Прокурор А.Цэрэнсодном авлигын хэргээ булзааруулах гээд чадсангүй

Авлигын хэрэгт хоёр дахь удаагаа холбогдон шалгагдаж байгаа Нийслэлийн Прокурорын газрын хяналтын прокурор А.Цэрэнсодномыг Монгол улсын Ерөнхийлөгч Х.Баттулга Улсын Ерөнхий прокурорын орлогчоор томилуулах саналаа УИХ-д илгээтэл харин бөөн шуугиан дэгдэж, арга буюу нэрийг нь татаж авсан нь өнгөрсөн өдрүүдийн халуун сэдвүүдийн нэг байлаа.  Өөрөөр хэлбэл, Х.Баттулга нь цадиг замбараагаа алдсан прокурорын байгууллагыг өөрийнхөө толгойлдог Үндсэний аюулгүй зөвлөлийн бугалган доор оруулах хууль санаачилж,  УИХ-аар батлуулж авмагцаа талийгаач С.Зоригийн хэргийн ажлын хэсгийн ахлагчаар ажиллаж байсан Улсын Ерөнхий прокурорын орлогч Г.Эрдэнэбатыг зайлуулаад, оронд нь эртний танил А.Цэрэнсодном найзыгаа тавих гэсэн боловч тийнхүү бүтэлгүйтэж, олны итгэл рүү ус цацах нь тэрээ.

А.Цэрэнсодномын удаа дараагийн авлигын хэрэг, ашиг сонирхолын зөрчил болон бусдыг айлган сүрдүүлж дарамтлан мөнгө, эд хөрөнгийг нь салгаж авдаг гэмт хэргийн шинжтэй үйлдлүүдийг Зариг.мн сайтын сэтгүүлч Н.Өнөрцэцэг анх олон нийтэд дэлгэж, ийм бохир хүн тийм хариуцлагатай чухал албанд томилогдох ёсгүй гэдэг асуудлыг хөндсөн юм. Хэрвээ сэтгүүлчийн хувьд тэгж шуугиан тариагүйсэн бол Х.Баттулгын зүгээс огт тоож үзэлгүй найзыгаа УИХ-ын чуулганд оруулж хэлэлцүүлсэн болоод Улсын Ерөнхий прокурорын орлогч гэдэг өндөр эрх мэдлийн сэнтийд шууд залах байсан нь лавтай. А.Цэрэнсодном урьд нь Тээврийн прокурорын газрын орлогч даргаар ажиллаж байхдаа зам тээврийн ослын гэмт хэрэг дээр шинжээчийн дүгнэлтийг хуурамчаар гаргуулах ажлыг мөрдөн байцаагчтайгаа хуйвалдаж хийснийхээ төлөө ажлаас хусагдаж, өнөөх мөрдөгч нь эрүүгийн хэргээр ял сонссон байлаа. Энэ нь 2005 онд болсон гэмт явдал ажээ.

Прокурорын албанаас хусагдсан А.Цэрэнсодном дараа нь Мэргэжлийн хяналтын ерөнхий газар, Эрдэнэт үйлдвэр зэрэгт хуулийн хэлтэсийн даргаар ажиллаж байхдаа ч бас хэл ам хэрүүл шуугианы бай болсоор л явжээ. Тэгээд хамгийн сүүлд дахиад прокурорын байгууллагын босгыг давж орохдоо харин Нийслэлийн прокурорт хяналтын прокуророор томилогдсон байлаа. Гэвч энэ албыг хашаад удалгүй мань эр бусдаас 154 сая төгрөгийн авлига хээл хахууль авсан байж болзошгүй хэрэгт сэжиглэгдэж, саяхнаас Авлигатай тэмцэх газрын Мөрдөн шалгах хэлтэст шалгагдаж эхлээд байгаа ажээ.

Тэрбээр энэхүү дуулиан шуугиантай мэдээлэлд эмзэглэн сэтгүүлч Н.Өнөрцэцэг рүү удаа дараа утсаар залгаж, сүүлд нь өөрийн үйлдсэн авлигын хэргийг арга буюу хүлээн зөвшөөрсөн нь түүнтэй уулзах үедээ хийсэн бичлэгээс  тов тодорхой болоод байна. Уг бичлэгийг сонссон хэн ч гэсэн түүнийг албан тушаалаа ашиглан бусдаас авлига хээл хахууль авснаа сэтгүүлчийн өмнө нууж булзааруулах гээд чадахгүй хий дэмий будилж буйг төвөггүй ойлгохоор байгаа юм. Та доорх бичлэгийг сонирхож үзнэ үү.

О.Баяр

Шуурхай.мн