Огноо: 2019/5/31 9:40:59

ГССҮТ-ИЙН ХҮҮХДИЙН ТАСАГ ШИНЭ ӨНГӨ ТӨРХТЭЙ БОЛЛОО

1991 онд Гэмтэлийн эмнэлэг ашиглалтад орсноос хойш нэг ч удаа засвар хийгдээгүй хүүхдийн тасагт өнгөрсөн жил тус төвийн эмч нар салбарын сайдад засвар хийх шаардлагатай болсноо танилцуулсны үр дүнд сайдын багцаас хөрөнгө гаргаж 40 хүүхдийн ортой тасагт бүрэн засвар, тохижилт хийв.

Сүүлийн үеийн стандартад нийцсэн тоног төхөөрөмж, ор дэр гээд бүх зүйлийг цоо шинээр шинэчилж өгсөнд эцэг эхчүүд баярлаж талархав.

Уг баярт үйл явдалтай зэрэгцэж үндэсний “ТОДИ” живх үйлдвэрлэдэг компанийн зүгээс нийгмийн хариуцлагынхаа хүрээнд гэмтэл бэртэл авч уг тасагт хэвтэн эмчлүүлж буй амьжиргааны түвшин доогуур, боломж тааруу хүүхдүүдэд живхны жилийн хэрэгцээг хангаж буйгаа энэ үеэр илэрхийллээ. Мөн “Юнивишин” компаниас хүүхдийн сувгуудаа хөнгөлттөй үнээр бүх өрөөнд байршуулж өгсөн юм.

Уг хоёр компани нийгмийн хариуцлагаа ухамсарлаж ийм үйлчилгээ үзүүлсэнд ГССҮТ-ийн хамт олон болон эцэг эхчүүд баяртай байгаа. Хөдөлгөөнгүй эмчилгээтэй хэвтдэг хүүхдүүдэд хүссэн хүүхэлдэйн кино, нэвтрүүлгийг нь үзэх боломжийг хангаж өгч байгаа.

Гэмтэлийн эмнэлэгт тусламж үйлчилгээ авахаар ирж байгаа хүмүүсийн 30-40 хувь нь хүүхдүүд байдаг. Өдөрт уг тасгаар дунджаар 150-160 хүүхэд ирж тусламж үйлчилгээ авдаг. Тиймээс дээрх хүүхдийн тасаг ачаалал ихтэй байдаг учраас засвар хийх шаардлагатай байсан юм.

Монгол Улсын хэмжээнд хүүхдийн гэмтэл болон согогын төрөлжсөн нарийн мэргэжлийн тусламж үйлчилгээг орчин үеийн мэс заслын болон эвийн аргыг олон улсын эмчилгээний стандартын дагуу чанарын өндөр түвшинд үзүүлдэг. Тус тасагт ажиллаж байгаа эмч, сувилагч нар АНУ, ЯПОН, БНСУ, ФРАНЦ улсад мэргэжил дээшлүүлэн суралцаж, хүүхдийн гэмтэл согогийн нарийн мэргэжлийн тэргүүлэх болон ахлах зэрэгтэй эмч нар ажилладаг. Хүүхдийн тулгуур эрхтний гэмтлүүд, төрөлхийн болон олдмол согогуудыг эвийн болон мэс заслын аргаар эмчилж байна.

Мөн салбарын сайд энэ өдөр тус төвийн Өдрийн эмчилгээний үйл ажиллагаатай танилцлаа. Өдрийн эмчилгээ нь ачаалалтай үед шууд тасагт шилжиж орохгүйгээр өдөртөө эмнэлгийн тусламж үйлчилгээгээ аваад явах боломжийг бүрдүүлсэн байгаа юм.

Согтуу хөлчүү гэмтэж бэртсэн гээд хүмүүст үйлчилдэг хэдий ч тусламж үйлчилгээ үүднээсээ эхэлж өнгө зүс нь сайжирч, орчин нөхцөл, эмч нарын чадвар ажилчдынх нь бусадтай хандах харилцаа, хандлага, үйлчилгээний чанар хүртээмж өдөр ирэх бүр сайжирч байгаа.

Ер нь бол улсын эмнэлгүүдийн орчин нөхцлийг сайжруулах тал дээр Засгийн газар болон Эрүүл мэндийн яамнаас онцгой анхаарч, уялдаа холбоог хангаж ажиллаж байна.

Дашрамд дуулгахад, ГССҮТ-ийн баг хамт олон орон нутагт гэмтэлийн тусламж үйлчилгээний чанар хүртээмжийг нэмэгдүүлж сайн туршлага, шинэ инновацийг орон нутгийн эмчилгээнд хүргэх зорилгоор Өвөрхангай аймагт 6 сар ажиллаж, тус аймгийн гэмтлийн эмч нарыг сургалтад хамруулж, чадавхжуулжээ.

Түүнчлэн мэс заслыг аймгийн төвдөө хийх боломж нөхцлийг бүрдүүлж өгчээ. Ингэснээр иргэд нийслэлийг зорих цаг хугацаа алдах, зардлыг бууруулах боломжтойгоос гадна орон нутагт эмнэлгийн тусламж үйлчилгээг ойртуулж байгаа юм. Цаашид тус төвийн эмч нарын баг 21 аймагт зургаан сарын хугацаатай ажиллана.