Ц.Нямдорж: 100 гаруй сумыг экологийн цагдаатай болгох шийдвэр гаргалаа

Засгийн газрын ээлжит хуралдаан болж, хуралдаанаар хэлэлцэн шийдвэрлэсэн асуудлаар ХЗДХ-ийн сайд Ц.Нямдорж мэдээлэл хийлээ.

Тэрбээр, “Цагдаагийн байгууллагын бүтцэд зарим нэмэлт өөрчлөлт оруулахаар боллоо. Нэгдүгээрт, экологийн цагдаа байгуулах шийдвэр гарсан. Гол арван аймаг, 100 гаруй суманд эхний ээлжинд байгуулна. Ерөнхий хариуцах ажил нь байгаль орчин, тэр тусмаа уул уурхайн олборлолттой холбоотой асуудлыг хянах чиглэлийн алба байна. Хоёрдугаарт, хуучин төмөр замын, нисэхийн, замын цагдаа гэж гурван төрлийг зохицуулдаг алба байсан. Эдгээрийг нэгтгэж Тээврийн цагдаагийн алба гэсэн хөдөлгөөний чиглэлийг хариуцсан нэг алба байхыг Засгийн газар зөвшөөрсөн. Гуравдугаарт, цагдаагийн албаны мэдээллийг нэгтгэдэг хоёр, гурван газар байсныг нэгтгэж Мэдээлэл судалгааны нэг албатай болж байна. Ерөнхий дүнгээрээ цагдаагийн байгууллага олон нийтийн аюулгүй байдлыг хангах, гэмт хэрэгтэй тэмцэх ажлын 90 гаруй хувийг хариуцдаг. Сүүлийн гурван жилийн байдлаар гэмт хэрэг гаралт 10 гаруй хувиар буурсан байна. Гэмт хэргийн өсөлт, зогсож, буурах буурахдаа Улаанбаатар хотод буурч байгаа нь цагдаагийн байгууллагынхны ажлын ахиц юм. Тээврийн цагдаагийн бүтцийн өөрчлөлт туршилт маягаар ажиллаж байсан. Үүний үр дүнд ахиц гарсан” гэв.