МАН-ынхан “эсэргүүнүүдээсээ” бусдыг нь дарга болголоо
-Одоо энэ намд боловсон хүчин үлдсэн болов уу-
МАН-ынхан жинхэнэ дагнаж, дангаараа ажиллахаар шуудрав бололтой. Засгийн газраа бүрдүүлж дуусаад өчигдөр АН-ын байнгын хорооны дарга нараа МАН-ынхаар солилоо. Сольсон, сонгосон хүмүүсийг хараад юу ч үгүй үлдсэн хүмүүсийг өрөвдөх сэтгэл төрөөд болдоггүй. Өчигдрийн байнгын хорооны даргаар сонгогдсон эрхмүүдийг хараад байхад буруу ишилсэн сүх шиг нөхөр алга, намдаа гомдож тунирхдаг ганц ч нөхөр харагдсангүй, фракци холбоо гэж харайлгадаг улстөрч ч байсангүй. Нэг ёсондоо намын үнэнч фэнүүдээсээ үлдсэн хэдийгээ албан тушаалтай болгочихож байна уу даа, янз нь. Өчигдрийн байнгын хорооны дарга нарыг сонгох хуралдаан дээр санал хураалтаар Хууль зүйн байнгын хорооны дарга Д.Одбаяр, Төрийн байгуулалтын байнгын хорооны дарга Ж.Сүхбаатар нарыг улираан сонгож, Эдийн засгийн байнгын хорооны даргаар Р.Будыг, Төсвийн байнгын хорооны даргаар О.Чулуунбатыг, Байгаль орчин, хүнс, хөдөө аж ахуйн байнгын хорооны даргаар Д.Балдан-Очирыг, Нийгмийн бодлого, боловсрол, соёл, шинжлэх ухааны байнгын хорооны даргаар А.Тлейханыг, Аюулгүй байдал, гадаад бодлогын байнгын хорооны даргаар Э.Мөнх-Очирыг сонгосон байна. Эд хэзээ ч, юу ч болж байсан МАН-ын төлөө эцсийн дусал цусаа дуустал үзэлцэх “үнэнч” гишүүд. Бас ирэх сонгуульд намын нэрээр гараад ирэх лидерүүд учраас өөд нь татах гэх нь зөв л дөө. УИХ дахь МАН-ын бүлэг 45 гишүүнтэй. Уг нь 46-уулаа байсан ч Ц.Шинэбаярыгаа бүлгээсээ хөөгөөд гаргачихсан. Сонгуульд ялалт байгуулсан нам дангаараа төр барих эрхтэй ч АН-тай хамтарч засгаа байгуулсан биш сонгуулийн жилд ёстой муугаа үзэж байх шив. Сүүлийн сар гаруйн хугацаанд энэ намынхан боловсон хүчний нөөцгүй, ядарсан, илжирснээрээ дуудуулан байж арайхийж хэдэн сайдаа томилсон, дараа нь бас л өнгө мөнгөний үнэр ханхалсан хүмүүсийг дэд сайд болголоо гэж адлуулж ч байх шиг. Байнгын хорооны даргын сэтэр тийм муу алба биш. Энэ албыг толгойлж үзэхийг хүсэхгүй хэн байх билээ. Сайд, дэд сайдаа байг гэхэд байнгын хороог ахалж сууна гэдэг том аз завшаан. Амттай боорцог л гэсэн үг. Харин боорцогны жор, усыг хэр тааруулснаас “амттай” болох эсэх нь шийдэгдэнэ гэсэн үг. Энэ удаа МАН-ын удирдлагууд цор цор хийгээд байдаг нөхдөө зураасны доогуур үлдээж чадав. УИХ-ын гишүүн Д.Арвин, Б.Бат-Эрдэнэ, Ц.Батбаяр, Н.Ганбямба, Ц.Даваасүрэн, Ш.Сайхансамбуу, Д.Тэрбишдагва, Ч.Улаан нарын эсэргүүнүүдэд боорцогны хэлтэрхий ч өгөхгүйгээр шийдсэн бололтой юм. Юм л бол намаа шүүмжилж, удирдлагууд руугаа асч байдаг, хэзээ нэгэн цагт нүүрээ буруулж магадгүй хэдэн нөхдийн нэрийг ядаж дэвшүүлж болно оо доо. Гэвч тэгсэнгүй. Хүссэн ч үгүй. Намдаа яг таг таалагдсан нөхдийг бараг л 100 хувийн саналаар дэмжчихээд гараад явчихдаг болж. Х.Бадамсүрэн, Х.Баделхан, Ж.Батсуурь, Д.Дондог, Х.Жекей, Х.Наранхүү, Р.Рааш, Ц.Цэнгэл нарыг “пээнсэнд” нь гаргах гэж байгаа нь лавтай. Ирэх сонгуульд нэр дэвших ч үгүй, дэвшсэн ч гарах ч үгүй гээд нэрийг нь ч дурьдахаа больж. Эрхбиш чуулганы танхимд үгийг нь сонсч байгаа байлгүй дээ.
Ардчиллын үнэр энэ намд байхгүй гэдэг үнэн аж. Ямар сайндаа МАН-ынхнаас хуучин коммунист үзэл бодол нэвт ханхлаад байдаг гэж ярих вэ дээ. Түүнээс гадна нэгэнт МАН Засгийн газрыг дангаараа бүрдүүлж, УИХ-ын байнгын хороодыг ч авч буй тул УИХ-ын хоёр дэд даргын нэг АН-ын гишүүн Г.Батхүүг дэд даргаар үлдээх эсэх асуудал ч хөндөгдсөн сурагтай байна. Гэхдээ намын бүлгийг төлөөлсөн дэд дарга байдаг уламжлалын дагуу АН төлөөлсөн дэд дарга байж болох юм гэсэн санал ч бас гарчээ. Аягүй бол Хүний эрхийн дэд хороог Х.Тэмүүжингээс, Ёс зүйн дэд хороог Г.Баярсайханаас булаах юм байна л даа. Булаахаас нь өмнө өгчихвөл таарна. Нэрийн хор. Харин энэ намд энэ хоёр гишүүн шиг хүний эрхийн дэд хороо, ёсзүйн дэд хороог аваад явчих боловсон хүчин бий гэдэгт л найдая.
С.ХЭРЛЭН
URL:
