Ц.Пүрэвтүвшин: Бид төрөөс нэг ч төгрөг аваагүй, Л.Оюун-Эрдэнэ уучлал гуйна гэж найдаж байна

“Эрдэнэт” үйлдвэрийн 49 хувийн хувьчлалтай холбоотой тухайн үеийн Засгийн газрын хуралдааны тэмдэглэл болон холбогдох материалуудыг Засгийн газрын хуралдаанаас нууцын зэрэглэлээс гаргахаар шийдвэрлэсэн юм. Үүнтэй холбогдуулж ЗГХЭГ-ын дарга Л.Оюун-Эрдэнэ сэтгүүлчдэд мэдээлэл хийсэн. Үүнтэй холбоотой “Монголын зэс” корпорациас ЗГХЭГ-ын дарга Л.Оюун-Эрдэнийг гүтгэсэн, худлаа мэдээлэл тараасан гэх үндэслэлээр Баянзүрх дүүргийн иргэний хэргийн шүүхэд нэр төрөө сэргээлгэхээр нэхэмжлэл гаргалаа.

 “Монголын зэс” корпораци ЗГХЭГ-ын дарга Л.Оюун-Эрдэнийг шүүхэд өглөө   

“Монголын зэс” корпорацийн гүйцэтгэх захирал Ц.Пүрэвтүвшин:

-Манай компани ЗГХЭГ-ын дарга Л.Оюун-Эрдэнийн мэдээлэлтэй холбоотой шүүхэд нэхэмжлэл гаргаж байна. Нэхэмжлэлийн шаардлага нь “Манай компанийн талаар зориуд тараасан худал мэдээллээ залруулж, уучлал хүсэхийг даалгах” юм.

Өнгөрсөн хугацаанд “Эрдэнэт”-ийн 49 хувьтай холбоотой гурван жил гаруй шалгаж байна. АТГ, ЭЦГ-аас манай компанийг 10 гаруй удаа дуудаж, байцаалт авсан. Манай компанитай хамтарч ажилладаг компаниудыг байцаасан тоо давтагдсан тоогоор 70 гаруй болсон. Харамсалтай нь Л.Оюун-Эрдэнэ гишүүн манай компанийг байцаалтаас зугатааж байгаа мэтээр ташаа мэдээлэл цацсан. Л.Оюун-Эрдэнэ гишүүний хийсэн мэдээллээс үзэхэд хүчний байгууллагаас дэлэрэнгүй мэдээлэл авсан нь харагдаж байгаа. Ямар зүйл ангиар шалгагдаж байгаа, ямар схемтэй санхүүүгийн мөнгө орсон гэх мэт мэдээлэл орсон. Гэхдээ ямар хүнээс байцаалт авсныг зориуд орхигдуулсан нь олон нийтийн дунд манай компаний нэр хүндийг унагаж байна. Ярьсан мэдээллүүдийн дунд олон асуудлыг гүжирдсэн байдалтай байгаа.

Өнөөдөр Монгол Улсад иргэд өөрсдөө бизнес хийж чадахаа больжээ. УИХ-ын гишүүд хэвлэлээр ажил хийдэг болжээ. Өрөө бэлдээд, энэ асуудлаар мэдээлэл хийнэ гэж байгаа. Бид энэ асуудлаар Ерөнхийлөгч, Ерөнхий  сайдтай уулзахаар удаа дараа хүсэлт тавьсан. Биднийг хүлээж аваагүй. Л.Оюун-Эрдэнэ гишүүн биднийг дуудаж, энэ асуудлаар яриагүй. Шүүхийн шийдвэр есдүгээр сард гарсан боловч биелэгдэхгүй байна. Төрийн захиргааны байгууллага, хуульзүйн яамны  зүйл бус үйл ажиллагаанаас болоод шийдвэр гүйцэтгэл дээр ямар ч ажиллагаа явагдахгүй байгаа. Цагдаа, АТГ-т гомдол өгөхөөр  шийдэгдэхгүй байна. Бид төрийн өмнө хүчин мөхөсдөж байна. Л.Оюун-Эрдэнэ гишүүн өөрийн давуу байдлаа ашиглан хүчний байгууллагаас мэдээлэл авчихаад зүй бусаар нөлөөлөх байдлаар олон нийтийн тархийг угааж байна. Бид төрөөс авсан нэг ч ам.доллар байхгүй. Гэвч ямар ч үндэслэлгүй ард түмний тархийг угааж байна. Тийм учраас бид Л.Оюун-Эрдэнэ гишүүнийг иргэний хувиар шүүхэд өгч байна. Уучлал гуйх байх гэж найдаж байна. аваагүй.

