Оюутолгойн гэрээг шалгах ажлын хэсэг 200 гаруй хуудас материал танилцуулахаар бэлджээ

Оюутолгойн ордын хөрөнгө оруулалтын гэрээг ерөнхий сайд асан Санжийн Баярын үед буюу 2009 онд ёслол төгөлдөр үзэглэж байсан. Тухайн үед Оюутолгой төслийн олборлолтын ажил эхэлмэгц 2014 он гэхэд ашигт малтмалын экспортын орлого хоёр дахин нэмэгдэж дор хаяж 50 жил энэ ордын өгөөжийг өнөөгийн биднээс гадна үр хойч үе ч хүртсээр байх болно гэж тэр үеийн засгийн газрын тэргүүн хэлж байсан юм.

Гэвч Оюутолгойн ордоос Монголчууд ашиг хүртэх хугацаа  хойшилж алдагдал хүлээх болсон тул өнгөрсөн оны гуравдугаар сард Оюутолгойн ордыг ашиглах хөрөнгө оруулалтын гэрээний хэрэгжилтийг шалгаж санал, дүгнэлт гаргах үүрэг бүхий ажлын хэсгийг байгуулсан. Гэвч бүтэн жил тойрч байхад ажлын хэсгийн дүгнэлттэй танилцаж чадаагүй байгаа юм

Өнөөдрийг хүртэл Оюутолгойн гэрээг шалгах ажлын хэсгийн дүгнэлттэй танилцаж санал солилцож чадаагүйд  олон шалтгаан байгаа. Тухайлбал УИХ ын гишүүн Т.Аюурсайхан ажлын хэсгийн гишүүдийг Оюутолгой компанийн удирдлагууд онгоцоор зөөн, дайлж цайлдаг тиймдээ ч ажлын хэсэг дорвитой зүйл хийж чадахгүй байна гэж байр сууриа илэрхийлж байсан удаатай. Харин улс төрд үүссэн нөхцөл байдлаас үүдээд ажлын хэсэг дүгнэлтээ танилцуулж чадаагүй  нэг биш хойшилсон гэдгийг Тэрбишдагва гишүүн онцоллоо. Өнөөдөр УИХ ын эдийн засгийн байнгын хорооны хуралдаанд Оюутолгойн гэрээг шалгах ажлын хэсгийн дүгнэлтийг танилцуулах байсан ч ирц хүрээгүй шалтгаанаар хойшиллоо