Огноо: 2019/12/26 13:13:34

ОХУ дэлхий нийтийг холбосон интернет сүлжээг салгаж, дотоод холбоо үүсгэх туршилт хийлээ

ОХУ дэлхий нийтийг холбосон интернет сүлжээг салгаж, дотоод холбоо үүсгэх туршилт хийлээ. Тус улсын Харилцаа холбооны асуудал эрхэлсэн яамнаас мэдээлснээр, “РаНет” гэдэг интернетийн дотоод сүлжээг Москва хотод өнгөрсөн даваа гарагт туршиж, үүнд Оросын харилцаа холбооны дөрвөн компани оролцон, 18 төрлийн халдлага хийж, шалгажээ. Сүүлийн жилүүдэд дэлхий дахинд олон улсын интернет сүлжээг хааж, дотоод холбоотой болох гэсэн хандлага газар авч байгаа юм. Харин дэлхий нийтийг холбосон өргөн сүлжээнээс татгалзсанаар “Тухайн улсын иргэд эх орондоо өрнөж байгаа үйл явдлын талаар мэдэх боломжгүй болж, хөөсөрсөн мэдээлэл л хүлээж авдаг болно” гэж IT-гийн салбарынхан үзэж байна. ОХУ-ын Ерөнхийлөгч Владимир Путин өнгөрсөн тавдугаар сард тус улсын интернет хангамжийн компаниуд мэдээллийн хяналтыг төвлөрүүлэх төхөөрөмж суурилуулж, хориотой цахим хуудсуудыг шүүх утга бүхий шинэ хуульд гарын үсэг зурсан юм. Гэхдээ Путин энэ талаар өнгөрсөн долоо хоногт хийсэн ээлжит хэвлэлийн хурлын үеэрээ “Олон улсын интернет сүлжээг хаах зорилгогүй” гэж мэдэгдсэн билээ.