбогдох байгууллагаас дээрх мэдээлийг лавлахад тийм явдал болсон, эсэхийг мэдсэн хүн байсангүй. Тиймээс эрхэм гишүүнтэй 20.00 цагийн үед холбогдон тодруулахад:

-Өглөөнөөс хойш хэд хэдэн сайт, телевизээр намайг “саатуулсан” тухай мэдээлсэн. Надаар оролдох гэсэн хүмүүсийн тараасан цуу юм билээ. Би хэн ийм мэдээлэл өгөв гэдгийг мэдсэн. Ирж байгаад учраа олно. Сонгууль дөхөөд ирэхээр хийдэг бохир улс төрийн л нэг шүү дээ.

-Та гадагшаа явж байгаа юм уу?

-Хонконг руу явах гэж байна. Хэд хоноод ирнэ.

Д.ДАГВА