“Эрдэнэт” үйлдвэрийн 49 хувийг Монголын хувийн компанид шилжүүлснийг Засгийн газар буруутгаагүй гэдгийг тэрбээр онцолсон. Хамгийн гол нь төрийн мөнгөөр төрийн өмчийг хууль бусаар худалдаж авсан байж болзошгүй таамаглалыг нотлох баримтууд олон нийтэд ил болох боломжтой болж байгаа нь хамгийн чухал гээд “Монголын зэс” корпорацийнхан санхүүжилтээ хэрхэн босгосон, хамжиж оролцсон нэр бүхий компаниудын эзэд нь хэн байсан, Монголбанк, Сангийн яам, Хөгжлийн банкнаас ямар аргаар нийт хэдэн удаа гүйлгээ хийсэн зэргийг тэрээр сэтгүүлэдэд тайлбарласан юм. Худалдаа хөгжлийн банк, “Монголын зэс” корпораци хоорондоо холбоотой гэдгийг нотолсон баримт бас тухайн үеийн Засгийн газрын хуралдааны тэмдэглэлд байгааг ч тодотгосон. Энэ талаар, “Эрдэнэт” үйлдвэрийн 49 хувийг төрийн өмчид буцааж авах 23-р тогтоолыгУИХ-аас гаргасан. Энэ тогтоолыг Үндсэн хуулийн Цэцээс зөрчилгүй гэдгийг тогтоосон байдаг. Гэтэл “Монголын зэс” корпораци шүүхэд гомдол гаргаж, гурван шатны шүүхэд Засгийн газар унасан. Шүүхэд ялагдсан долоон шалтгааны нэг нь Худалдаа хөгжлийн банк болон “Монголын зэс” корпораци хоорондоо хамааралгүй гэсэн заалт. Гэтэл нууцаас ил гарсан материалд дээрх хоёр компани  санхүүгийн болон удирдлагын хувьд хамааралтай  гэдгийг тухайн үед болсон Засгийн газрын хурал дээр нэр бүхий хүмүүс хэлж байсан байна гэлээ.   Засгийн газрын хуралдаанаар хэлэлцэж нууцаас гаргасан бүх материалыг ЗГХЭГ-ын дарга Л.Оюун-Эрдэнэ Үндэсний Аюулгүй байдлын зөвлөлийн хуралд танилцуулж, холбогдох зөвлөмжийг гаргуулсны дараа олон нийтэд ил болгох юм.

“Эрдэнэт”-ийн 49 хувийг  төр хурааж авбал хувьцаа “Ростех”-д очно

“Монголын зэс корпораци” ХХК-ийн ТУЗ-ийн дарга М.Мөнхбаатар:

2016 оны есдүгээр сарын 15-нд олон улсын Арбитрийн шүүхийн шийдвэр цаасаар бий болсон. Шийдвэр нь манай компани “Эрдэнэт” үйлдвэрийн хувьцааг эзэмшихээс өмнө бий болсон. 100 гаруй сая ам.долларын өр гэдэг иргэн бүр 100 мянган төгрөгйин өрөнд ороод байна. Ийм нөхцөл байдалд хэдхэн улстөрчид авчирчихаад байгаа. Бид хувьцаа эзэмшигчийн хувьд үүний араас хөөцөлдөж байлаа.  Компанийн хувьцааг Сингапурын хууль, эрхзүйн түвшинд аваачвал төлбөр нь багасна гэсэн хуульчдынхаа зөвлөгөөг дагасан. Т.Аюурсайхан гишүүн гэнэт авсан мэдээлэл шиг зүйл ярьж байна. Гэтэл үүнийг төрийн өндөр албан тушаалтан өөрийн давуу эрхийн хүрээнд мэдээлэл авсан. Үүний үр дүнд бидний хийж байсан үйл ажиллагаа зогслоо. Энэ мөнгийг татвар төлөгчид бид төлнө. Хэдхэн хоногийн өмнө Л.Оюун-Эрдэнэ гишүүн шинэ мэдээлэл өгч байгаа юм шиг ярьсан. Гэтэл Засгийн газрын хурлын протокол хоёр жилийн өмнө гарсан.  Манай компанийн хувьцааг төр хураагаад авсан. Төр шүүхийн шийдвэр биелүүлэхгүй байгаа. Хэрвээ хувьцааг буцааж авбал төрд очихгүй. ОХУ-ын “Ростех” компанид очно. Төрийн өндөр албан тушаалтнууд ч энэ хувьцааг буцааж авахыг “Ростех”-д  хандсан байна. Хэрвээ  Монгол Улсын шүүх үүргээ биелүүлэхгүй бол бид олон улсын шүүхэд хандана.

Сүүлийн хоёр жил “Эрдэнэт” үйлдвэрийн 49 хувь хувийн хэвшилд орсноороо татвар өндөр төлдөг болсон. “Эрдэнэт” үйлдвэрийн өртөг, зардал нэмэгдэхээ больсон. Зэсийн үнэ 10 мянган ам.долларт хүрч байхад бид зардал мөнгөө хэмнэж чадсан. Өнгөрсөн хоёр жилийн хугацаанд нийт ажилчдынхаа цалингийн фондыг 30 хувь өсгөсөн. Энэ бол “Эрдэнэт”-д ажиллаж  байгаа энгийн ажилчдын амьдралд хүрч, эдийн засгийн үр ашиг нь бий болж байна. Гэтэл төрийн үйл ажиллагаанаас болж иргэн бүр 100 мянган төгрөгийн, айл гэр болгон 500 мянган төгрөгийн өртэй болсон нөхцөл байдал үүсчихээд байгаа. Тэд мэдээлэл хийснийхээ дараа сэтгүүлчдийн асуултад хариулав. 

-Сингапур оффшор бүст ордог уу?

-Үүн дээр олон улсын хуульчдын өгсөн зөвлөгөөний дагу төлбөр мөнгийг бууруулах, хугацааг нь хойшлуулах үүднээс шинээр үүссэн нөхцөл байдал руу оруулах гэсэн зүйл зогссон. Сингапурт эзэмшиж байгаа компанийн 100 хувийн хувьцаа эзэмшигч нь Монгол Улсын иргэн Пүрэвтүвшин. Ямар нэг хардлага байхгүй.  Сингапур оффшор бүсэд ордоггүй.

-“Эрдэнэт” үйлдвэртэй  холбоотой хэдэн төгрөгийн асуудал байна вэ?

-Зөвхөн стандарт банктай холбоотой 100 гаруй сая ам.долларын асуудал байгаа. Бид монголчуудыг өрөнд оруулахгүй байхын төлөө ажиллаж байна. Монголчуудыг эрх мэдэл бүхий улстөрчид л өрөнд оруулаад байна.

Өнөөдрийн тухайд сар бүр торгууль төлөөд явж байгаа.

shuud.mn