Хорин мянган хүнийг сэжигтэй хүнс хэрэглэхэд хүргэсэн НМХГ-ын дарга Л.Эрдэнэчулуун огцрох ёстой

Сэжигтэй хүнс идсэн 20 мянган хүн гэдэг нь хаанаас гарсан тоо вэ. Иргэд “Зайсан KFC”-гийн салбараар үйлчлүүлээд хордлого авсан хугацаа бол хоёрдугаар сарын 8-ны өдөр. Энэ өдөр тус салбараар үйлчлүүлсэн иргэдийн тоо 191 байгаа. Зайсан дахь энэ салбар нь KFC-гийн 13 салбар дотроо харьцангуй цөөн үйлчлүүлэгчидтэй гэнэ. Нийслэлийн төвд буй салбаруудынх нь нэгээр нь гэхэд өдөрт 400 хүн үйлчлүүлэх үе ч бий гэж эх сурвалж мэдээллээ. Тэгэхээр бүх салбар нэг бүрт өдөрт дунджаар 200 хүн үйлчлүүлдэг байна. Нэгтгээд тооцоход нийт 13 салбараар доод тал нь өдөрт 2000 хол илүү хүн үйлчлүүлдэг ажээ. Хоёрдугаар сарын 8-наас хойш өчигдрийг хүртэлх хугацаанд 10-н өдөр өнгөрчээ. Энэ хугацаанд нийтдээ дор хаяж 20 мянган хүн KFC-гийн салбараар үйлчлүүлсэн байна. Дахин хэлье, 20 мянга бол хамгийн доогуур авсан тоон дүн. Хорин мянгаас илүү тооны хүн үйлчлүүлсэн гэсэн үг.

Энэ бүх үйл явдал өрнөөд, хорддог нь хордоод, эмнэлэгт очдог нь очоод сүйд болсны эцэст дөнгөж өчигдөр л НМХГ-ын дарга Л.Эрдэнэчулуун албан ёсны мэдэгдэл хийж “KFC”-гийн салбаруудыг албан ёсоор шалгах болсноо мэдэгдлээ. Түүний амнаас тус түргэн хоолны газруудыг хааж шалгана гэж хэлсэнгүй. Хаахгүйгээр шалгах юм уу гэж иргэд асууж байна. Мань дарга үүнд нь “Шүүхийн шийдвэр гарсны дараа хаана” гэв. Тэгвэл Шүүхийн шийдвэр гарах хүртэл KFC-гийн салбарууд ажиллаж, иргэд баталгаагүй хүнс хэрэглэж, түүндээ хордож болно гэсэн үг үү. Үүнд НМХГ-ын дарга Л.Эрдэнэчулуун түс тас хариулт өгмөөр байна. Бүх салбарыг нь эрхбиш хааж байгаа гэдэгт найдъя.

Түүний өчигдөр хийсэн мэдэгдлээр бол “Зайсан KFC” түргэн хоолны газарт хоёрдугаар сарын 8-15-ны өдрүүдэд хоол идсэн иргэдээс 116 хүнд нь ойр ойрхон усархаг гүйлгэх, зарим хүнд бөөлжих, халуурах зэрэг эмнэл зүйн ижил шинж тэмдэг илэрсэн. ХӨСҮТ-д хэвтэн эмчлүүлж байгаа 37, гэрээр эмчийн зөвлөгөөний дагуу эмчлүүлж байгаа 79 хүн хоолны хордлогот халдварын ижил эмнэл зүйн шинж тэмдэг илэрсэн байна. Манайхаас хяналт шалгалт хийж, 39 төрлийн хоолны дээж, 41 нэр төрлийн хүнсний түүхий эд бүтээгдэхүүн, ундны усны 2, агаарын 5 сорьц, 4 ундааны сорьц авч лабораторид нян судлалын шинжилгээнд хамруулсан. Мөн тус түргэн хоолны газрын нийт 28 ажиллагсдаас ХӨСҮТ-ийн тархвар судлаач эмч, лаборант нар тухайн ажлын байранд байрлан эрүүл мэндийн үзлэг хийж, нян тээгч илрүүлэх шулуун гэдсний арчдасын сорьц авч шинжилгээнд хамруулаад байна. Шинжилгээний хариу гарсан. Ус болон бүтээгдэхүүнээс өвчин үүсгэгч илэрсэн. Мөн тус байгууллагын хоёр ажилтан цусан суулга өвчний халдвартай байсан нь илэрсэн. Эрүүл мэндийн үзлэгийн хуудсыг хуурамчаар үйлдсэн байсан” гэлээ.

