Долдугаар хорооллын ажил мянгуужингийн үлгэр болох вий дээ

Сүүлийн жилүүдэд орон сууцны томоохон хорооллууд барих талаар их ярих болсон. Тэр дундаа долдугаар хорооллыг барих талаар төр засгийн хүрээнд идэвхтэй ярьж байгаа.  Тэр ч битгий хэл “Ногоон нуур” орчмын айлуудыг нүүлгэх зорилгоор түр орон сууц бариад эхэлсэн. Ирэх хавраас айлуудаа нүүлгэж, барилгын ажил хийх тухай ч албаны хүмүүс мэр сэр яриад байгаа.

Эхнээс иргэдтэй тохиролцоод эхэлсэн сураг гарсан. Гэтэл төр засаг ярихаа урьтал болгож, дорвитой хөдөлж чадаагүй байж байтал араар нь хувийн компаниуд хор найруулаад байгаа сурагтай. Ойрноос хэд хэдэн хувийн компани “Ногоон нуур” орчмын айлуудад санал өгөөд эхэлсэн гэнэ.

Төрөөс өгч байгаа саналаас хамаагүй ашигтай тухай тэр хавийн иргэд ярьж, зарим нь олзуурхаж байгаа юм билээ. Энэ маягаараа бол төр долдугаар хороолол барихаас өмнө газар нь хувийн компанитай нөхдүүдийн халаасанд “ороод” дуусч магадгүй л байх. Уг нь төр засаг нийслэлийн бүх иргэдийн эрх ашгийн үүднээс нэг хэсэг хүнд хатуухан хандахад гэмгүй л байгаа юм. Газрынх нь хэмжээнд тааруулаад, нэг, хоёр өрөө байр өгөөд, хүчээр нүүлгэсэн байсан ч ер нь яадаг юм. Ингэж ус нь ихэдсэн гурил шиг нялцагнаж байх зуур ядуу иргэдийн эрэлт дээр мөнгөтэй баячууд тоглоод дуусч байна.

Долдугаар хороолол хурдан баригдах тусмаа “100 айл” орчмын утаа униар татарна. Өнөөдөр Улаанбаатарт байгаа хамгийн их утаатай, гамшгийн бүс бол “100 айл” орчим. Энэ аюулыг багасгах зорилго долдугаар хорооотын цаана байгаа биз дээ. Дээрээс нь хөрсний бохирдол багасах учиртай. Тэгээд ч төр засгаас хөрөнгө мөнгийг гаргаад барьчихвал эргээд жижиг, дуңд орлоготой иргэдээ орон сууцаар хангах боломж бүрдэнэ гэсэн үг. Цөөн ч болов хүмүүс гэр хорооллоос салж, орон сууцанд орж байвал аятай юу. Өнөөх яриад, амлаад байгаа жилийн зургаан хувийн хүүтэй зээлээ олгох боломж ч бүрдэнэ. Олон асуудлыг давхар шийдэх боломжтой гэдгийг хэн хүнгүй ярьж байгаа. Гэтэл шийдэх шийдэхгүйн хооронд явсаар, хувийн компаниуд орон сууц барьчихвал баян бизнесмэнүүдийн ашиг орлого нэмэгдэх л байх. Өөр гэрэлтэй мэдээ дуулдахгүй байна. Хувийн компаниуд санал өгөхдөө орон сууцны хороолол барина. Хэдэн давхарт байр сонгохоо хэл гэж уран үгээр уярааж байгаа юм билээ.

Төр засгаас бүхэл бүтэн орон сууцны хороолол барина гээд төлөвлөчихсөн байхад хувьдаа авч, орон сууц барих гээд явж байдаг ямар ч их эрх мэдэлтэй бизнесмэнүүд үү. Бүхэл бүтэн хороолол барина гэж төлөвлөчихөөд өдий болтол юу ч хийхгүй шахам байсаар захын нэг мөнгөтэй нөхөрт дээрэлхүүлэхдээ тулж байдаг ямар ч шалдаа буусан төр вэ. Уг нь төр төмөр нүүртэй байх ёстой юм. Ард түмний эсрэг үйл ажиллагаа явуулж байгаа, ашиг олох гэж улайрч байгаа нөхдүүдэд бүр ч хатуу хандах хэрэгтэй. Тэгэхгүй бол долдугаар хорооллын ажил чинь мянгуужингийн үлгэр болж, ганцхоёр хун баяжаад дуусах шинжтэй. Хэн нэг нь үүнийг анхааралдаа авч, түрүүлж алхах хэрэгтэй байна. Долдугаар хороолол хэн хэнд маань хэрэгтэй байгаа. Тиймээс ганц, хоёр хүний өгөөш болгомооргүй байна.

Н.Пунцаг