Цэрэг эрс цаг бусаар одсоор л байх уу
Нэг хэсэгтээ намжаад байсан хугацаат цэргийн алба хаагчтай холбоотой мэдээлэл дахин цахим орчноор тарж эхэллээ. Дорнод аймгийн Зэвсэгт хүчний 327 дугаар ангид цэргийн албан хаагчийн амь нас эрсэдсэн нь хөдөлмөрийн аюулгүй ажиллагааны дүрэм журам зөрчигдсөнөөс болсон гэх тайлбарыг дээд газрынх нь дарга нар мэдэгдсэн. Энэхүү хөгийн мэдэгдэл нь олны дургүйцлийг хүргэв.
Яасан ядмаг хариулт вэ. Чиргүүлтэй машины чиргүүл дээр хүн суудаг юм уу. Эрүүл хүний ухаанд багтамгүй ийм юм ярьж байгаа нөхдүүд бас сахилгын шийтгэл хүртчихээд байгаа гэнэ. Эрдэнэт хүний амь настай сахилгын шийтгэл эн зэрэгцэх юм шиг тайлбар хийгээд сууж байгаа нь жинэхэнэ эмгэнэл.
Цэрэг гэдэг нэргүй зарц болсон нь нууц бишээ. Хэзээнээс л ийм байдал байсаар, бугшсаар ирсэн. Ангийн хана туурга будна шохойдно, түлээ түлш бэлтгэнэ. Дарга нарын хүүхдүүдийг халамжилна, зөөнө, асарна. Гэхдээ дээхэн үеийн анги нэгтгэлүүд аавын хүүг 3 жилийн алба хаагаад буцахад нь тухайн хугацаанд хөдөлмөрлөсөн хөлсийг нь бодож өгөөд үддэг байсан юм.
“Улс орныг хамарсан бүтээн байгуулалтын ажил болон цаг үеийн арга хэмжээ, аж ахуйн ажилд цэргийн анги салбарын ажлыг алдагдуулахгүйгээр оролцуулж болно” гэсэн Монгол Улсын Ерөнхийлөгчийн баталсан журмыг гүйцэлдүүлж байгаа хэдий ч дэд ахлагчаар ахлуулж явуулж байхыг бодоход яах аргагүй тус ангийн дотоод зохион байгуулалт муу байгааг илтгэнэ.
Тэр дэд ахлагч ХАБ-ын ажилтан мөн үү. Тус ангид ХАБ-ын инженер, мэргэжилтэн байдаг эсэх нь ч бас асуудал.
Үхсэн хүн үг хэлэх биш гэсэн шиг “Донсолгоонд унасан” гэсэн нь талийгаачийг доромжилж буй мэт. Бас яасан арчаагүй бие бялдартай цэргүүдтэй анги вэ гэж бодмоор. Өвс ачсан машин дээр нь ганцаараа сууж яваагүй л баймаар. Бусад нь зулгаагаад чангаагаад авч үлдэж чадсангүй юу. Өвс ачсан машин донсолгоонд хүн шидэгттэл хурдалсан хэрэг үү. Хүн унатал донсолж байгааг бодоход жолооч эрүүл байсан юм уу гэх зэргээр олон асуулт үлдээсэн тайлбарыг ЗХЖШ-аас өглөө.
Энх цагт цэрэг эрс цаг бусаар одсоор л байх уу.
URL:
