Голомт банк дипломат төлөөлөгчдийн дундах ээлжит тэмцээнээ зохион явууллаа

Дотоодын болон олон улсын байгууллагуудын итгэлийг хүлээн ажилладаг Голомт банк АНУ-ын элчин сайдын яамтай хамтран Монгол дахь дипломат төлөөлөгчдийн дундах “Сагсан бөмбөгийн нөхөрсөг тэмцээн”-ийг өнгөрсөн бямба гаригт амжилттай зохион явууллаа.

Хоёр дахь жилдээ зохиогдсон уг тэмцээнд АНУ, Англи, Япон, БНХАУ, Франц, Кувейт, БНЧУ-ын элчин сайдын яамдууд болон Гадаад Харилцааны Яам, Мянганы Сорилтын Сан, Голомт банк гэсэн эрэгтэй, эмэгтэй 18 багийн 150 орчим тамирчин өрсөлдөж аваргуудаа тодрууллаа.

Тэмцээнд эрэгтэй 10 баг өрсөлдсөнөөс гуравдугаар байрт АНУ-ын элчин сайдын яам, хоёрдугаар байрт Гадаад Харилцааны Яам, харин тэргүүн байрт Мянганы Сорилтын Сангийн баг тамирчид тус тус шалгарчээ.

Өнгөрсөн жил зөвхөн эрэгтэй баг тамирчдын хооронд зохиогдож байсан уг тэмцээн энэ жил эмэгтэй тамирчдын оролцоог хангасан бөгөөд нийт 8 эмэгтэй баг өрсөлдсөнөөс Гадаад Харилцааны Яам гуравдугаар байр, Голомт банк хоёрдугаар байр, Английн элчин сайдын яамныхан тэргүүн байрын шагналыг тус тус хүртсэн юм.

Жил бүр уламжлал болон зохиогдох уг тэмцээний шилжин явах цомын эзнээр Мянганы Сорилтын Сангийнхан шалгарч, өнгөрсөн жилийн аварга болох Гадаад Харилцааны Яамны баг тамирчдаас цомоо гардан авсан юм.

Ийнхүү Монгол дахь дипломат байгууллагын төлөөлөгчид сагсан бөмбөгийн аваргуудаа амжилттай тодрууллаа.

Дашрамд дурьдахад Голомт банк Монгол дахь дипломат байгууллагуудын нөхөрсөг хамтын ажиллагааг дээшлүүлэх чиглэлээр хөлбөмбөг, гар бөмбөг, сагсан бөмбөгийн тэмцээнүүдийг жил бүр уламжлал болгон зохион явуулж ирсэн юм.