Үгүй ээ, мөн их шинжилжээ. Шинжлээд л байж, KFC-гийнхэн сэжигтэй хүнсээрээ иргэдийг дайлсаар л байж. Л.Эрдэнэчулуун дарга тэргүүнтэй нийслэлийн МХГ-ынхан, тэдний гэр бүлийнхэн бол мэдээж өнгөрсөн 10 хоногт тус түргэн хоолны газраар үйлчлүүлээгүй. Ард түмэн бол 10 хоног үйлчлүүлж, хорддог нь хордчихсон. Энэ бүгдийн дараа “За одоо KFC-ийг шалгая, Шүүхийн шийдвэр гарвал хаана” гэж хэлдэг нь ямар учиртай юм бэ. Зэвүү хүрмээр байгаа биз. Л.Эрдэнэчулуун даргын зүгээс хордлого гарсан учраас л хаана гэж байгаа биз дээ. Хордсоныг нь шалгалттай, шалгалтгүй мэдэж л байсан байгаа биз дээ.

Зүй нь, хордлогын дохио ирсэн даруйд НМХГ-ын дарга Л.Эрдэнэчулуун тэр дор нь бүх салбарыг хаах ёстой байсан. Тэгээд шинжлээд хордоогүй байсан бол буцаагаад нээнэ л биз. Олон улсын жишиг ийм л байдаг. Бусад улс орны хяналтын байгууллагууд ямар нэг сэжиг, шинж тэмдэг илэрвэл шууд хаалгыг нь хааж, хяналт шинжилгээний ажлаа шуурхайлдаг. Батлагдахыг нь хүлээдэггүй. Албан ёсны шинжилгээгээр батлагдахгүй бол бүр ч илүү дуулиантайгаар, бараг пиар маягаар өнөө үйлчилгээний байгууллагуудынхаа үүд хаалгыг нээж, улам олон үйлчлүүлэгчтэй болгож өгдөг жишээ бий. Харин ард түмэндээ “гай” тарьсан бол бизнесийг нь хаадаг. Ер нь сүүлийн үед олон улсад хүнсний бизнес, банк санхүүгийн бизнес хоёрт онцгой анхаарах болсон. Энэ салбаруудын талаар ямар нэг асуудал нийгэмд босвол нэг минут ч алдалгүй арга хэмжээ авдаг болсон. Нийгэмдээ албан ёсоор тайлагнадаг болсон. Манайд бол ийм мэргэжлийн ур чадвар, ёс зүй, ард түмний төлөө гэсэн сэтгэл зүрх үүрэг хүлээсэн төрийн байгууллагын ажилтнуудад алга.

Цаг алдалгүй арга хэмжээ авах эрх мэдэл НМХГ-ын дарга Л.Эрдэнэчулуунд 100 хувь байсан. Хордлогын шинж тэмдэгийн анхны дохио ирлээ, KFC-гийн бүх салбарыг хаагаад, ард түмэндээ сэрэмжлүүлэг хүргэх ёстой байсан. Гэтэл тэрбээр шалгана, батална гэсээр бүтэн 10 хонов. Хордлогын хор хохирол, урхагын талаар мэргэжлийн хүмүүс өнөөдрөөс дуугарч эхэллээ. KFC-гийн бүтээгдэхүүнээс илэрсэн нянгууд нь хүний биед буглах, тодорхой хугацааны дараа дахин сэдрэх боломжтой гэж. Энэ бол аймшиг. Хортой хүнсээр үйлчилсэнийг нь тогтоосон нь үнэн л юм бол МХЕГ-аас ажлаа хийгээгүй, цаг алдсан, ард түмнийг арван өдөр сэжигтэй хүнс идэх нөхцөлийг бүрдүүлсэн НМХГ-ын дарга Л.Эрдэнэчулууныг яаралтай огцруулж, улмаар хуулийн хариуцлагад татах ёстой. Үүнийг хохирсон иргэд нэхэл хатуутай шаардах нь хууль ёсны юм.

Хамгийн зэвүү хүрмээр нь жижигхэн цайны газраас сэжиг илэрсэн бол юун 10 хоног хүлээх, аравхан минутын дотор ниргэчихсэн байгаа. Гэтэл KFC-гийн эзэн нь нэр нөлөөтэй, хөрөнгө чинээтэй, том сүлжээний эзэн болохоор худлаа зуйрагнаж, илүү дутуу харж, 10 хоног хүлээсэн нь өнөөдрийн нөхцөл байдлаар нотлогдож байна. Бүх газарт стандарт нэг л байх ёстой. Тэр нь том газар, энэ нь жижиг газар гэж ялгавартай хандах нь хууль зөрчсөн үйлдэл. Ийм байж болохгүй, Л.Эрдэнэчулуун дарга аа. Ард түмэндээ 10 хоног сэжигтэй хүнс идүүлж идүүлчихээд гэнэт өчигдөр гарч ирээд “Шүүхийн шийдвэрээр KFC-ийг хаана, шалгана” гэж сүржигнэх чинь шившигтэй байна. Таны ажилдаа хөшүүн хойрго, ажлаа мэддэггүй, худлаа сүржигнэдгийн чинь илрэл энэ боллоо. Монголчууддаа ямар муухай элэггүй, сэтгэлгүй ханддаг чинь тодорхой боллоо. Зүйрлэвэл, гадны халдан түрэмгийлэгчид довтлоход ард түмнээ 10 хоног цусан далайд живүүлсний эцэст сая нэг “За одоо арга хэмжээ авахгүй бол болохгүй нь” гээд босч байгаа Батлан хамгаалахын сайдтай агаар нэг юм.

Өнөөдрийн ертөнцөд улс орны Үндэсний аюулгүй байдал гэдэг нь зэвсэгт мөргөлдөөн, тулгаралт, танк, онгоцоор хэмжигдэхээ больсон. Үүнийг бүгдээрээ мэднэ. НҮБ-аас эхлээд Олон улсын хамтын ажиллагааны байгууллагууд, эвсэл нэгдлүүд тийм дээрэнгүйлэл, түрэмгийллийг түүх болгочихсон. Харин Үндэсний аюулгүй байдал нь Хүнсний аюулгүй байдлаар хэмжигддэг болсон. Гэтэл Монгол Улсад хүнсний аюулгүй байдал нь алдагдсан бүтэн 10 хоног болж өнгөрөв. Цаг алдалгүй арга хэмжээ авах ёстой байсан НМХГ-ын даргын амиа хичээсэн, араа бодсон, арчаагүй зангаас болж ард түмэн хордож үхэх шахлаа. Цаашдаа үүнээс улбаатайгаар хэн нэгэн нас барах ч юм билүү хэн мэдлээ. Байдал ийм ноцтой, дотор арзасхийлгэм, хүнсээр дамжиж Үндэсний аюулгүй байдалд аюул учирчихаад байхад Монгол Улсын Ерөнхийлөгч, Монгол Улсын Засгийн газар, МХЕГ-ын дарга нар ядаж ард түмнээсээ уучлалт гуйгаад, хүний амь насаар 10 хоног дэнчин тавьсан НМХГ-ын даргад хариуцлага тооцож, эрүүл мэндээрээ хохирсон олон зуун иргэдийнхээ хохирлыг “KFC”-ийн эздээр төлүүлэх арга хэмжээ авахгүй юм уу. Энэ бүгдийг Л.Эрдэнэчулуун шиг ингэж тэгж аргацаагаад, илүү дутуу мэдэгдэл хийж байгаад дараагийн сенсациар дарна даа гэж бодож сууна уу. Тэгэхгүй шүү, хаа хаанаа хариуцлага заавал хүлээх ёстой, хохирлыг заавал барагдуулах ёстой.

Б.НЯМАА

Өдрийн сонин