Могойны өндөг залгисан хүүхдийн ходоод руу эх могой нь орж хөнөөжээ
Энэ явдал эрт урьдын цагт биш энэ үед болжээ. 2002 оны зун Г.Дэлгэр гэдэг 40 эргэм насны эр эхнэр, хоёр хүүгийнхээ хамтаар Тэрэлжийн орчимд салхинд гарчээ. Эхнэр, нөхөр хоёр жижиг хивсэнцэр дэвсчихээд хоол, унд эргүүлж, ойр зуурын юм ярилцаж суух хоорондуур 7, 11настай хоёр хүү нь гол горхины орчмоор сэлгүүцэн тоглож байсан аж. Тун ч удалгүй том хүү нь:
Аав аа, ээж ээ. Энэ Ганбаа жижигхэн шүр олж аваад жимс гээд залгичихлаа ш дээ гэсээр гүйж иржээ. Аав, ээж хоёр нь ч хээрээс хамаагүй юм олж залгилаа гэж загнасан бөгөөд «Тэнд зөндөө олон тийм юм байгаа» гэж хэлэхээр нь гайхаад явж очжээ. Үнэхээр ч горхины ойролцоо хуванцар маягийн өнгөгүй С витамины хэмжээний үрэлнүүд байсан бөгөөд аав, ээж хоёр нь чухам юу болохыг мэдэж чадаагүй учраас «Ялгадсаар нь гарчих байх» гээд нэг их тоосонгүй. Тэгэсхийгээд тэнгэр муухайрах шинжтэй болсон учраас хот руу хөдөлцгөөжээ. Маргаашнаас нь ажлаа бодсон учраас хоёр хүүгээ Шарга морьтын зусланд байдаг өвөө, эмээ хоёр дээр нь аваачиж орхижээ.
Гэтэл гурав хоногийн дараа бага хүү нь гэнэтхэн нас барсан тухай аймшигт мэдээ иржээ. Яаран сандран Шарга морьтод очиход тун ч санаанд оромгүй зүйл болсон байв. Өдөржин тоглож ядарсан бага хүү нь унтаж байсан агаад том нь өвөөтэйгээ усанд явж, эмээ нь гаднаа гудас өнгөлж суужээ. Өвгөн уснаас ирээд гэртээ ортол ачийнх нь аманд нэгэн цоохор юм годогнон хөдөлж байх нь тэр. Айх гайхах зэрэгцэн яваад очтол хүү нь юу ч болоогүй юм шиг унтаж байсан бөгөөд хуруун чинээ бүдүүнтэй бор эрээн могойны төө шахам сүүлэн хэсэг тонгочиж хөдөлж байхтай нь зэрэг яах ч учраа ололгүй татаж орхижээ. Энэ үед хүү часхийн орилоод сэрэв. Өвгөн ч могойг хана руу савж хаячихаад ачийгаа тэврэн автал орилж байсан хүү дөрөв тавхан минут болоод амьсгал хураажээ. Болсон явдал гэвэл энэ. Могой харагдаад байдаггүй Шарга морьтод очиж очиж хүүхдийн ам руу орсоныг нь ихэд гайхсан өвгөн хэдийгээр уй гашууд автаад байсан ч хэрэг явдлыг яриулснаар учир гогцоо нь тайлагдах тийшээгээ хандав. Өвгөний таавар ч задлан шинжилгээний дараагаар тодорхой болсон юм.
Хүүгийн гэдэснээс мөнөөхөн Тэрэлжийн орчимд залгисан үрэл гарч ирэв. Энэ нь үнэндээ могойны өндөг байжээ. Хуванцар шүр шиг могойны өндгийг 7 настай балчир хүү бүү хэл могойтой нутгийн насанд хүрэгчид ч тэр бүр мэддэггүй юм. Тэгээд ч могой үр өндгөө хаана байна тэнд хүрдэг дэндүү харам амьтан. Үүнийг нь нотлох гэсэн шиг өвгөний хана руу савж алсан могойны хэвлийн хайрс элэгдээд улаан мах нь гарчихсан байжээ. Энэ бол хаана хаанаа л буруугүй эмгэнэлт явдал. Үүнтэй төстэй хэрэг явдал өчнөөн л тохиолддог. Тухайлбал жингийн цуваа дагаад могой яваад байхлаар жинчид ачаа тээшээ задлаж үзэхэд заавал ч үгүй могойны өндөг гардаг байсан гэдэг.
Байгаль ертөнцийн тухай энэ мэт зүйлсийг хэн хүнгүй мэдэж байвал зохилтой мэт. Иймээс ч энэ тухай бичихдээ үр хүүхдээ хог новш шиг гудамжинд хаядаг хүмүүс хэвлээр явагч могойноос хүртэл жишээ аваасай гэсэн давхар санаа агуулсан бөлгөө.
Эх сурвалж: wikimon.mn
URL:
