Ё.Баатарбилэг: Хөрөнгө мөнгөтэй хүмүүс CD, DVD-тэй компьютер хэрэглэхээ болиод удсан байх

-Манай улсын хэмжээнд бүх ЕБС-ын суурин компьютерууд, багш нарын маань хэрэглэж байгаа нөүтбүкүүд CD уншдаг-

БСШУС-ын сайд Ё.Баатарбилэг энэ сарын 18-ы өдөр сэтгүүлчдэд мэдээлэл хийхдээ 12 дугаар ангийн хүүхдүүдийн теле хичээлийг багтаасан, элсэлтийн шалгалтад хэрэгтэй зөвлөгөө, мэдээллийг багтаасан CD тараана хэмээн мэдэгдсэн. Энэ мэдэгдлээс хойш цахим ертөнцид хүмүүс ухарсан үйлдэл хийлээ, CD, DVD уншдаг компьютер, төхөөрөмж байхгүй болсон гэх мэтээр шүүмжилж эхэлсэн юм.

Тэгвэл БСШУС-ын сайд Ё.Баатарбилэг өөрийн фэйсбүүк дамжуулж залруулга, мэдэгдэл хийжээ. Тэрбээр “12 дугаар ангийн хүүхдүүд энэ жил хамгийн хүндрэлтэй нөхцөлд ЭЕШ-д бэлдэж орох болж байна. Хөдөө малчдын маань хүүхдүүд гэртээ харьсан байна, алслагдсан бүс нутгуудад, интернетгүй орчинд олон мянган хүүхдүүд маань сурч амьдарч байгаа юм аа… Малчид маань гэртээ СиДи,  ДиВиДи тоглуулагчтай байх нь элбэг. Сумын төвд интернет хурд, интернет төлбөр гээд олон бэрхшээл байдаг. Бүх хүүхэд маань ухаалаг гар утас хэрэглэх боломж хомс. Амьдрал баян. Бид мэдээж АПП зохион бүтээж удахгүй ашиглаж эхлэхээр ажиллаж байна… Хугацаа орж байна. Цаг алдалгүй богино хугацаанд хүүхдүүддээ туслах материалыг хүргэх шаардлага үүсээд байна аа…

Мэдээж хот суурин газарт сайтаас, нүүр ном, пэйж хуудсаас, нэт-ээс үзэх боломжуудыг нь нэмэгдүүлж байна… Байршуулж байна… Бүх боломжуудыг ашиглаж, хүүхэд бүртээ ижил боломж олгохоор ажилласаар байна… Монгол Улсын хэмжээний асуудлыг Улаанбаатар хотын хэмжээгээр бүү сэтгээсэй гэж хүсч байна… Зарим нэр хүндтэй нийтлэлч, олны танил хүмүүс хүртэл өрөөсгөл ойлгож байгаад харамсаж байна…

Хөрөнгө мөнгөтэй, баян чинээлэг, боломж сайтай хүмүүс бол СД, ДВД-тэй компьютер хэрэглэхээ болиод удсан байхоооо… Жич: Манай улсын хэмжээнд бүх ЕБС-ын суурин компьютерууд, багш нарын маань хэрэглэж байгаа нөүтбүкүүд СиДи уншдаг. Манай яамны бүх компьютерууд бас адил… (шинэчилж чадаагүй) хэвээр л байна… Цэцэрлэгийн багш нар маань компьютер ч байхгүй байна… “Ковид19″ бидэнд шинэ сорилт тулгаж байна… Уучлаарай… Гүтгэсэн, харлуулсан, улстөржүүлсэн, муучилсан болгонд тайлбарлах, залруулах, сөрөх зав зай бидэнд үнэндээ алга…” хэмээжээ.