Сонгинохайрхан дүүргийг шаардлага хангахгүй караоке, зочид буудлаар дүүргэх нь ээ
Улаанбаатарт соёл, урлагийн сургалт, цэнгээнт үйлчилгээний зөвшөөрөл жилдээ 300 орчим гардаг байна. Үүний 200 орчим нь караокены үйл ажиллагаа явуулах зөвшөөрөл байдаг.
Зугаа цэнгээний газрын зөвшөөрөл олгодог, хяналт хийдэг байгууллагууд нь өөр хоорондоо уялдаа холбоо муутай ажилладаг. Үүний тод жишээ нь орон сууцны нэгдүгээр давхарт болон нийслэлийн захын дүүргээр стандартын шаардлага хангахгүй караокенууд дүүрч, иргэдийн амьдрах орчинд сөрөг нөлөө үзүүлж байгааг хэдхэн жишээгээр харж болно.
Төрийн байгууллагуудын уялдаа холбоогүй байдал, танил тал, хээл хахууль өнөөх болдоггүйг ямар ч аргаар хамаагүй болгочихдог жишгийг улам гааруулсаар. Ямартай ч оршин суугчдын тав тухыг ихээр алдагдуулдаг орон сууцны нэг давхрын үйлчилгээний газруудтай холбоотой асуудал болон орон сууцтай хэт ойролцоо байрлах үйлчилгээний шаардлага хангахгүй караоке газрууд олон болж иргэдийг бухимдуулж байна.
Харин төрийн байгууллагууд хэрхэн хамтарч ажиллаж, ямар шат дарааллаар цэгцлэх нь одоогоор тун бүрхэг байна. Угтаа бол энэ төрлийн үйл ажиллагаа явуулж буй газрууд үйлчилгээний стандартыг өндрөөр сахин баримталж явуулах хэрэгтэй ч хотын захын дүүргүүдэд жижиг газруудад үйлчилгээний стандарт гээч зүйл нэг ч алга гэхэд болно.
Үүний нэг жишээ нь нийслэлийн Сонгино Хайрхан дүүргийн бүс нутаг гэж хэлж болно. Энэ сэдвээр бид өмнө мэдээлж байсан ч байдал яг таг хэвээр. Үүнийг анхааралдаа авдаг газар тус дүүрэгт байдаггүй бололтой.
Ганц жишээ дурьдахад тус дүүргийн зөвхөн 19-р хорооны нутаг дэвсгэр буюу 21-р хороолол л гэхэд баар болоод караоке нэртэй иргэдийг архидуулах газруудыг автобусны буудал, орон сууцны нэгдүгээр давхар гээд өнцөг булан бүрээс харж болно. Иргэдийг таатай орчинд тухтай үйлчилгээний соёлтой газруудаар үйлчлүүлж байвал хэлэх зүйл алга. Гэтэл энэ дүүргийн уушийн газрууд хэтэрхий мөнгө харж, иргэдийг зүгээр л архинд оруулах гэсэн зорилготой мэт.
Сонгинохайрхан дүүргийн 19-р хорооны жишээг дахин дурьдвал тус бүс нутгийн 5 орцтой 8в байрны зөвхөн ганц орцны харалдаа л гэхэд хоёр зочид буудал, гурван үйлчилгээний төв, долоон караоке бие биенийхээ өөдөөс харан үйл ажиллагаа явуулж байх жишээний. Энэ бүх газраар үйлчлүүлсэн иргэд согтууруулах ундаа хэтрүүлэн хэрэглэж, орон сууцны иргэдийн аюулгүй байдал, тав тухыг үргэлж алдагдуулна. Харин энэ бүхэнд цагдаагийн хяналт ч алга. Энгийн нэг жишээг дүрс бичлэгээс харуулахад энэ байна.
Ойр орчимд байгаа орон сууцны орц руу согтуу иргэд орж тамхи татах, булан тохойд нь шүлсээ хаях, шээх гэх мэт үзэгдэл энгийн. Зодоон, хашгиралдах гэх мэт зүйл байнга л өдөр тутам гарна. Энэ мэтээр шөнө оройн цагаар иргэд гэртээ ч орохдоо айдастай байх болжээ. Ганцхан байрны эргэн тойрны байдал иймэрхүү байхад тус дүүргийн хамаарал бүхий албаныхан энд анхаарал хандуулах хүн алга.
Иргэдийн амгалан тайван байдлыг алдуулаад байгаа эдгээр газрын талаар гомдол мэдүүлэхээр зөвшөөрлийн дагуу үйл ажиллагаа явуулдаг гэх үгээр ам тагладаг. Түүнчлэн анх эмнэлэгийн зориулалтаар баригдсан барилга нь сүүлдээ НОЁД хэмээх зочид буудал, караоке газар болж, өмнөх газруудаа яая даа гэсэн огтоны нүх шиг олон караокетэй газар дахин бүл нэмээд ороод ирсэн гээд иргэдийн бухимдал хүргэх зүйлс олон байна.
Шөнө үдшийн цагаар согтуурхан хөлчүүрсэн залуус хоорондоо зодолдоход байрны оршин суугчид цагдаагийн 102 утсанд дуудлага өгөхөөр хэрэг болоод өнгөрсөн хойно ирдэг бөгөөд сүүлдээ иргэд 102 утсанд дуудлага өгөхөөс хүртэл халширах болсон гэдгээ ярьж байв.
Нийслэлийн Захирагчийн албанаас стандартын шаардлага хангахгүй энэ мэт жижиг караоке баарнуудад үйлчилгээ явуулах эрхийг олгохоос татгалзах хэрэгтэй. Үүнээс гадна Нийслэлийн соёлын газар ч зөвшөөрөл олгосон газруудаа эргэн харж хяналт тавин арга хэмжээ авах хэрэгтэй болов уу.
Тэгэхгүй бол иргэдийн амар тайвныг эвдсэн караоке газруудын байдал хэрээс хэтэрлээ. Иргэдийн чөлөөт цагийн зөв боловсон өнгөрүүлэх газрууд хэдий байх хэрэгтэй ч орон сууцны дунд байрлах энэ мэт жижиг газруудыг шат дараалан цөөлж, зохих дүрмээ биелүүлэхийг холбогдох эрх мэдэлтнүүд болон Сонгино хайрхан дүүргийн удирдлагуудад уламжилж байна.
URL:
